Kuzāt 16

samsūn ġazzā kā darvāzā uṭhā le jātā hai

¹ek din samsūn filistī shahar ġazzā meṅ āyā. vahāṅ vah ek kasbī ko dekh kar us ke ghar meṅ dāḵẖil huā. ²jab shahar ke bāshindoṅ ko ittilā milī ki samsūn shahar meṅ hai to unhoṅ ne kasbī ke ghar ko gher liyā. sāth sāth vah rāt ke vaqt shahar ke darvāze par tāk meṅ rahe. faislā yah huā, “rāt ke vaqt ham kuchh nahīṅ kareṅge, jab pau phaṭegī tab use mār ḍāleṅge.”

³samsūn ab tak kasbī ke ghar meṅ so rahā thā. lekin ādhī rāt ko vah uṭh kar shahar ke darvāze ke pās gayā aur donoṅ kivāṛoṅ ko kuṅḍe aur darvāze ke donoṅ bāzūoṅ samet ukhāṛ kar apne kaṅdhoṅ par rakh liyā. yūṅ chalte chalte vah sab kuchh us pahāṛī kī choṭī par le gayā jo habrūn ke muqābil hai.

samsūn aur dalīlā

⁴kuchh der ke bād samsūn ek aurat kī muhabbat meṅ giriftār ho gayā jo vādī-e-sūriq meṅ rahatī thī. us kā nām dalīlā thā. ⁵yah sun kar filistī sardār us ke pās āe aur kahane lage, “samsūn ko ukasāeṅ ki vah āp ko apnī baṛī tāqat kā bhed batāe. ham jānnā chāhate haiṅ ki ham kis tarah us par ġālib ā kar use yūṅ bāṅdh sakeṅ ki vah hamāre qabze meṅ rahe. agar āp yah mālūm kar sakeṅ to ham meṅ se har ek āp ko chāṅdī ke 1,100 sikke degā.”

⁶chunāṅche dalīlā ne samsūn se savāl kiyā, “mujhe apnī baṛī tāqat kā bhed batāeṅ. kyā āp ko kisī aisī chīz se bāṅdhā jā saktā hai jise āp toṛ nahīṅ sakte?” ⁷samsūn ne javāb diyā, “agar mujhe jānvaroṅ kī sāt tāzā nasoṅ se bāṅdhā jāe to phir maiṅ ām ādmī jaisā kamzor ho jāūṅgā.” ⁸filistī sardāroṅ ne dalīlā ko sāt tāzā naseṅ muhayyā kar dīṅ, aur us ne samsūn ko un se bāṅdh liyā. ⁹kuchh filistī ādmī sāth vāle kamre meṅ chhup gae. phir dalīlā chillā uṭhī, “samsūn, filistī āp ko pakaṛne āe haiṅ!” yah sun kar samsūn ne nasoṅ ko yūṅ toṛ diyā jis tarah ḍorī ṭūṭ jātī hai jab āg meṅ se guzartī hai. chunāṅche us kī tāqat kā pol na khulā.

¹⁰dalīlā kā muṅh laṭak gayā. “āp ne jhūṭ bol kar mujhe bevuqūf banāyā hai. ab āeṅ, meharbānī karke mujhe batāeṅ ki āp ko kis tarah bāṅdhā jā saktā hai.” ¹¹samsūn ne javāb diyā, “agar mujhe ġairistemālashudā rassoṅ se bāṅdhā jāe to phir hī maiṅ ām ādmī jaisā kamzor ho jāūṅgā.” ¹²dalīlā ne nae rasse le kar use un se bāṅdh liyā. is martabā bhī filistī sāth vāle kamre meṅ chhup gae the. phir dalīlā chillā uṭhī, “samsūn, filistī āp ko pakaṛne āe haiṅ!” lekin is bār bhī samsūn ne rassoṅ ko yūṅ toṛ liyā jis tarah ām ādmī ḍorī ko toṛ letā hai.

¹³dalīlā ne shikāyat kī, “āp bār bār jhūṭ bol kar merā mazāq uṛā rahe haiṅ. ab mujhe batāeṅ ki āp ko kis tarah bāṅdhā jā saktā hai.” samsūn ne javāb diyā, “lāzim hai ki āp merī sāt zulfoṅ ko khaḍḍī ke tāne ke sāth buneṅ. phir hī ām ādmī jaisā kamzor ho jāūṅgā.” ¹⁴jab samsūn so rahā thā to dalīlā ne aisā hī kiyā. us kī sāt zulfoṅ ko tāne ke sāth bun kar us ne use shaṭal ke zarīe khaḍḍī ke sāth lagāyā. phir vah chillā uṭhī, “samsūn, filistī āp ko pakaṛne āe haiṅ!” samsūn jāg uṭhā aur apne bāloṅ ko shaṭal samet khaḍḍī se nikāl liyā.

