1 Samūel 10

sāūl ko masah kiyā jātā hai

¹phir samūel ne kuppī le kar sāūl ke sar par zaitūn kā tel uṅḍel diyā aur use bosā de kar kahā, “rabb ne āp ko apnī ḵẖās milkiyat par rāhanumā muqarrar kiyā hai. ²mere pās se chale jāne ke bād jab āp binyamīn kī sarhadd ke shahar zilzaḵẖ ke qarīb rāḵẖil kī qabr ke pās se guzareṅge to āp kī mulāqāt do ādmiyoṅ se hogī. vah āp se kaheṅge, ‘jo gadhiyāṅ āp ḍhūṅḍne gae vah mil gaī haiṅ. aur ab āp ke bāp gadhiyoṅ kī nahīṅ balki āp kī fikr kar rahe haiṅ. vah kah rahe haiṅ ki maiṅ kis tarah apne beṭe kā patā karūṅ?’

³āp āge jā kar tabūr ke balūt ke daraḵẖt ke pās pahuṅcheṅge. vahāṅ tīn ādmī āp se mileṅge jo allāh kī ibādat karne ke liye bait-el jā rahe hoṅge. ek ke pās tīn chhoṭī bakriyāṅ, dūsre ke pās tīn roṭiyāṅ aur tīsre ke pās mai kī mashk hogī. ⁴vah āp ko salām kah kar do roṭiyāṅ deṅge. un kī yah roṭiyāṅ qabūl kareṅ.

⁵is ke bād āp allāh ke jibiā jāeṅge jahāṅ filistiyoṅ kī chaukī hai. shahar meṅ dāḵẖil hote vaqt āp kī mulāqāt nabiyoṅ ke ek julūs se hogī jo us vaqt pahāṛī kī qurbāngāh se utar rahā hogā. un ke āge āge sitār, daf, bāṅsariyāṅ aur sarod bajāne vāle chaleṅge, aur vah nubuvvat kī hālat meṅ hoṅge. ⁶rabb kā rūh āp par bhī nāzil hogā, aur āp un ke sāth nubuvvat kareṅge. us vaqt āp farq shaḵẖs meṅ tabdīl ho jāeṅge.

⁷jab yah tamām nishān vujūd meṅ āeṅge to vah kuchh kareṅ jo āp ke zahan meṅ ā jāe, kyūṅki allāh āp ke sāth hogā. ⁸phir mere āge jiljāl chale jāeṅ. maiṅ bhī āūṅgā aur vahāṅ bhasm hone vālī aur salāmatī kī qurbāniyāṅ pesh karūṅgā. lekin āp ko sāt din merā intizār karnā hai. phir maiṅ ā kar āp ko batā dūṅgā ki āge kyā karnā hai.”

⁹sāūl ravānā hone ke liye samūel ke pās se muṛā to allāh ne us kā dil tabdīl kar diyā. jin bhī nishānoṅ kī peshgoī samūel ne kī thī vah usī din pūrī huī. ¹⁰jab sāūl aur us kā naukar jibiā pahuṅche to vahāṅ un kī mulāqāt mazkūrā nabiyoṅ ke julūs se huī. allāh kā rūh sāūl par nāzil huā, aur vah un ke darmiyān nubuvvat karne lagā. ¹¹kuchh log vahāṅ the jo bachpan se us se vāqif the. sāūl ko yūṅ nabiyoṅ ke darmiyān nubuvvat karte hue dekh kar vah āpas meṅ kahane lage, “qīs ke beṭe ke sāth kyā huā? kyā sāūl ko bhī nabiyoṅ meṅ shumār kiyā jātā hai?” ¹²ek maqāmī ādmī ne javāb diyā, “kaun in kā bāp hai?” bād meṅ yah muhāvarā ban gayā, “kyā sāūl ko bhī nabiyoṅ meṅ shumār kiyā jātā hai?”

