1 Samooel 12

samooel kee alavidaaee taqreer

¹tab samooel tamaam israaeel say mukhaatib hua, “main nay aap kee har baat maan kar aap par baadshaah muqarrar kiya hai. ²ab yahee aap kay aagay aagay chal kar aap kee raahanumaaee karega. main khud boodha hoon, aur meray baal safed ho gaay hain jabki meray betay aap kay darmiyaan hee rahetay hain. main javaanee say lay kar aaj tak aap kee raahanumaaee karta aaya hoon. ³ab main haazir hoon. agar mujh say koee ghaltee huee hai to rabb aur us kay masah kiay huay baadshaah kay saamnay is kee gavaahee den. kya main nay kisee ka bail ya gadha loot liya? kya main nay kisee say ghalat faaida uthaaya ya kisee par zulm kiya? kya main nay kabhee kisee say rishvat lay kar ghalat faisla kiya hai? agar aisa hua to mujhay bataaen! phir main sab kuchh vaapas kar doonga.”

⁴ijtima nay javaab diya, “na aap nay ham say ghalat faaida uthaaya, na ham par zulm kiya hai. aap nay kabhee bhee rishvat naheen lee.” ⁵samooel bola, “aaj rabb aur us ka masah kiya hua baadshaah gavaah hain ki aap ko mujh par ilzaam lagaanay ka koee sabab na mila.” avaam nay kaha, “jee, aisa hee hai.” ⁶samooel nay baat jaaree rakhee, “rabb khud moosa aur haaroon ko israaeel kay raahanuma bana kar aap kay baapdaada ko misr say nikaal laaya. ⁷ab yahaan rabb kay takht-ay-adaalat kay saamnay khaday ho jaaen to main aap ko un tamaam bhalaaiyon kee yaad dilaaoonga jo rabb nay aap aur aap kay baapdaada say kee hain.

⁸aap ka baap yaaqoob misr aaya. jab misree us kee aulaad ko dabaanay lagay to unhon nay cheekhtay chillaatay rabb say madad maangee. tab us nay moosa aur haaroon ko bhej diya taaki vah pooree qaum ko misr say nikaal kar yahaan is mulk men laaen. ⁹lekin jald hee vah rabb apnay khuda ko bhool gaay, is liyay us nay unhen dushman kay havaalay kar diya. kabhee hasoor shaher kay baadshaah ka kamaandar seesra un say lada, kabhee filistee aur kabhee moaab ka baadshaah. ¹⁰har dafa aap kay baapdaada nay cheekhtay chillaatay rabb say madad maangee aur iqraar kiya, ‘ham nay gunaah kiya hai, kyoonki ham nay rabb ko tark karkay baal aur astaaraat kay buton kee pooja kee hai. lekin ab hamen dushmanon say bacha! phir ham sirf teree hee khidmat karengay.’ ¹¹aur har baar rabb nay kisee na kisee ko bhej diya, kabhee jidaaoon, kabhee baraq, kabhee iftaah aur kabhee samooel ko. un aadmiyon kee maarifat allaah nay aap ko ird-gird kay tamaam dushmanon say bachaaya, aur mulk men amn-o-amaan qaaim ho gaya.

¹²lekin jab ammonee baadshaah naahas aap say ladnay aaya to aap meray paas a kar taqaaza karnay lagay ki hamaara apna baadshaah ho jo ham par hukoomat karay, haalaanki aap jaantay thay ki rabb hamaara khuda hamaara baadshaah hai. ¹³ab vah baadshaah dekhen jisay aap maang rahay thay! rabb nay aap kee khwaahish pooree karkay usay aap par muqarrar kiya hai. ¹⁴chunaanchay rabb ka khauf maanen, us kee khidmat karen aur us kee sunen. sarkash ho kar us kay ahkaam kee khilaafvarzee mat karna. agar aap aur aap ka baadshaah rabb say vafaadaar rahengay to vah aap kay saath hoga. ¹⁵lekin agar aap us kay taabay na rahen aur sarkash ho kar us kay ahkaam kee khilaafvarzee karen to vah aap kee mukhaalafat karega, jis tarah us nay aap kay baapdaada kee bhee mukhaalafat kee.

¹⁶ab khaday ho kar dekhen ki rabb kya karnay vaala hai. vah aap kee aankhon kay saamnay hee bada mojiza karega. ¹⁷is vaqt gandum kee kataaee ka mausam hai. go in dinon men baarish naheen hotee, lekin main dua karoonga to rabb garajtay baadal aur baarish bhejega. tab aap jaan lengay ki aap nay baadshaah ka taqaaza kartay huay rabb kay nazdeek kitnee buree baat kee hai.”

¹⁸samooel nay pukaar kar rabb say dua kee, aur us din rabb nay garajtay baadal aur baarish bhej dee. yah dekh kar ijtima sakht ghabra kar samooel aur rabb say darnay laga. ¹⁹sab nay samooel say iltimaas kee, “rabb apnay khuda say dua karkay hamaaree sifaarish karen taaki ham mar na jaaen. kyoonki baadshaah ka taqaaza karnay say ham nay apnay gunaahon men izaafa kiya hai.”

²⁰samooel nay logon ko tasallee day kar kaha, “mat daren. beshak aap say ghaltee huee hai, lekin aainda khayaal rakhen ki aap rabb say door na ho jaaen balki pooray dil say us kee khidmat karen. ²¹bemaanee buton kay peechhay mat padna. na vah faaiday ka baais hain, na aap ko bacha saktay hain. un kee koee haisiyat naheen hai. ²²rabb apnay azeem naam kee khaatir apnee qaum ko naheen chhodega, kyoonki us nay aap ko apnee qaum banaanay ka faisla kiya hai. ²³jahaan tak mera taalluq hai, main is men rabb ka gunaah naheen karoonga ki aap kee sifaarish karnay say baaz aaoon. aur aainda bhee main aap ko achchhay aur saheeh raastay kee taaleem deta rahoonga. ²⁴lekin dhyaan say rabb ka khauf maanen aur pooray dil aur vafaadaaree say us kee khidmat karen. yaad rahay ki us nay aap kay liyay kitnay azeem kaam kiay hain. ²⁵lekin agar aap ghalat kaam karnay par tulay rahen to aap apnay baadshaah samet duniya men say mit jaaengay.”