¹⁵yah dekh kar dalīlā ne muṅh phulā kar malāmat kī, “āp kis tarah dāvā kar sakte haiṅ ki mujh se muhabbat rakhte haiṅ? ab āp ne tīn martabā merā mazāq uṛā kar mujhe apnī baṛī tāqat kā bhed nahīṅ batāyā.” ¹⁶roz-ba-roz vah apnī bātoṅ se us kī nāk meṅ dam kartī rahī. āḵẖirkār samsūn itnā taṅg ā gayā ki us kā jīnā dūbhar ho gayā. ¹⁷phir us ne use khul kar bāt batāī, “maiṅ paidāish hī se allāh ke liye maḵẖsūs hūṅ, is liye mere bāloṅ ko kabhī nahīṅ kāṭā gayā. agar sar ko muṅḍavāyā jāe to merī tāqat jātī rahegī aur maiṅ har dūsre ādmī jaisā kamzor ho jāūṅgā.”

¹⁸dalīlā ne jān liyā ki ab samsūn ne mujhe pūrī haqīqat batāī hai. us ne filistī sardāroṅ ko ittilā dī, “āo, kyūṅki is martabā us ne mujhe apne dil kī har bāt batāī hai.” yah sun kar vah muqarrarā chāṅdī apne sāth le kar dalīlā ke pās āe.

¹⁹dalīlā ne samsūn kā sar apnī god meṅ rakh kar use sulā diyā. phir us ne ek ādmī ko bulā kar samsūn kī sāt zulfoṅ ko muṅḍavāyā. yūṅ vah use past karne lagī, aur us kī tāqat jātī rahī. ²⁰phir vah chillā uṭhī, “samsūn, filistī āp ko pakaṛne āe haiṅ!” samsūn jāg uṭhā aur sochā, “maiṅ pahale kī tarah ab bhī apne āp ko bachā kar baṅdhan ko toṛ dūṅgā.” afsos, use mālūm nahīṅ thā ki rabb ne use chhoṛ diyā hai. ²¹filistiyoṅ ne use pakaṛ kar us kī āṅkheṅ nikāl dīṅ. phir vah use ġazzā le gae jahāṅ use pītal kī zanjīroṅ se bāṅdhā gayā. vahāṅ vah qaidḵẖāne kī chakkī pīsā kartā thā.

²²lekin hote hote us ke bāl dubārā baṛhne lage.

samsūn kā āḵẖirī intiqām

²³ek din filistī sardār baṛā jashn manāne ke liye jamā hue. unhoṅ ne apne devtā dajūn ko jānvaroṅ kī bahut sī qurbāniyāṅ pesh karke apnī fatah kī ḵẖushī manāī. vah bole, “hamāre devtā ne hamāre dushman samsūn ko hamāre havāle kar diyā hai.” ²⁴samsūn ko dekh kar avām ne dajūn kī tamjīd karke kahā, “hamāre devtā ne hamāre dushman ko hamāre havāle kar diyā hai! jis ne hamāre mulk ko tabāh kiyā aur ham meṅ se itne logoṅ ko mār ḍālā vah ab hamāre qābū meṅ ā gayā hai!” ²⁵is qism kī bāteṅ karte karte un kī ḵẖushī kī intihā na rahī. tab vah chillāne lage, “samsūn ko bulāo tāki vah hamāre diloṅ ko bahalāe.”

chunāṅche use un kī tafrīh ke liye jel se lāyā gayā aur do satūnoṅ ke darmiyān khaṛā kar diyā gayā. ²⁶samsūn us laṛke se muḵẖātib huā jo us kā hāth pakaṛ kar us kī rāhanumāī kar rahā thā, “mujhe chhat ko uṭhāne vāle satūnoṅ ke pās le jāo tāki maiṅ un kā sahārā lūṅ.” ²⁷imārat mardoṅ aur aurtoṅ se bharī thī. filistī sardār bhī sab āe hue the. sirf chhat par samsūn kā tamāshā dekhne vāle taqrīban 3,000 afrād the.

²⁸phir samsūn ne duā kī, “ai rabb qādir-e-mutlaq, mujhe yād kar. bas ek dafā aur mujhe pahale kī tarah quvvat atā farmā tāki maiṅ ek hī vār se filistiyoṅ se apnī āṅkhoṅ kā badlā le sakūṅ.” ²⁹yah kah kar samsūn ne un do markzī satūnoṅ ko pakaṛ liyā jin par chhat kā pūrā vazan thā. un ke darmiyān khaṛe ho kar us ne pūrī tāqat se zor lagāyā ³⁰aur duā kī, “mujhe filistiyoṅ ke sāth marne de!” achānak satūn hil gae aur chhat dhaṛām se filistiyoṅ ke tamām sardāroṅ aur bāqī logoṅ par gir gaī. is tarah samsūn ne pahale kī nisbat marte vaqt kahīṅ ziyādā filistiyoṅ ko mār ḍālā.

³¹samsūn ke bhāī aur bāqī ghar vāle āe aur us kī lāsh ko uṭhā kar us ke bāp manohā kī qabr ke pās le gae. vahāṅ yānī sur’ā aur istāl ke darmiyān unhoṅ ne use dafnāyā. samsūn 20 sāl isrāīl kā qāzī rahā.