1 Samooel 6
ahd ka sandooq israaeel vaapas laaya jaata hai
1allaah ka sandooq ab saat maheenay filistiyon kay paas raha tha. 2aakhirkaar unhon nay apnay tamaam pujaariyon aur rammaalon ko bula kar un say mashvra kiya, “ab ham rabb kay sandooq ka kya karen? hamen bataaen ki isay kis tarah is kay apnay mulk men vaapas bhejen.”
3pujaariyon aur rammaalon nay javaab diya, “agar aap usay vaapas bhejen to vaisay mat bhejna balki qusoor kee qurbaanee saath bhejna. tab aap ko shifa milegee, aur aap jaan lengay ki vah aap ko saza denay say kyoon naheen baaz aaya.”
4filistiyon nay poochha, “ham usay kis qism kee qusoor kee qurbaanee bhejen?”
unhon nay javaab diya, “filistiyon kay paanch hukmaraan hain, is liyay sonay kay paanch phoday aur paanch choohay banvaaen, kyoonki aap sab is ek hee vaba kee zad men aaay huay hain, khwaah hukmaraan hon, khwaah r’aaya. 5sonay kay yah phoday aur mulk ko tabaah karnay vaalay choohay bana kar israaeel kay devta ka ehatiraam karen. shaayad vah yah dekh kar aap, aap kay devtaaon aur mulk ko saza denay say baaz aaay. 6aap kyoon puraanay zamaanay kay misriyon aur un kay baadshaah kee tarah ad jaaen? kyoonki us vaqt allaah nay misriyon ko itnee sakht museebat men daal diya ki aakhirkaar unhen israaeeliyon ko jaanay dena pada.
7ab bailgaadee bana kar us kay aagay do gaaen jooten. aisee gaaen hon jin kay doodh peenay vaalay bachchay hon aur jin par ab tak jooa na rakha gaya ho. gaaiyon ko bailgaadee kay aagay jooten, lekin un kay bachchon ko saath jaanay na den balki unhen kaheen band rakhen. 8phir rabb ka sandooq bailgaadee par rakha jaaay aur us kay saath ek thaila jis men sonay kee vah cheezen hon jo aap qusoor kee qurbaanee kay taur par bhej rahay hain. is kay baad gaaiyon ko khula chhod den. 9ghaur karen ki vah kaun sa raasta ikhtiyaar karengee. agar israaeel kay bait-shams kee taraf chalen to phir maaloom hoga ki rabb ham par yah badee museebat laaya hai. lekin agar vah kaheen aur chalen to matlab hoga ki israaeel kay devta nay hamen saza naheen dee balki sab kuchh ittifaaq say hua hai.”
10filistiyon nay aisa hee kiya. unhon nay do gaaen naee bailgaadee men joot kar un kay chhotay bachchon ko kaheen band rakha. 11phir unhon nay ahd ka sandooq us thailay samet jis men sonay kay choohay aur phoday thay bailgaadee par rakha.
12jab gaaiyon ko chhod diya gaya to vah dakraatee dakraatee seedhee bait-shams kay raastay par a gaeen aur na daaeen, na baaeen taraf hateen. filistiyon kay sardaar bait-shams kee sarhadd tak un kay peechhay chalay.
13us vaqt bait-shams kay baashinday neechay vaadee men gandum kee fasal kaat rahay thay. ahd ka sandooq dekh kar vah nihaayat khush huay. 14bailgaadee ek khet tak pahunchee jis ka maalik bait-shams ka rahenay vaala yashooa tha. vahaan vah ek baday patthar kay paas ruk gaee. logon nay bailgaadee kee lakdee tukday tukday karkay usay jala diya aur gaaiyon ko zabah karkay rabb ko bhasm honay vaalee qurbaanee kay taur par pesh kiya. 15laavee kay qabeelay kay kuchh mardon nay rabb kay sandooq ko bailgaadee say utha kar sonay kee cheezon kay thailay samet patthar par rakh diya. us din bait-shams kay logon nay rabb ko bhasm honay vaalee aur zabah kee qurbaaniyaan pesh keen.
16yah sab kuchh dekhnay kay baad filistee sardaar usee din aqroon vaapas chalay gaay. 17filistiyon nay apna qusoor door karnay kay liyay har ek shaher kay liyay sonay ka ek phoda bana liya tha yaanee ashdood, ghazza, asqaloon, jaat aur aqroon kay liyay ek ek phoda. 18is kay ilaava unhon nay har shaher aur us kay gird-o-navaah kee aabaadiyon kay liyay sonay ka ek ek chooha bana liya tha. jis baday patthar par ahd ka sandooq rakha gaya vah aaj tak yashooa bait-shamsee kay khet men is baat kee gavaahee deta hai.
ahd ka sandooq qiryat-yaareem men
19lekin rabb nay bait-shams kay baashindon ko saza dee, kyoonki un men say baaz nay ahd kay sandooq men nazar daalee thee. us vaqt 70 afraad halaak huay. rabb kee yah sakht saza dekh kar bait-shams kay log maatam karnay lagay. 20vah bolay, “kaun is muqaddas khuda kay huzoor qaaim rah sakta hai? yah hamaaray bas kee baat naheen, lekin ham rabb ka sandooq kis kay paas bhejen?” 21aakhir men unhon nay qiryat-yaareem kay baashindon ko paighaam bheja, “filistiyon nay rabb ka sandooq vaapas kar diya hai. ab aaen aur usay apnay paas lay jaaen!”