1 Samūel 11
sāūl ammoniyoṅ par fatah pātā hai
1kuchh der ke bād ammonī bādshāh nāhas ne apnī fauj le kar yabīs-jiliād kā muhāsarā kiyā. yabīs ke tamām afrād ne us se guzārish kī, “hamāre sāth muāhadā kareṅ to ham āindā āp ke tābe raheṅge.” 2nāhas ne javāb diyā, “ṭhīk hai, lekin is shart par ki maiṅ har ek kī dahanī āṅkh nikāl kar tamām isrāīl kī beizzatī karūṅgā!” 3yabīs ke buzurgoṅ ne daraḵẖwāst kī, “hameṅ ek hafte kī muhalat dījie tāki ham apne qāsidoṅ ko isrāīl kī har jagah bhejeṅ. agar koī hameṅ bachāne ke liye na āe to ham hathiyār ḍāl kar shahar ko āp ke havāle kar deṅge.”
4qāsid sāūl ke shahar jibiā bhī pahuṅch gae. jab maqāmī logoṅ ne un kā paiġām sunā to pūrā shahar phūṭ phūṭ kar rone lagā. 5us vaqt sāūl apne bailoṅ ko khetoṅ se vāpas lā rahā thā. us ne pūchhā, “kyā huā hai? log kyūṅ ro rahe haiṅ?” use qāsidoṅ kā paiġām sunāyā gayā. 6tab sāūl par allāh kā rūh nāzil huā, aur use saḵẖt ġussā āyā. 7us ne bailoṅ kā joṛā le kar unheṅ ṭukṛe ṭukṛe kar diyā. phir qāsidoṅ ko yah ṭukṛe pakṛā kar us ne unheṅ yah paiġām de kar isrāīl kī har jagah bhej diyā, “jo sāūl aur samūel ke pīchhe chal kar ammoniyoṅ se laṛne nahīṅ jāegā us ke bail isī tarah ṭukṛe ṭukṛe kar die jāeṅge!”
yah ḵẖabar sun kar logoṅ par rabb kī dahshat tārī ho gaī, aur sab ke sab ek dil ho kar ammoniyoṅ se laṛne ke liye nikle. 8bazaq ke qarīb sāūl ne fauj kā jāizā liyā. yahūdāh ke 30,000 afrād the aur bāqī qabīloṅ ke 3,00,000.
9unhoṅ ne yabīs-jiliād ke qāsidoṅ ko vāpas bhej kar batāyā, “kal dopahar se pahale pahale āp ko bachā liyā jāegā.” vahāṅ ke bāshinde yah ḵẖabar sun kar bahut ḵẖush hue. 10unhoṅ ne ammoniyoṅ ko ittilā dī, “kal ham hathiyār ḍāl kar shahar ke darvāze khol deṅge. phir vah kuchh kareṅ jo āp ko ṭhīk lage.”
11agle din subah-savere sāūl ne fauj ko tīn hissoṅ meṅ taqsīm kiyā. sūraj ke tulū hone se pahale pahale unhoṅ ne tīn simtoṅ se dushman kī lashkargāh par hamlā kiyā. dopahar tak unhoṅ ne ammoniyoṅ ko mār mār kar ḵẖatm kar diyā. jo thoṛe bahut log bach gae vah yūṅ tittar-bittar ho gae ki do bhī ikaṭṭhe na rahe.
sāūl kī dubārā tasdīq
12fatah ke bād log samūel ke pās ā kar kahane lage, “vah log kahāṅ haiṅ jinhoṅ ne etirāz kiyā ki sāūl ham par hukūmat kare? unheṅ le āeṅ tāki ham unheṅ mār deṅ.” 13lekin sāūl ne unheṅ rok diyā. us ne kahā, “nahīṅ, āj to ham kisī bhī bhāī ko sazā-e-maut nahīṅ deṅge, kyūṅki is din rabb ne isrāīl ko rihāī baḵẖshī hai!” 14phir samūel ne elān kiyā, “āo, ham jiljāl jā kar dubārā is kī tasdīq kareṅ ki sāūl hamārā bādshāh hai.” 15chunāṅche tamām logoṅ ne jiljāl jā kar rabb ke huzūr is kī tasdīq kī ki sāūl hamārā bādshāh hai. is ke bād unhoṅ ne rabb ke huzūr salāmatī kī qurbāniyāṅ pesh karke baṛā jashn manāyā.