1 Samooel 9
saaool baap kee gadhiyaan talaash karta hai
1binyameen kay qabaailee ilaaqay men ek binymeenee banaam qees raheta tha jis ka achchha-khaasa asar-o-rasookh tha. baap ka naam abeeel bin saror bin bakorat bin afeekh tha. 2qees ka beta saaool javaan aur khoobsoorat tha balki israaeel men koee aur itna khoobsoorat naheen tha. saath saath vah itna lamba tha ki baaqee sab log sirf us kay kandhon tak aatay thay.
3ek din saaool kay baap qees kee gadhiyaan gum ho gaeen. yah dekh kar us nay apnay betay saaool ko hukm diya, “naukar ko apnay saath lay kar gadhiyon ko dhoond laaen.” 4donon aadmee ifraaeem kay pahaadee ilaaqay aur saleesa kay ilaaqay men say guzray, lekin besood. phir unhon nay saaleem kay ilaaqay men khoj lagaaya, lekin vahaan bhee gadhiyaan na mileen. is kay baad vah binyameen kay ilaaqay men ghoomtay phiray, lekin befaaida. 5chaltay chaltay vah soof kay qareeb pahunch gaay. saaool nay naukar say kaha, “aao, ham ghar vaapas chalen, aisa na ho ki vaalid gadhiyon kee naheen balki hamaaree fikr karen.”
6lekin naukar nay kaha, “is shaher men ek mard-ay-khuda hai. log us kee badee izzat kartay hain, kyoonki jo kuchh bhee vah kaheta hai vah poora ho jaata hai. kyoon na ham us kay paas jaaen? shaayad vah hamen bataaay ki gadhiyon ko kahaan dhoondna chaahiay.”
7saaool nay poochha, “lekin ham usay kya den? hamaara khaana khatm ho gaya hai, aur hamaaray paas us kay liyay tuhfa naheen hai.”
8naukar nay javaab diya, “koee baat naheen, meray paas chaandee ka chhota sikkaa [a] lafzee tarjuma : chaandee kay sikkay kee ek chauthaaee hai. yah main mard-ay-khuda ko day doonga taaki bataaay ki ham kis taraf dhoonden.”
9-11 saaool nay kaha, “theek hai, chalen.” vah shaher kee taraf chal paday taaki mard-ay-khuda say baat karen. jab pahaadee dhalaan par shaher kee taraf chadh rahay thay to kuchh ladkiyaan paanee bharnay kay liyay nikleen. aadmiyon nay un say poochha, “kya ghaibbeen shaher men hai?” (puraanay zamaanay men nabee ghaibbeen kahelaata tha. agar koee allaah say kuchh maaloom karna chaahata to kaheta, “aao, ham ghaibbeen kay paas chalen.”)
12-13 ladkiyon nay javaab diya, “jee, vah abhee abhee pahuncha hai, kyoonki shaher kay log aaj pahaadee par qurbaaniyaan chadha kar eed mana rahay hain. agar jaldee karen to pahaadee par chadhnay say pahelay us say mulaaqaat ho jaaegee. us vaqt tak ziyaafat shuroo naheen hogee jab tak ghaibbeen pahunch na jaaay. kyoonki usay pahelay khaanay ko barkat dena hai, phir hee mehamaanon ko khaana khaanay kee ijaazat hai. ab jaaen, kyoonki isee vaqt aap us say baat kar saktay hain.”
14chunaanchay saaool aur naukar shaher kee taraf badhay. shaher kay darvaazay par hee samooel say mulaaqaat ho gaee jo vahaan say nikal kar qurbaangaah kee pahaadee par chadhnay ko tha.
samooel saaool kee mehamaan-navaazee karta hai
15rabb samooel ko ek din pahelay paighaam day chuka tha, 16“kal main isee vaqt mulq-ay-binyameen ka ek aadmee teray paas bhej doonga. usay masah karkay meree qaum israaeel par baadshaah muqarrar kar. vah meree qaum ko filistiyon say bachaaega. kyoonki main nay apnee qaum kee museebat par dhyaan diya hai, aur madad kay liyay us kee cheekhen mujh tak pahunch gaee hain.” 17ab jab samooel nay shaher kay darvaazay say nikaltay huay saaool ko dekha to rabb samooel say hamkalaam hua, “dekh, yahee vah aadmee hai jis ka zikr main nay kal kiya tha. yahee meree qaum par hukoomat karega.”
18vaheen shaher kay darvaazay par saaool samooel say mukhaatib hua, “meharbaanee karkay mujhay bataaiay ki ghaibbeen ka ghar kahaan hai?” 19samooel nay javaab diya, “main hee ghaibbeen hoon. aaen, us pahaadee par chalen jis par ziyaafat ho rahee hai, kyoonki aaj aap meray mehamaan hain. kal main subah-saveray aap ko aap kay dil kee baat bata doonga. 20jahaan tak teen din say gumshuda gadhiyon ka taalluq hai, un kee fikr na karen. vah to mil gaee hain. vaisay aap aur aap kay baap kay gharaanay ko israaeel kee har qeemtee cheez haasil hai.” 21saaool nay poochha, “yah kis tarah? main to israaeel kay sab say chhotay qabeelay binyameen ka hoon, aur mera khaandaan qabeelay men sab say chhota hai.”
22samooel saaool ko naukar samet us haal men lay gaya jis men ziyaafat ho rahee thee. taqreeban 30 mehamaan thay, lekin samooel nay donon aadmiyon ko sab say izzat vaalee kursiyon par bitha diya. 23khaansaamay ko us nay hukm diya, “ab gosht ka vah tukda lay aao jo main nay tumhen day kar kaha tha ki usay alag rakhna hai.” 24khaansaamay nay qurbaanee kee raan la kar usay saaool kay saamnay rakh diya. samooel bola, “yah aap kay liyay mahfooz rakha gaya hai. ab khaaen, kyoonki doosron ko daavat detay vaqt main nay yah gosht aap kay liyay aur is mauqay kay liyay alag kar liya tha.” chunaanchay saaool nay us din samooel kay saath khaana khaaya.
25ziyaafat kay baad vah pahaadee say utar kar shaher vaapas aaay, aur samooel apnay ghar kee chhat par saaool say baatcheet karnay laga. 26aglay din jab pau phatnay lagee to samooel nay neechay say saaool ko jo chhat par so raha tha aavaaz dee, “uthen! main aap ko rukhsat karoon.” saaool jaag utha aur vah mil kar ravaana huay. 27jab vah shaher kay kinaaray par pahunchay to samooel nay saaool say kaha, “apnay naukar ko aagay bhejen.” jab naukar chala gaya to samooel bola, “thaher jaaen, kyoonki mujhay aap ko allaah ka ek paighaam sunaana hai.”