1 Samūel 12

samūel kī alavidāī taqrīr

¹tab samūel tamām isrāīl se muḵẖātib huā, “maiṅ ne āp kī har bāt mān kar āp par bādshāh muqarrar kiyā hai. ²ab yahī āp ke āge āge chal kar āp kī rāhanumāī karegā. maiṅ ḵẖud būṛhā hūṅ, aur mere bāl safed ho gae haiṅ jabki mere beṭe āp ke darmiyān hī rahate haiṅ. maiṅ javānī se le kar āj tak āp kī rāhanumāī kartā āyā hūṅ. ³ab maiṅ hāzir hūṅ. agar mujh se koī ġaltī huī hai to rabb aur us ke masah kie hue bādshāh ke sāmne is kī gavāhī deṅ. kyā maiṅ ne kisī kā bail yā gadhā lūṭ liyā? kyā maiṅ ne kisī se ġalat fāidā uṭhāyā yā kisī par zulm kiyā? kyā maiṅ ne kabhī kisī se rishvat le kar ġalat faislā kiyā hai? agar aisā huā to mujhe batāeṅ! phir maiṅ sab kuchh vāpas kar dūṅgā.”

⁴ijtimā ne javāb diyā, “na āp ne ham se ġalat fāidā uṭhāyā, na ham par zulm kiyā hai. āp ne kabhī bhī rishvat nahīṅ lī.” ⁵samūel bolā, “āj rabb aur us kā masah kiyā huā bādshāh gavāh haiṅ ki āp ko mujh par ilzām lagāne kā koī sabab na milā.” avām ne kahā, “jī, aisā hī hai.” ⁶samūel ne bāt jārī rakhī, “rabb ḵẖud mūsā aur hārūn ko isrāīl ke rāhanumā banā kar āp ke bāpdādā ko misr se nikāl lāyā. ⁷ab yahāṅ rabb ke taḵẖt-e-adālat ke sāmne khaṛe ho jāeṅ to maiṅ āp ko un tamām bhalāiyoṅ kī yād dilāūṅgā jo rabb ne āp aur āp ke bāpdādā se kī haiṅ.

⁸āp kā bāp yāqūb misr āyā. jab misrī us kī aulād ko dabāne lage to unhoṅ ne chīḵẖte chillāte rabb se madad māṅgī. tab us ne mūsā aur hārūn ko bhej diyā tāki vah pūrī qaum ko misr se nikāl kar yahāṅ is mulk meṅ lāeṅ. ⁹lekin jald hī vah rabb apne ḵẖudā ko bhūl gae, is liye us ne unheṅ dushman ke havāle kar diyā. kabhī hasūr shahar ke bādshāh kā kamāṅḍar sīsrā un se laṛā, kabhī filistī aur kabhī moāb kā bādshāh. ¹⁰har dafā āp ke bāpdādā ne chīḵẖte chillāte rabb se madad māṅgī aur iqrār kiyā, ‘ham ne gunāh kiyā hai, kyūṅki ham ne rabb ko tark karke bāl aur astārāt ke butoṅ kī pūjā kī hai. lekin ab hameṅ dushmanoṅ se bachā! phir ham sirf terī hī ḵẖidmat kareṅge.’ ¹¹aur har bār rabb ne kisī na kisī ko bhej diyā, kabhī jidāūn, kabhī baraq, kabhī iftāh aur kabhī samūel ko. un ādmiyoṅ kī mārifat allāh ne āp ko ird-gird ke tamām dushmanoṅ se bachāyā, aur mulk meṅ amn-o-amān qāim ho gayā.

¹²lekin jab ammonī bādshāh nāhas āp se laṛne āyā to āp mere pās ā kar taqāzā karne lage ki hamārā apnā bādshāh ho jo ham par hukūmat kare, hālāṅki āp jānte the ki rabb hamārā ḵẖudā hamārā bādshāh hai. ¹³ab vah bādshāh dekheṅ jise āp māṅg rahe the! rabb ne āp kī ḵẖwāhish pūrī karke use āp par muqarrar kiyā hai. ¹⁴chunāṅche rabb kā ḵẖauf māneṅ, us kī ḵẖidmat kareṅ aur us kī suneṅ. sarkash ho kar us ke ahkām kī ḵẖilāfvarzī mat karnā. agar āp aur āp kā bādshāh rabb se vafādār raheṅge to vah āp ke sāth hogā. ¹⁵lekin agar āp us ke tābe na raheṅ aur sarkash ho kar us ke ahkām kī ḵẖilāfvarzī kareṅ to vah āp kī muḵẖālafat karegā, jis tarah us ne āp ke bāpdādā kī bhī muḵẖālafat kī.

¹⁶ab khaṛe ho kar dekheṅ ki rabb kyā karne vālā hai. vah āp kī āṅkhoṅ ke sāmne hī baṛā mojizā karegā. ¹⁷is vaqt gandum kī kaṭāī kā mausam hai. go in dinoṅ meṅ bārish nahīṅ hotī, lekin maiṅ duā karūṅgā to rabb garajte bādal aur bārish bhejegā. tab āp jān leṅge ki āp ne bādshāh kā taqāzā karte hue rabb ke nazdīk kitnī burī bāt kī hai.”

¹⁸samūel ne pukār kar rabb se duā kī, aur us din rabb ne garajte bādal aur bārish bhej dī. yah dekh kar ijtimā saḵẖt ghabrā kar samūel aur rabb se ḍarne lagā. ¹⁹sab ne samūel se iltimās kī, “rabb apne ḵẖudā se duā karke hamārī sifārish kareṅ tāki ham mar na jāeṅ. kyūṅki bādshāh kā taqāzā karne se ham ne apne gunāhoṅ meṅ izāfā kiyā hai.”

²⁰samūel ne logoṅ ko tasallī de kar kahā, “mat ḍareṅ. beshak āp se ġaltī huī hai, lekin āindā ḵẖayāl rakheṅ ki āp rabb se dūr na ho jāeṅ balki pūre dil se us kī ḵẖidmat kareṅ. ²¹bemānī butoṅ ke pīchhe mat paṛnā. na vah fāide kā bāis haiṅ, na āp ko bachā sakte haiṅ. un kī koī haisiyat nahīṅ hai. ²²rabb apne azīm nām kī ḵẖātir apnī qaum ko nahīṅ chhoṛegā, kyūṅki us ne āp ko apnī qaum banāne kā faislā kiyā hai. ²³jahāṅ tak merā tālluq hai, maiṅ is meṅ rabb kā gunāh nahīṅ karūṅgā ki āp kī sifārish karne se bāz āūṅ. aur āindā bhī maiṅ āp ko acchhe aur sahīh rāste kī tālīm detā rahūṅgā. ²⁴lekin dhyān se rabb kā ḵẖauf māneṅ aur pūre dil aur vafādārī se us kī ḵẖidmat kareṅ. yād rahe ki us ne āp ke liye kitne azīm kām kie haiṅ. ²⁵lekin agar āp ġalat kām karne par tule raheṅ to āp apne bādshāh samet duniyā meṅ se miṭ jāeṅge.”