1 Samooel 7
1yah sun kar qiryat-yaareem kay mard aaay aur rabb ka sandooq apnay shaher men lay gaay. vahaan unhon nay usay abeendaab kay ghar men rakh diya jo pahaadee par tha. abeendaab kay betay ileeazar ko makhsoos kiya gaya taaki vah ahd kay sandooq kee paheraadaaree karay.
tauba kee vajah say israaeelee filistiyon par fatah paatay hain
2ahd ka sandooq 20 saal kay taveel arsay tak qiryat-yaareem men pada raha. is dauraan tamaam israaeel maatam karta raha, kyoonki lagta tha ki rabb nay unhen tark kar diya hai. 3phir samooel nay tamaam israaeeliyon say kaha, “agar aap vaaqaee rabb kay paas vaapas aana chaahatay hain to ajnabee maaboodon aur astaaraat devee kay but door kar den. pooray dil kay saath rabb kay taabay ho kar usee kee khidmat karen. phir hee vah aap ko filistiyon say bachaaega.”
4israaeeliyon nay us kee baat maan lee. vah baal aur astaaraat kay buton ko phaink kar sirf rabb kee khidmat karnay lagay. 5tab samooel nay elaan kiya, “pooray israaeel ko misfaah men jama karen to main vahaan rabb say dua karkay aap kee sifaarish karoonga.” 6chunaanchay vah sab misfaah men jama huay. tauba ka izhaar karkay unhon nay kuen say paanee nikaal kar rabb kay huzoor undel diya. saath saath unhon nay poora din roza rakha aur iqraar kiya, “ham nay rabb ka gunaah kiya hai.” vahaan misfaah men samooel nay israaeeliyon kay liyay kachaheree lagaaee.
7filistee hukmaraanon ko pata chala ki israaeelee misfaah men jama huay hain to vah un say ladnay kay liyay aaay. yah sun kar israaeelee sakht ghabra gae 8aur samooel say minnat kee, “dua kartay rahen! rabb hamaaray khuda say iltimaas karnay say na ruken taaki vah hamen filistiyon say bachaaay.” 9tab samooel nay bhed ka doodh peeta bachcha chun kar rabb ko bhasm honay vaalee qurbaanee kay taur par pesh kiya. saath saath vah rabb say iltimaas karta raha.
aur rabb nay us kee sunee. 10samooel abhee qurbaanee pesh kar raha tha ki filistee vahaan pahunch kar israaeeliyon par hamla karnay kay liyay tayyaar huay. lekin us din rabb nay zor say kadaktee huee aavaaz say filistiyon ko itna dahshatzada kar diya ki vah darham-barham ho gaay aur israaeelee aasaanee say unhen shikast day sakay. 11israaeeliyon nay misfaah say nikal kar bait-kaar kay neechay tak dushman ka taaqqub kiya. raastay men bahut say filistee halaak huay.
12is fatah kee yaad men samooel nay misfaah aur shen kay darmiyaan ek bada patthar nasab kar diya. us nay patthar ka naam aban-azar yaanee ‘madad ka patthar’ rakha. kyoonki us nay kaha, “yahaan tak rabb nay hamaaree madad kee hai.” 13is tarah filistiyon ko maghloob kiya gaya, aur vah dubaara israaeel kay ilaaqay men na ghusay. jab tak samooel jeeta raha filistiyon par rabb ka sakht dabaao raha. 14aur aqroon say lay kar jaat tak jitnee israaeelee aabaadiyaan filistiyon kay haath men a gaee theen vah sab un kee zameenon samet dubaara israaeel kay qabzay men a gaeen. amoriyon kay saath bhee sulah ho gaee.
15samooel apnay jeetay jee israaeel ka qaazee aur raahanuma raha. 16har saal vah bait-el, jiljaal aur misfaah ka daura karta, kyoonki in teen jagahon par vah israaeeliyon kay liyay kachaheree lagaaya karta tha. 17is kay baad vah dubaara raama apnay ghar vaapas a jaata jahaan mustaqil kachaheree thee. vahaan us nay rabb kay liyay qurbaangaah bhee banaaee thee.