1 Samūel 4

¹yūṅ samūel kā kalām sailā se nikal kar pūre isrāīl meṅ phail gayā.

filistī ahd kā sandūq chhīn lete haiṅ

ek din isrāīl kī filistiyoṅ ke sāth jaṅg chhiṛ gaī. isrāīliyoṅ ne laṛne ke liye nikal kar aban-azar ke pās apnī lashkargāh lagāī jabki filistiyoṅ ne afīq ke pās apne ḍere ḍāle. ²pahale filistiyoṅ ne isrāīliyoṅ par hamlā kiyā. laṛte laṛte unhoṅ ne isrāīl ko shikast dī. taqrīban 4,000 isrāīlī maidān-e-jaṅg meṅ halāk hue.

³fauj lashkargāh meṅ vāpas āī to isrāīl ke buzurg sochne lage, “rabb ne filistiyoṅ ko ham par kyūṅ fatah pāne dī? āo, ham rabb ke ahd kā sandūq sailā se le āeṅ tāki vah hamāre sāth chal kar hameṅ dushman se bachāe.”

⁴chunāṅche ahd kā sandūq jis ke ūpar rabb-ul-afwāj karūbī farishtoṅ ke darmiyān taḵẖtnashīn hai sailā se lāyā gayā. elī ke do beṭe hufnī aur fīnhās bhī sāth āe. ⁵jab ahd kā sandūq lashkargāh meṅ pahuṅchā to isrāīlī nihāyat ḵẖush ho kar buland āvāz se nāre lagāne lage. itnā shor mach gayā ki zamīn hil gaī.

⁶yah sun kar filistī chauṅk uṭhe aur ek dūsre se pūchhne lage, “yah kaisā shor hai jo isrāīlī lashkargāh meṅ ho rahā hai?” jab patā chalā ki rabb ke ahd kā sandūq isrāīlī lashkargāh meṅ ā gayā hai ⁷to vah ghabrā kar chillāe, “un kā devtā un kī lashkargāh meṅ ā gayā hai. hāy, hamārā satyānās ho gayā hai! pahale to aisā kabhī nahīṅ huā hai. ⁸ham par afsos! kaun hameṅ in tāqatvar devtāoṅ se bachāegā? kyūṅki in hī ne registān meṅ misriyoṅ ko har qism kī balā se mār kar halāk kar diyā thā. ⁹bhāiyo, ab diler ho aur mardāngī dikhāo, varnā ham usī tarah ibrāniyoṅ ke ġulām ban jāeṅge jaise vah ab tak hamāre ġulām the. mardāngī dikhā kar laṛo!” ¹⁰āpas meṅ aisī bāteṅ karte karte filistī laṛne ke liye nikle aur isrāīl ko shikast dī. har taraf qatl-e-ām nazar āyā, aur 30,000 payāde isrāīlī kām āe. bāqī sab farār ho kar apne apne gharoṅ meṅ chhup gae. ¹¹elī ke do beṭe hufnī aur fīnhās bhī usī din halāk hue, aur allāh ke ahd kā sandūq filistiyoṅ ke qabze meṅ ā gayā.

elī kī maut

¹²usī din binyamīn ke qabīle kā ek ādmī maidān-e-jaṅg se bhāg kar sailā pahuṅch gayā. us ke kapṛe phaṭe hue the aur sar par ḵẖāk thī. ^13-15 elī saṛak ke kināre apnī kursī par baiṭhā thā. vah ab aṅdhā ho chukā thā, kyūṅki us kī umr 98 sāl thī. vah baṛī bechainī se rāste par dhyān de rahā thā tāki jaṅg kī koī tāzā ḵẖabar mil jāe, kyūṅki use is bāt kī baṛī fikr thī ki allāh kā sandūq lashkargāh meṅ hai.

jab vah ādmī shahar meṅ dāḵẖil huā aur logoṅ ko sārā mājrā sunāyā to pūrā shahar chillāne lagā. jab elī ne shor sunā to us ne pūchhā, “yah kyā shor hai?” binymīnī dauṛ kar elī ke pās āyā aur bolā, ¹⁶“maiṅ maidān-e-jaṅg se āyā hūṅ. āj hī maiṅ vahāṅ se farār huā.” elī ne pūchhā, “beṭā, kyā huā?” ¹⁷qāsid ne javāb diyā, “isrāīlī filistiyoṅ ke sāmne farār hue. fauj ko har taraf shikast mānnī paṛī, aur āp ke donoṅ beṭe hufnī aur fīnhās bhī māre gae haiṅ. afsos, allāh kā sandūq bhī dushman ke qabze meṅ ā gayā hai.”

¹⁸ahd ke sandūq kā zikr sunte hī elī apnī kursī par se pīchhe kī taraf gir gayā. chūṅki vah būṛhā aur bhārī-bharkam thā is liye us kī gardan ṭūṭ gaī aur vah vahīṅ maqdis ke darvāze ke pās hī mar gayā. vah 40 sāl isrāīl kā qāzī rahā thā.

fīnhās kī bevā kī maut

¹⁹us vaqt elī kī bahū yānī fīnhās kī bīvī kā pāoṅ bhārī thā aur bacchā paidā hone vālā thā. jab us ne sunā ki allāh kā sandūq dushman ke hāth meṅ ā gayā hai aur ki susar aur shauhar donoṅ mar gae haiṅ to use itnā saḵẖt sadmā pahuṅchā ki vah shadīd dard-e-zah meṅ mubtalā ho gaī. vah jhuk gaī, aur bacchā paidā huā. ²⁰us kī jān nikalne lagī to dāiyoṅ ne us kī hausalāafzāī karke kahā, “ḍaro mat! tumhāre beṭā paidā huā hai.” lekin māṅ ne na javāb diyā, na bāt par dhyān diyā. ^21-22 kyūṅki vah allāh ke sandūq ke chhin jāne aur susar aur shauhar kī maut ke bāis nihāyat bedil ho gaī thī. us ne kahā, “beṭe kā nām yakbod yānī ‘jalāl kahāṅ rahā’ hai, kyūṅki allāh ke sandūq ke chhin jāne se allāh kā jalāl isrāīl se jātā rahā hai.”