1 Samooel 8
israaeel baadshaah ka taqaaza karta hai
1jab samooel boodha hua to us nay apnay do beton ko israaeel kay qaazee muqarrar kiya. 2baday ka naam yoel tha aur chhotay ka abiyaah. donon bair-saba men logon kee kachaheree lagaatay thay. 3lekin vah baap kay namoonay par naheen chaltay balki rishvat kha kar ghalat faislay kartay thay.
4phir israaeel kay buzurg mil kar samooel kay paas aaay, jo raama men tha. 5unhon nay kaha, “dekhen, aap boodhay ho gaay hain aur aap kay betay aap kay namoonay par naheen chaltay. ab ham par baadshaah muqarrar karen taaki vah hamaaree us tarah raahanumaaee karay jis tarah deegar aqvaam men dastoor hai.”
6jab buzurgon nay raahanumaaee kay liyay baadshaah ka taqaaza kiya to samooel nihaayat naakhush hua. chunaanchay us nay rabb say hidaayat maangee. 7rabb nay javaab diya, “jo kuchh bhee vah tujh say maangtay hain unhen day day. is say vah tujhay radd naheen kar rahay balki mujhay, kyoonki vah naheen chaahatay ki main un ka baadshaah rahoon. 8jab say main unhen misr say nikaal laaya vah mujhay chhod kar deegar maaboodon kee khidmat kartay aaay hain. aur ab vah tujh say bhee yahee sulook kar rahay hain. 9un kee baat maan lay, lekin sanjeedgee say unhen un par hukoomat karnay vaalay baadshaah kay huqooq say aagaah kar.”
baadshaah kay huqooq
10samooel nay baadshaah ka taqaaza karnay vaalon ko sab kuchh kah sunaaya jo rabb nay usay bataaya tha. 11vah bola, “jo baadshaah aap par hukoomat karega us kay yah huqooq hongay : vah aap kay beton kee bhartee karkay unhen apnay rathon aur ghodon ko sambhaalnay kee zimmaadaaree dega. unhen us kay rathon kay aagay aagay daudna padega. 12kuchh us kee fauj kay janral aur kaptaan banengay, kuchh us kay kheton men hal chalaanay aur faslen kaatnay par majboor ho jaaengay, aur baaz ko us kay hathiyaar aur rath ka saamaan banaana padega. 13baadshaah aap kee betiyon ko aap say chheen lega taaki vah us kay liyay khaana pakaaen, rotee banaaen aur khushboo tayyaar karen. 14vah aap kay kheton aur aap kay angoor aur zaitoon kay baaghon ka behtareen hissa chun kar apnay mulaazimon ko day dega. 15baadshaah aap kay anaaj aur angoor ka dasvaan hissa lay kar apnay afsaron aur mulaazimon ko day dega. 16aap kay naukar-naukraaniyaan, aap kay motay-taazay bail aur gadhay usee kay istemaal men aaengay. 17vah aap kee bhed-bakriyon ka dasvaan hissa talab karega, aur aap khud us kay ghulaam hongay.
18tab aap pachhta kar kahengay, ‘ham nay baadshaah ka taqaaza kyoon kiya?’ lekin jab aap rabb kay huzoor cheekhtay chillaatay madad chaahengay to vah aap kee naheen sunega.”
19lekin logon nay samooel kee baat na maanee balki kaha, “naheen, to bhee ham baadshaah chaahatay hain, 20kyoonki phir hee ham deegar qaumon kee maanind hongay. phir hamaara baadshaah hamaaree raahanumaaee karega aur jang men hamaaray aagay aagay chal kar dushman say ladega.” 21samooel nay rabb kay huzoor yah baaten duharaaeen. 22rabb nay javaab diya, “un ka taqaaza poora kar, un par baadshaah muqarrar kar!”
phir samooel nay israaeel kay mardon say kaha, “har ek apnay apnay shaher vaapas chala jaaay.”