1 Samūel 6
ahd kā sandūq isrāīl vāpas lāyā jātā hai
1allāh kā sandūq ab sāt mahīne filistiyoṅ ke pās rahā thā. 2āḵẖirkār unhoṅ ne apne tamām pujāriyoṅ aur rammāloṅ ko bulā kar un se mashvrā kiyā, “ab ham rabb ke sandūq kā kyā kareṅ? hameṅ batāeṅ ki ise kis tarah is ke apne mulk meṅ vāpas bhejeṅ.”
3pujāriyoṅ aur rammāloṅ ne javāb diyā, “agar āp use vāpas bhejeṅ to vaise mat bhejnā balki qusūr kī qurbānī sāth bhejnā. tab āp ko shifā milegī, aur āp jān leṅge ki vah āp ko sazā dene se kyūṅ nahīṅ bāz āyā.”
4filistiyoṅ ne pūchhā, “ham use kis qism kī qusūr kī qurbānī bhejeṅ?”
unhoṅ ne javāb diyā, “filistiyoṅ ke pāṅch hukmarān haiṅ, is liye sone ke pāṅch phoṛe aur pāṅch chūhe banvāeṅ, kyūṅki āp sab is ek hī vabā kī zad meṅ āe hue haiṅ, ḵẖwāh hukmarān hoṅ, ḵẖwāh r’āyā. 5sone ke yah phoṛe aur mulk ko tabāh karne vāle chūhe banā kar isrāīl ke devtā kā ehatirām kareṅ. shāyad vah yah dekh kar āp, āp ke devtāoṅ aur mulk ko sazā dene se bāz āe. 6āp kyūṅ purāne zamāne ke misriyoṅ aur un ke bādshāh kī tarah aṛ jāeṅ? kyūṅki us vaqt allāh ne misriyoṅ ko itnī saḵẖt musībat meṅ ḍāl diyā ki āḵẖirkār unheṅ isrāīliyoṅ ko jāne denā paṛā.
7ab bailgāṛī banā kar us ke āge do gāeṅ jūteṅ. aisī gāeṅ hoṅ jin ke dūdh pīne vāle bacche hoṅ aur jin par ab tak jūā na rakhā gayā ho. gāiyoṅ ko bailgāṛī ke āge jūteṅ, lekin un ke bacchoṅ ko sāth jāne na deṅ balki unheṅ kahīṅ band rakheṅ. 8phir rabb kā sandūq bailgāṛī par rakhā jāe aur us ke sāth ek thailā jis meṅ sone kī vah chīzeṅ hoṅ jo āp qusūr kī qurbānī ke taur par bhej rahe haiṅ. is ke bād gāiyoṅ ko khulā chhoṛ deṅ. 9ġaur kareṅ ki vah kaun sā rāstā iḵẖtiyār kareṅgī. agar isrāīl ke bait-shams kī taraf chaleṅ to phir mālūm hogā ki rabb ham par yah baṛī musībat lāyā hai. lekin agar vah kahīṅ aur chaleṅ to matlab hogā ki isrāīl ke devtā ne hameṅ sazā nahīṅ dī balki sab kuchh ittifāq se huā hai.”
10filistiyoṅ ne aisā hī kiyā. unhoṅ ne do gāeṅ naī bailgāṛī meṅ jūt kar un ke chhoṭe bacchoṅ ko kahīṅ band rakhā. 11phir unhoṅ ne ahd kā sandūq us thaile samet jis meṅ sone ke chūhe aur phoṛe the bailgāṛī par rakhā.
12jab gāiyoṅ ko chhoṛ diyā gayā to vah ḍakrātī ḍakrātī sīdhī bait-shams ke rāste par ā gaīṅ aur na dāīṅ, na bāīṅ taraf haṭīṅ. filistiyoṅ ke sardār bait-shams kī sarhadd tak un ke pīchhe chale.
13us vaqt bait-shams ke bāshinde nīche vādī meṅ gandum kī fasal kāṭ rahe the. ahd kā sandūq dekh kar vah nihāyat ḵẖush hue. 14bailgāṛī ek khet tak pahuṅchī jis kā mālik bait-shams kā rahane vālā yashūa thā. vahāṅ vah ek baṛe patthar ke pās ruk gaī. logoṅ ne bailgāṛī kī lakṛī ṭukṛe ṭukṛe karke use jalā diyā aur gāiyoṅ ko zabah karke rabb ko bhasm hone vālī qurbānī ke taur par pesh kiyā. 15lāvī ke qabīle ke kuchh mardoṅ ne rabb ke sandūq ko bailgāṛī se uṭhā kar sone kī chīzoṅ ke thaile samet patthar par rakh diyā. us din bait-shams ke logoṅ ne rabb ko bhasm hone vālī aur zabah kī qurbāniyāṅ pesh kīṅ.
16yah sab kuchh dekhne ke bād filistī sardār usī din aqrūn vāpas chale gae. 17filistiyoṅ ne apnā qusūr dūr karne ke liye har ek shahar ke liye sone kā ek phoṛā banā liyā thā yānī ashdūd, ġazzā, asqalūn, jāt aur aqrūn ke liye ek ek phoṛā. 18is ke ilāvā unhoṅ ne har shahar aur us ke gird-o-navāh kī ābādiyoṅ ke liye sone kā ek ek chūhā banā liyā thā. jis baṛe patthar par ahd kā sandūq rakhā gayā vah āj tak yashūa bait-shamsī ke khet meṅ is bāt kī gavāhī detā hai.
ahd kā sandūq qiryat-yārīm meṅ
19lekin rabb ne bait-shams ke bāshindoṅ ko sazā dī, kyūṅki un meṅ se bāz ne ahd ke sandūq meṅ nazar ḍālī thī. us vaqt 70 afrād halāk hue. rabb kī yah saḵẖt sazā dekh kar bait-shams ke log mātam karne lage. 20vah bole, “kaun is muqaddas ḵẖudā ke huzūr qāim rah saktā hai? yah hamāre bas kī bāt nahīṅ, lekin ham rabb kā sandūq kis ke pās bhejeṅ?” 21āḵẖir meṅ unhoṅ ne qiryat-yārīm ke bāshindoṅ ko paiġām bhejā, “filistiyoṅ ne rabb kā sandūq vāpas kar diyā hai. ab āeṅ aur use apne pās le jāeṅ!”