1 Samooel 11
saaool ammoniyon par fatah paata hai
1kuchh der kay baad ammonee baadshaah naahas nay apnee fauj lay kar yabees-jiliaad ka muhaasara kiya. yabees kay tamaam afraad nay us say guzaarish kee, “hamaaray saath muaahada karen to ham aainda aap kay taabay rahengay.” 2naahas nay javaab diya, “theek hai, lekin is shart par ki main har ek kee dahenee aankh nikaal kar tamaam israaeel kee beizzatee karoonga!” 3yabees kay buzurgon nay darakhwaast kee, “hamen ek haftay kee muhalat deejiay taaki ham apnay qaasidon ko israaeel kee har jagah bhejen. agar koee hamen bachaanay kay liyay na aaay to ham hathiyaar daal kar shaher ko aap kay havaalay kar dengay.”
4qaasid saaool kay shaher jibia bhee pahunch gaay. jab maqaamee logon nay un ka paighaam suna to poora shaher phoot phoot kar ronay laga. 5us vaqt saaool apnay bailon ko kheton say vaapas la raha tha. us nay poochha, “kya hua hai? log kyoon ro rahay hain?” usay qaasidon ka paighaam sunaaya gaya. 6tab saaool par allaah ka rooh naazil hua, aur usay sakht ghussa aaya. 7us nay bailon ka joda lay kar unhen tukday tukday kar diya. phir qaasidon ko yah tukday pakda kar us nay unhen yah paighaam day kar israaeel kee har jagah bhej diya, “jo saaool aur samooel kay peechhay chal kar ammoniyon say ladnay naheen jaaega us kay bail isee tarah tukday tukday kar diay jaaengay!”
yah khabar sun kar logon par rabb kee dahshat taaree ho gaee, aur sab kay sab ek dil ho kar ammoniyon say ladnay kay liyay niklay. 8bazaq kay qareeb saaool nay fauj ka jaaiza liya. yahoodaah kay 30,000 afraad thay aur baaqee qabeelon kay 3,00,000.
9unhon nay yabees-jiliaad kay qaasidon ko vaapas bhej kar bataaya, “kal dopaher say pahelay pahelay aap ko bacha liya jaaega.” vahaan kay baashinday yah khabar sun kar bahut khush huay. 10unhon nay ammoniyon ko ittila dee, “kal ham hathiyaar daal kar shaher kay darvaazay khol dengay. phir vah kuchh karen jo aap ko theek lagay.”
11aglay din subah-saveray saaool nay fauj ko teen hisson men taqseem kiya. sooraj kay tuloo honay say pahelay pahelay unhon nay teen simton say dushman kee lashkargaah par hamla kiya. dopaher tak unhon nay ammoniyon ko maar maar kar khatm kar diya. jo thoday bahut log bach gaay vah yoon tittar-bittar ho gaay ki do bhee ikatthay na rahay.
saaool kee dubaara tasdeeq
12fatah kay baad log samooel kay paas a kar kahenay lagay, “vah log kahaan hain jinhon nay etiraaz kiya ki saaool ham par hukoomat karay? unhen lay aaen taaki ham unhen maar den.” 13lekin saaool nay unhen rok diya. us nay kaha, “naheen, aaj to ham kisee bhee bhaaee ko saza-ay-maut naheen dengay, kyoonki is din rabb nay israaeel ko rihaaee bakhshee hai!” 14phir samooel nay elaan kiya, “aao, ham jiljaal ja kar dubaara is kee tasdeeq karen ki saaool hamaara baadshaah hai.” 15chunaanchay tamaam logon nay jiljaal ja kar rabb kay huzoor is kee tasdeeq kee ki saaool hamaara baadshaah hai. is kay baad unhon nay rabb kay huzoor salaamatee kee qurbaaniyaan pesh karkay bada jashn manaaya.