1 Samooel 10

saaool ko masah kiya jaata hai

¹phir samooel nay kuppee lay kar saaool kay sar par zaitoon ka tel undel diya aur usay bosa day kar kaha, “rabb nay aap ko apnee khaas milkiyat par raahanuma muqarrar kiya hai. ²meray paas say chalay jaanay kay baad jab aap binyameen kee sarhadd kay shaher zilzakh kay qareeb raakhil kee qabr kay paas say guzarengay to aap kee mulaaqaat do aadmiyon say hogee. vah aap say kahengay, ‘jo gadhiyaan aap dhoondnay gaay vah mil gaee hain. aur ab aap kay baap gadhiyon kee naheen balki aap kee fikr kar rahay hain. vah kah rahay hain ki main kis tarah apnay betay ka pata karoon?’

³aap aagay ja kar taboor kay baloot kay darakht kay paas pahunchengay. vahaan teen aadmee aap say milengay jo allaah kee ibaadat karnay kay liyay bait-el ja rahay hongay. ek kay paas teen chhotee bakriyaan, doosray kay paas teen rotiyaan aur teesray kay paas mai kee mashk hogee. ⁴vah aap ko salaam kah kar do rotiyaan dengay. un kee yah rotiyaan qabool karen.

⁵is kay baad aap allaah kay jibia jaaengay jahaan filistiyon kee chaukee hai. shaher men daakhil hotay vaqt aap kee mulaaqaat nabiyon kay ek juloos say hogee jo us vaqt pahaadee kee qurbaangaah say utar raha hoga. un kay aagay aagay sitaar, daf, baansariyaan aur sarod bajaanay vaalay chalengay, aur vah nubuvvat kee haalat men hongay. ⁶rabb ka rooh aap par bhee naazil hoga, aur aap un kay saath nubuvvat karengay. us vaqt aap farq shakhs men tabdeel ho jaaengay.

⁷jab yah tamaam nishaan vujood men aaengay to vah kuchh karen jo aap kay zahen men a jaaay, kyoonki allaah aap kay saath hoga. ⁸phir meray aagay jiljaal chalay jaaen. main bhee aaoonga aur vahaan bhasm honay vaalee aur salaamatee kee qurbaaniyaan pesh karoonga. lekin aap ko saat din mera intizaar karna hai. phir main a kar aap ko bata doonga ki aagay kya karna hai.”

⁹saaool ravaana honay kay liyay samooel kay paas say muda to allaah nay us ka dil tabdeel kar diya. jin bhee nishaanon kee peshgoee samooel nay kee thee vah usee din pooree huee. ¹⁰jab saaool aur us ka naukar jibia pahunchay to vahaan un kee mulaaqaat mazkoora nabiyon kay juloos say huee. allaah ka rooh saaool par naazil hua, aur vah un kay darmiyaan nubuvvat karnay laga. ¹¹kuchh log vahaan thay jo bachpan say us say vaaqif thay. saaool ko yoon nabiyon kay darmiyaan nubuvvat kartay huay dekh kar vah aapas men kahenay lagay, “qees kay betay kay saath kya hua? kya saaool ko bhee nabiyon men shumaar kiya jaata hai?” ¹²ek maqaamee aadmee nay javaab diya, “kaun in ka baap hai?” baad men yah muhaavara ban gaya, “kya saaool ko bhee nabiyon men shumaar kiya jaata hai?”

¹³nubuvvat karnay kay ikhtitaam par saaool pahaadee par chadh gaya jahaan qurbaangaah thee. ¹⁴jab saaool naukar samet vahaan pahuncha to us kay chacha nay poochha, “aap kahaan thay?” saaool nay javaab diya, “ham gumshuda gadhiyon ko dhoondnay kay liyay niklay thay. lekin jab vah na mileen to ham samooel kay paas gaay.” ¹⁵chacha bola, “achchha? us nay aap ko kya bataaya?” ¹⁶saaool nay javaab diya, “khair, us nay kaha ki gadhiyaan mil gaee hain.” lekin jo kuchh samooel nay baadshaah bannay kay baaray men bataaya tha us ka zikr us nay na kiya.

saaool baadshaah ban jaata hai

¹⁷kuchh der kay baad samooel nay avaam ko bula kar misfaah men rabb kay huzoor jama kiya. ¹⁸us nay kaha, “rabb israaeel ka khuda farmaata hai, ‘main israaeel ko misr say nikaal laaya. main nay tumhen misriyon aur un tamaam saltanaton say bachaaya jo tum par zulm kar rahee theen. ¹⁹lekin go main nay tumhen tumhaaree tamaam museebaton aur tangiyon say chhutkaara diya to bhee tum nay apnay khuda ko mustarad kar diya. kyoonki tum nay israar kiya ki ham par baadshaah muqarrar karo! ab apnay apnay qabeelon aur khaandaanon kee tarteeb kay mutaabiq rabb kay huzoor khaday ho jaao’.”

²⁰yah kah kar samooel nay tamaam qabeelon ko rabb kay huzoor pesh kiya. qur’a daala gaya to binyameen kay qabeelay ko chuna gaya. ²¹phir samooel nay binyameen kay qabeelay kay saaray khaandaanon ko rabb kay huzoor pesh kiya. matree kay khaandaan ko chuna gaya. yoon qur’a daaltay daaltay saaool bin qees ko chuna gaya. lekin jab saaool ko dhoonda gaya to vah ghaaib tha.

²²unhon nay rabb say darayaaft kiya, “kya saaool yahaan pahunch chuka hai?” rabb nay javaab diya, “vah saamaan kay beech men chhup gaya hai.” ²³kuchh log daud kar usay saamaan men say nikaal kar avaam kay paas lay aaay. jab vah logon men khada hua to itna lamba tha ki baaqee sab log sirf us kay kandhon tak aatay thay.

²⁴samooel nay kaha, “yah aadmee dekho jisay rabb nay chun liya hai. avaam men us jaisa koee naheen hai!” tamaam log khushee kay maaray “baadshaah zindaabaad!” ka naara lagaatay rahay. ²⁵samooel nay baadshaah kay huqooq tafseel say sunaaay. us nay sab kuchh kitaab men likh diya aur usay rabb kay maqdis men mahfooz rakha. phir us nay avaam ko rukhsat kar diya.

²⁶saaool bhee apnay ghar chala gaya jo jibia men tha. kuchh faujee us kay saath chalay jin kay dilon ko allaah nay chhoo diya tha. ²⁷lekin aisay shareer log bhee thay jinhon nay us ka mazaaq uda kar poochha, “bhala yah kis tarah hamen bacha sakta hai?” vah usay haqeer jaantay thay aur usay tuhfay pesh karnay kay liyay bhee tayyaar na huay. lekin saaool un kee baaten nazar’andaaz karkay khaamosh hee raha.