1 Samūel 9
sāūl bāp kī gadhiyāṅ talāsh kartā hai
1binyamīn ke qabāilī ilāqe meṅ ek binymīnī banām qīs rahatā thā jis kā acchhā-ḵẖāsā asar-o-rasūḵẖ thā. bāp kā nām abīel bin saror bin bakorat bin afīḵẖ thā. 2qīs kā beṭā sāūl javān aur ḵẖūbsūrat thā balki isrāīl meṅ koī aur itnā ḵẖūbsūrat nahīṅ thā. sāth sāth vah itnā lambā thā ki bāqī sab log sirf us ke kaṅdhoṅ tak āte the.
3ek din sāūl ke bāp qīs kī gadhiyāṅ gum ho gaīṅ. yah dekh kar us ne apne beṭe sāūl ko hukm diyā, “naukar ko apne sāth le kar gadhiyoṅ ko ḍhūṅḍ lāeṅ.” 4donoṅ ādmī ifrāīm ke pahāṛī ilāqe aur salīsā ke ilāqe meṅ se guzre, lekin besūd. phir unhoṅ ne sālīm ke ilāqe meṅ khoj lagāyā, lekin vahāṅ bhī gadhiyāṅ na milīṅ. is ke bād vah binyamīn ke ilāqe meṅ ghūmte phire, lekin befāidā. 5chalte chalte vah sūf ke qarīb pahuṅch gae. sāūl ne naukar se kahā, “āo, ham ghar vāpas chaleṅ, aisā na ho ki vālid gadhiyoṅ kī nahīṅ balki hamārī fikr kareṅ.”
6lekin naukar ne kahā, “is shahar meṅ ek mard-e-ḵẖudā hai. log us kī baṛī izzat karte haiṅ, kyūṅki jo kuchh bhī vah kahatā hai vah pūrā ho jātā hai. kyūṅ na ham us ke pās jāeṅ? shāyad vah hameṅ batāe ki gadhiyoṅ ko kahāṅ ḍhūṅḍnā chāhie.”
7sāūl ne pūchhā, “lekin ham use kyā deṅ? hamārā khānā ḵẖatm ho gayā hai, aur hamāre pās us ke liye tuhfā nahīṅ hai.”
8naukar ne javāb diyā, “koī bāt nahīṅ, mere pās chāṅdī kā chhoṭā sikkā [a] lafzī tarjumā : chāṅdī ke sikke kī ek chauthāī hai. yah maiṅ mard-e-ḵẖudā ko de dūṅgā tāki batāe ki ham kis taraf ḍhūṅḍeṅ.”
9-11 sāūl ne kahā, “ṭhīk hai, chaleṅ.” vah shahar kī taraf chal paṛe tāki mard-e-ḵẖudā se bāt kareṅ. jab pahāṛī ḍhalān par shahar kī taraf chaṛh rahe the to kuchh laṛkiyāṅ pānī bharne ke liye niklīṅ. ādmiyoṅ ne un se pūchhā, “kyā ġaibbīn shahar meṅ hai?” (purāne zamāne meṅ nabī ġaibbīn kahalātā thā. agar koī allāh se kuchh mālūm karnā chāhatā to kahatā, “āo, ham ġaibbīn ke pās chaleṅ.”)
12-13 laṛkiyoṅ ne javāb diyā, “jī, vah abhī abhī pahuṅchā hai, kyūṅki shahar ke log āj pahāṛī par qurbāniyāṅ chaṛhā kar īd manā rahe haiṅ. agar jaldī kareṅ to pahāṛī par chaṛhne se pahale us se mulāqāt ho jāegī. us vaqt tak ziyāfat shurū nahīṅ hogī jab tak ġaibbīn pahuṅch na jāe. kyūṅki use pahale khāne ko barkat denā hai, phir hī mehamānoṅ ko khānā khāne kī ijāzat hai. ab jāeṅ, kyūṅki isī vaqt āp us se bāt kar sakte haiṅ.”
