Kuzāt 14

samsūn kī filistī aurat se shādī

¹ek din samsūn timnat meṅ filistiyoṅ ke pās ṭhaharā huā thā. vahāṅ us ne ek filistī aurat dekhī jo use pasand āī. ²apne ghar lauṭ kar us ne apne vālidain ko batāyā, “mujhe timnat kī ek filistī aurat pasand āī hai. us ke sāth merā rishtā bāṅdhne kī koshish kareṅ.” ³us ke vālidain ne javāb diyā, “kyā āp ke rishtedāroṅ aur qaum meṅ koī qābil-e-qabūl aurat nahīṅ hai? āp ko nāmaḵẖtūn aur bedīn filistiyoṅ ke pās jā kar un meṅ se koī aurat ḍhūṅḍne kī kyā zarūrat thī?” lekin samsūn bazid rahā, “usī ke sāth merī shādī karāeṅ! vahī mujhe ṭhīk lagtī hai.”

⁴us ke māṅ-bāp ko mālūm nahīṅ thā ki yah sab kuchh rabb kī taraf se hai jo filistiyoṅ se laṛne kā mauqā talāsh kar rahā thā. kyūṅki us vaqt filistī isrāīl par hukūmat kar rahe the.

⁵chunāṅche samsūn apne māṅ-bāp samet timnat ke liye ravānā huā. jab vah timnat ke aṅgūr ke bāġoṅ ke qarīb pahuṅche to samsūn apne māṅ-bāp se alag ho gayā. achānak ek javān sherbabar dahāṛatā huā us par ṭūṭ paṛā. ⁶tab allāh kā rūh itne zor se samsūn par nāzil huā ki us ne apne hāthoṅ se sher ko yūṅ phāṛ ḍālā, jis tarah ām ādmī bakrī ke chhoṭe bacche ko phāṛ ḍāltā hai. lekin us ne apne vālidain ko is ke bāre meṅ kuchh na batāyā. ⁷āge nikal kar vah timnat pahuṅch gayā. mazkūrā filistī aurat se bāt huī aur vah use ṭhīk lagī.

⁸kuchh der ke bād vah shādī karne ke liye dubārā timnat gae. shahar pahuṅchne se pahale samsūn rāste se haṭ kar sherbabar kī lāsh ko dekhne gayā. vahāṅ kyā dekhtā hai ki shahad kī makkhiyoṅ ne sher ke piṅjar meṅ apnā chhattā banā liyā hai. ⁹samsūn ne us meṅ hāth ḍāl kar shahad ko nikāl liyā aur use khāte hue chalā. jab vah apne māṅ-bāp ke pās pahuṅchā to us ne unheṅ bhī kuchh diyā, magar yah na batāyā ki kahāṅ se mil gayā hai.

¹⁰timnat pahuṅch kar samsūn kā bāp dulhan ke ḵẖāndān se milā jabki samsūn ne dūlhe kī haisiyat se aisī ziyāfat kī jis tarah us zamāne meṅ dastūr thā.

filistī samsūn ko dhokā dete haiṅ

¹¹jab dulhan ke ghar vāloṅ ko patā chalā ki samsūn timnat pahuṅch gayā hai to unhoṅ ne us ke pās 30 javān ādmī bhej die ki us ke sāth ḵẖushī manāeṅ. ¹²samsūn ne un se kahā, “maiṅ āp se pahelī pūchhtā hūṅ. agar āp ziyāfat ke sāt dinoṅ ke daurān is kā hal batā sakeṅ to maiṅ āp ko katān ke 30 qīmtī kurte aur 30 shāndār sūṭ de dūṅgā. ¹³lekin agar āp mujhe is kā sahīh matlab na batā sakeṅ to āp ko mujhe 30 qīmtī kurte aur 30 shāndār sūṭ dene paṛeṅge.” unhoṅ ne javāb diyā, “apnī pahelī sunāeṅ.”

¹⁴samsūn ne kahā, “khāne vāle meṅ se khānā niklā aur zorāvar meṅ se miṭhās.”

tīn din guzar gae. javān pahelī kā matlab na batā sake. ¹⁵chauthe din unhoṅ ne dulhan ke pās jā kar use dhamkī dī, “apne shauhar ko hameṅ pahelī kā matlab batāne par uksāo, varnā ham tumheṅ tumhāre ḵẖāndān samet jalā deṅge. kyā tum logoṅ ne hameṅ sirf is liye dāvat dī ki hameṅ lūṭ lo?”

¹⁶dulhan samsūn ke pās gaī aur āṅsū bahā bahā kar kahane lagī, “tū mujhe piyār nahīṅ kartā! haqīqat meṅ tū mujh se nafrat kartā hai. tū ne merī qaum ke logoṅ se pahelī pūchhī hai lekin mujhe is kā matlab nahīṅ batāyā.” samsūn ne javāb diyā, “maiṅ ne apne māṅ-bāp ko bhī is kā matlab nahīṅ batāyā to tujhe kyūṅ batāūṅ?” ¹⁷ziyāfat ke pūre hafte ke daurān dulhan us ke sāmne rotī rahī.

sātveṅ din samsūn dulhan kī iltijāoṅ se itnā taṅg ā gayā ki us ne use pahelī kā hal batā diyā. tab dulhan ne phurtī se sab kuchh filistiyoṅ ko sunā diyā. ¹⁸sūraj ke ġurūb hone se pahale pahale shahar ke mardoṅ ne samsūn ko pahelī kā matlab batāyā, “kyā koī chīz shahad se ziyādā mīṭhī aur sherbabar se ziyādā zorāvar hotī hai?” samsūn ne yah sun kar kahā, “āp ne merī javān gāy le kar hal chalāyā hai, varnā āp kabhī bhī pahelī kā hal na nikāl sakte.” ¹⁹phir rabb kā rūh us par nāzil huā. us ne asqalūn shahar meṅ jā kar 30 filistiyoṅ ko mār ḍālā aur un ke libās le kar un ādmiyoṅ ko de die jinhoṅ ne use pahelī kā matlab batā diyā thā.

is ke bād vah baṛe ġusse meṅ apne māṅ-bāp ke ghar chalā gayā. ²⁰lekin us kī bīvī kī shādī samsūn ke shahabāle se karāī gaī jo 30 javān filistiyoṅ meṅ se ek thā.