1 Samūel 13

filistiyoṅ se jaṅg

¹sāūl 30 sāl kā thā jab taḵẖtnashīn huā. do sāl hukūmat karne ke bād ²us ne apnī fauj ke liye 3,000 isrāīlī chun liye. jaṅg laṛne ke qābil bāqī ādmiyoṅ ko us ne fāriġ kar diyā. 2,000 faujiyoṅ kī ḍyūṭī mikmās aur bait-el ke pahāṛī ilāqe meṅ lagāī gaī jahāṅ sāūl ḵẖud thā. bāqī 1,000 afrād yūntan ke pās binyamīn ke shahar jibiā meṅ the.

³ek din yūntan ne jibiā kī filistī chaukī par hamlā karke use shikast dī. jald hī yah ḵẖabar dūsre filistiyoṅ tak pahuṅch gaī. sāūl ne mulk ke kone kone meṅ qāsid bhej die, aur vah narsiṅgā bajāte bajāte logoṅ ko yūntan kī fatah sunāte gae. ⁴tamām isrāīl meṅ ḵẖabar phail gaī, “sāūl ne jibiā kī filistī chaukī ko tabāh kar diyā hai, aur ab isrāīl filistiyoṅ kī ḵẖās nafrat kā nishānā ban gayā hai.” sāūl ne tamām mardoṅ ko filistiyoṅ se laṛne ke liye jiljāl meṅ bulāyā.

⁵filistī bhī isrāīliyoṅ se laṛne ke liye jamā hue. un ke 30,000 rath, 6,000 ghuṛsavār aur sāhil kī ret jaise beshumār piyādā faujī the. unhoṅ ne bait-āvan ke mashriq meṅ mikmās ke qarīb apne ḵẖaime lagāe. ⁶isrāīliyoṅ ne dekhā ki ham baṛe ḵẖatre meṅ ā gae haiṅ, aur dushman ham par bahut dabāo ḍāl rahā hai to pareshānī ke ālam meṅ kuchh ġāroṅ aur darāṛoṅ meṅ aur kuchh pattharoṅ ke darmiyān yā qabroṅ aur hauzoṅ meṅ chhup gae. ⁷kuchh itne ḍar gae ki vah daryā-e-yardan ko pār karke jad aur jiliād ke ilāqe meṅ chale gae.

sāūl kī besabrī

sāūl ab tak jiljāl meṅ thā, lekin jo ādmī us ke sāth rahe the vah ḵẖauf ke māre tharathrā rahe the. ⁸samūel ne sāūl ko hidāyat dī thī ki sāt din merā intizār kareṅ. lekin sāt din guzar gae, aur samūel na āyā. sāūl ke faujī muntashir hone lage ⁹to sāūl ne hukm diyā, “bhasm hone vālī aur salāmatī kī qurbāniyāṅ le āo.” phir us ne ḵẖud qurbāniyāṅ pesh kīṅ.

¹⁰vah abhī is kām se fāriġ hī huā thā ki samūel pahuṅch gayā. sāūl use ḵẖush’āmadīd kahane ke liye niklā. ¹¹lekin samūel ne pūchhā, “āp ne kyā kiyā?”

sāūl ne javāb diyā, “log muntashir ho rahe the, aur āp vaqt par na āe. jab maiṅ ne dekhā ki filistī mikmās ke qarīb jamā ho rahe haiṅ ¹²to maiṅ ne sochā, ‘filistī yahāṅ jiljāl meṅ ā kar mujh par hamlā karne ko haiṅ, hālāṅki maiṅ ne abhī rabb se duā nahīṅ kī ki vah ham par meharbānī kare.’ is liye maiṅ ne jur’at karke ḵẖud qurbāniyāṅ pesh kīṅ.”

¹³samūel bolā, “yah kaisī ahamaqānā harkat thī! āp ne rabb apne ḵẖudā kā hukm na mānā. rabb to āp aur āp kī aulād ko hameshā ke liye isrāīl par muqarrar karnā chāhatā thā. ¹⁴lekin ab āp kī bādashāhat qāim nahīṅ rahegī. chūṅki āp ne us kī na sunī is liye rabb ne kisī aur ko chun kar apnī qaum kā rāhanumā muqarrar kiyā hai, ek aise ādmī ko jo us kī soch rakhegā.”

¹⁵phir samūel jiljāl se chalā gayā.

jaṅg kī tayyāriyāṅ

bache hue isrāīlī sāūl ke pīchhe dushman se laṛne gae. vah jiljāl se ravānā ho kar jibiā pahuṅch gae. jab sāūl ne vahāṅ fauj kā jāizā liyā to bas 600 afrād rah gae the. ¹⁶sāūl, yūntan aur un kī fauj binyamīn ke shahar jibiā meṅ ṭik gae jabki filistī mikmās ke pās ḵẖaimāzan the. ¹⁷kuchh der ke bād filistiyoṅ ke tīn daste mulk ko lūṭne ke liye nikle. ek sūāl ke ilāqe ke shahar ufrā kī taraf chal paṛā, ¹⁸dūsrā bait-haurūn kī taraf aur tīsrā us pahāṛī silsile kī taraf jahāṅ se vādī-e-zaboīm aur registān dekhā jā saktā hai.

¹⁹un dinoṅ meṅ pūre mulk-e-isrāīl meṅ lohār nahīṅ thā, kyūṅki filistī nahīṅ chāhate the ki isrāīlī talvāreṅ yā neze banāeṅ. ²⁰apne haloṅ, kudāloṅ, kulhāṛiyoṅ yā darāntiyoṅ ko tez karvāne ke liye tamām isrāīliyoṅ ko filistiyoṅ ke pās jānā paṛtā thā. ²¹filistī haloṅ, kudāloṅ, kāṅṭoṅ aur kulhāṛiyoṅ ko tez karne ke liye aur āṅkusoṅ kī nok ṭhīk karne ke liye chāṅdī ke sikke kī do tihāī lete the. ²²natīje meṅ us din sāūl aur yūntan ke sivā kisī bhī isrāīlī ke pās talvār yā nezā nahīṅ thā.

yūntan filistiyoṅ par hamlā kartā hai

²³filistiyoṅ ne mikmās ke darre par qabzā karke vahāṅ chaukī qāim kī thī.