14chunāṅche sāūl aur naukar shahar kī taraf baṛhe. shahar ke darvāze par hī samūel se mulāqāt ho gaī jo vahāṅ se nikal kar qurbāngāh kī pahāṛī par chaṛhne ko thā.
samūel sāūl kī mehamān-navāzī kartā hai
15rabb samūel ko ek din pahale paiġām de chukā thā, 16“kal maiṅ isī vaqt mulq-e-binyamīn kā ek ādmī tere pās bhej dūṅgā. use masah karke merī qaum isrāīl par bādshāh muqarrar kar. vah merī qaum ko filistiyoṅ se bachāegā. kyūṅki maiṅ ne apnī qaum kī musībat par dhyān diyā hai, aur madad ke liye us kī chīḵẖeṅ mujh tak pahuṅch gaī haiṅ.” 17ab jab samūel ne shahar ke darvāze se nikalte hue sāūl ko dekhā to rabb samūel se hamkalām huā, “dekh, yahī vah ādmī hai jis kā zikr maiṅ ne kal kiyā thā. yahī merī qaum par hukūmat karegā.”
18vahīṅ shahar ke darvāze par sāūl samūel se muḵẖātib huā, “meharbānī karke mujhe batāie ki ġaibbīn kā ghar kahāṅ hai?” 19samūel ne javāb diyā, “maiṅ hī ġaibbīn hūṅ. āeṅ, us pahāṛī par chaleṅ jis par ziyāfat ho rahī hai, kyūṅki āj āp mere mehamān haiṅ. kal maiṅ subah-savere āp ko āp ke dil kī bāt batā dūṅgā. 20jahāṅ tak tīn din se gumshudā gadhiyoṅ kā tālluq hai, un kī fikr na kareṅ. vah to mil gaī haiṅ. vaise āp aur āp ke bāp ke gharāne ko isrāīl kī har qīmtī chīz hāsil hai.” 21sāūl ne pūchhā, “yah kis tarah? maiṅ to isrāīl ke sab se chhoṭe qabīle binyamīn kā hūṅ, aur merā ḵẖāndān qabīle meṅ sab se chhoṭā hai.”
22samūel sāūl ko naukar samet us hāl meṅ le gayā jis meṅ ziyāfat ho rahī thī. taqrīban 30 mehamān the, lekin samūel ne donoṅ ādmiyoṅ ko sab se izzat vālī kursiyoṅ par biṭhā diyā. 23ḵẖānsāme ko us ne hukm diyā, “ab gosht kā vah ṭukṛā le āo jo maiṅ ne tumheṅ de kar kahā thā ki use alag rakhnā hai.” 24ḵẖānsāme ne qurbānī kī rān lā kar use sāūl ke sāmne rakh diyā. samūel bolā, “yah āp ke liye mahfūz rakhā gayā hai. ab khāeṅ, kyūṅki dūsroṅ ko dāvat dete vaqt maiṅ ne yah gosht āp ke liye aur is mauqe ke liye alag kar liyā thā.” chunāṅche sāūl ne us din samūel ke sāth khānā khāyā.
25ziyāfat ke bād vah pahāṛī se utar kar shahar vāpas āe, aur samūel apne ghar kī chhat par sāūl se bātchīt karne lagā. 26agle din jab pau phaṭne lagī to samūel ne nīche se sāūl ko jo chhat par so rahā thā āvāz dī, “uṭheṅ! maiṅ āp ko ruḵẖsat karūṅ.” sāūl jāg uṭhā aur vah mil kar ravānā hue. 27jab vah shahar ke kināre par pahuṅche to samūel ne sāūl se kahā, “apne naukar ko āge bhejeṅ.” jab naukar chalā gayā to samūel bolā, “ṭhahar jāeṅ, kyūṅki mujhe āp ko allāh kā ek paiġām sunānā hai.”