¹³nubuvvat karne ke iḵẖtitām par sāūl pahāṛī par chaṛh gayā jahāṅ qurbāngāh thī. ¹⁴jab sāūl naukar samet vahāṅ pahuṅchā to us ke chachā ne pūchhā, “āp kahāṅ the?” sāūl ne javāb diyā, “ham gumshudā gadhiyoṅ ko ḍhūṅḍne ke liye nikle the. lekin jab vah na milīṅ to ham samūel ke pās gae.” ¹⁵chachā bolā, “acchhā? us ne āp ko kyā batāyā?” ¹⁶sāūl ne javāb diyā, “ḵẖair, us ne kahā ki gadhiyāṅ mil gaī haiṅ.” lekin jo kuchh samūel ne bādshāh banne ke bāre meṅ batāyā thā us kā zikr us ne na kiyā.

sāūl bādshāh ban jātā hai

¹⁷kuchh der ke bād samūel ne avām ko bulā kar misfāh meṅ rabb ke huzūr jamā kiyā. ¹⁸us ne kahā, “rabb isrāīl kā ḵẖudā farmātā hai, ‘maiṅ isrāīl ko misr se nikāl lāyā. maiṅ ne tumheṅ misriyoṅ aur un tamām saltanatoṅ se bachāyā jo tum par zulm kar rahī thīṅ. ¹⁹lekin go maiṅ ne tumheṅ tumhārī tamām musībatoṅ aur taṅgiyoṅ se chhuṭkārā diyā to bhī tum ne apne ḵẖudā ko mustarad kar diyā. kyūṅki tum ne isrār kiyā ki ham par bādshāh muqarrar karo! ab apne apne qabīloṅ aur ḵẖāndānoṅ kī tartīb ke mutābiq rabb ke huzūr khaṛe ho jāo’.”

²⁰yah kah kar samūel ne tamām qabīloṅ ko rabb ke huzūr pesh kiyā. qur’ā ḍālā gayā to binyamīn ke qabīle ko chunā gayā. ²¹phir samūel ne binyamīn ke qabīle ke sāre ḵẖāndānoṅ ko rabb ke huzūr pesh kiyā. matrī ke ḵẖāndān ko chunā gayā. yūṅ qur’ā ḍālte ḍālte sāūl bin qīs ko chunā gayā. lekin jab sāūl ko ḍhūṅḍā gayā to vah ġāib thā.

²²unhoṅ ne rabb se darayāft kiyā, “kyā sāūl yahāṅ pahuṅch chukā hai?” rabb ne javāb diyā, “vah sāmān ke bīch meṅ chhup gayā hai.” ²³kuchh log dauṛ kar use sāmān meṅ se nikāl kar avām ke pās le āe. jab vah logoṅ meṅ khaṛā huā to itnā lambā thā ki bāqī sab log sirf us ke kaṅdhoṅ tak āte the.

²⁴samūel ne kahā, “yah ādmī dekho jise rabb ne chun liyā hai. avām meṅ us jaisā koī nahīṅ hai!” tamām log ḵẖushī ke māre “bādshāh zindābād!” kā nārā lagāte rahe. ²⁵samūel ne bādshāh ke huqūq tafsīl se sunāe. us ne sab kuchh kitāb meṅ likh diyā aur use rabb ke maqdis meṅ mahfūz rakhā. phir us ne avām ko ruḵẖsat kar diyā.

²⁶sāūl bhī apne ghar chalā gayā jo jibiā meṅ thā. kuchh faujī us ke sāth chale jin ke diloṅ ko allāh ne chhū diyā thā. ²⁷lekin aise sharīr log bhī the jinhoṅ ne us kā mazāq uṛā kar pūchhā, “bhalā yah kis tarah hameṅ bachā saktā hai?” vah use haqīr jānte the aur use tuhfe pesh karne ke liye bhī tayyār na hue. lekin sāūl un kī bāteṅ nazar’andāz karke ḵẖāmosh hī rahā.