1 Samūel 3

allāh samūel se hamkalām hotā hai

¹chhoṭā samūel elī ke zer-e-nigrānī rabb ke huzūr ḵẖidmat kartā thā. un dinoṅ meṅ rabb kī taraf se bahut kam paiġām yā royāeṅ miltī thīṅ. ²ek rāt elī jis kī āṅkheṅ itnī kamzor ho gaī thīṅ ki dekhnā taqrīban nāmumkin thā māmūl ke mutābiq so gayā thā. ³samūel bhī leṭ gayā thā. vah rabb ke maqdis meṅ so rahā thā jahāṅ ahd kā sandūq paṛā thā. shamādān ab tak rabb ke huzūr jal rahā thā ^4-5 ki achānak rabb ne āvāz dī, “samūel!” samūel ne javāb diyā, “jī, maiṅ abhī ātā hūṅ.” vah bhāg kar elī ke pās gayā aur kahā, “jī janāb, maiṅ hāzir hūṅ. āp ne mujhe bulāyā?” elī bolā, “nahīṅ, maiṅ ne tumheṅ nahīṅ bulāyā. vāpas jā kar dubārā leṭ jāo.” chunāṅche samūel dubārā leṭ gayā.

⁶lekin rabb ne ek bār phir āvāz dī, “samūel!” laṛkā dubārā uṭhā aur elī ke pās jā kar bolā, “jī janāb, maiṅ hāzir hūṅ. āp ne mujhe bulāyā?” elī ne javāb diyā, “nahīṅ beṭā, maiṅ ne tumheṅ nahīṅ bulāyā. dubārā so jāo.”

⁷us vaqt samūel rabb kī āvāz nahīṅ pahachān saktā thā, kyūṅki abhī use rabb kā koī paiġām nahīṅ milā thā. ⁸chunāṅche rabb ne tīsrī bār āvāz dī, “samūel!” ek aur martabā samūel uṭh khaṛā huā aur elī ke pās jā kar bolā, “jī janāb, maiṅ hāzir hūṅ. āp ne mujhe bulāyā?” yah sun kar elī ne jān liyā ki rabb samūel se hamkalām ho rahā hai. ⁹is liye us ne laṛke ko batāyā, “ab dubārā leṭ jāo, lekin aglī dafā jab āvāz sunāī de to tumheṅ kahanā hai, ‘ai rabb, farmā. terā ḵẖādim sun rahā hai’.”

samūel ek bār phir apne bistar par leṭ gayā. ¹⁰rabb ā kar vahāṅ khaṛā huā aur pahale kī tarah pukārā, “samūel! samūel!” laṛke ne javāb diyā, “ai rabb, farmā. terā ḵẖādim sun rahā hai.” ¹¹phir rabb samūel se hamkalām huā, “dekh, maiṅ isrāīl meṅ itnā haulnāk kām karūṅgā ki jise bhī is kī ḵẖabar milegī us ke kān bajne lageṅge. ¹²us vaqt maiṅ shurū se le kar āḵẖir tak vah tamām bāteṅ pūrī karūṅgā jo maiṅ ne elī aur us ke gharāne ke bāre meṅ kī haiṅ. ¹³maiṅ elī ko āgāh kar chukā hūṅ ki us kā gharānā hameshā tak merī adālat kā nishānā banā rahegā. kyūṅki go use sāf mālūm thā ki us ke beṭe apnī ġalat harkatoṅ se merā ġazab apne āp par lāeṅge to bhī us ne unheṅ karne diyā aur na rokā. ¹⁴maiṅ ne qasam khāī hai ki elī ke gharāne kā qusūr na zabah aur na ġallā kī kisī qurbānī se dūr kiyā jā saktā hai balki is kā kaffārā kabhī bhī nahīṅ diyā jā sakegā!”

¹⁵is ke bād samūel subah tak apne bistar par leṭā rahā. phir vah māmūl ke mutābiq uṭhā aur rabb ke ghar ke darvāze khol die. vah elī ko apnī royā batāne se ḍartā thā, ¹⁶lekin elī ne use bulā kar kahā, “samūel, mere beṭe!” samūel ne javāb diyā, “jī, maiṅ hāzir hūṅ.” ¹⁷elī ne pūchhā, “rabb ne tumheṅ kyā batāyā hai? koī bhī bāt mujh se mat chhupānā! allāh tumheṅ saḵẖt sazā de agar tum ek lafz bhī mujh se poshīdā rakho.” ¹⁸phir samūel ne use khul kar sab kuchh batā diyā aur ek bāt bhī na chhupāī. elī ne kahā, “vahī rabb hai. jo kuchh us kī nazar meṅ ṭhīk hai use vah kare.”

¹⁹samūel javān hotā gayā, aur rabb us ke sāth thā. us ne samūel kī har bāt pūrī hone dī. ²⁰pūre isrāīl ne dān se le kar bair-sabā tak jān liyā ki rabb ne apne nabī samūel kī tasdīq kī hai. ²¹agle sāloṅ meṅ bhī rabb sailā meṅ apne kalām se samūel par zāhir hotā rahā.