Kuzāt 19

ek lāvī kī apnī dāshtā ke sāth sulah

¹us zamāne meṅ jab isrāīl kā koī bādshāh nahīṅ thā ek lāvī ne apne ghar meṅ dāshtā rakhī jo yahūdāh ke shahar bait-laham kī rahane vālī thī. ādmī ifrāīm ke pahāṛī ilāqe ke kisī dūrdarāz kone meṅ ābād thā. ²lekin ek din aurat mard se nārāz huī aur maike vāpas chalī gaī. chār māh ke bād ³lāvī do gadhe aur apne naukar ko le kar bait-laham ke liye ravānā huā tāki dāshtā kā ġussā ṭhaṅḍā karke use vāpas āne par āmādā kare.

jab us kī mulāqāt dāshtā se huī to vah use apne bāp ke ghar meṅ le gaī. use dekh kar susar itnā ḵẖush huā ⁴ki us ne use jāne na diyā. dāmād ko tīn din vahāṅ ṭhaharnā paṛā jis daurān susar ne us kī ḵẖūb mehamān-navāzī kī. ⁵chauthe din lāvī subah-savere uṭh kar apnī dāshtā ke sāth ravānā hone kī tayyāriyāṅ karne lagā. lekin susar use rok kar bolā, “pahale thoṛā bahut khā kar tāzādam ho jāeṅ, phir chale jānā.” ⁶donoṅ dubārā khāne-pīne ke liye baiṭh gae.

susar ne kahā, “barāh-e-karam ek aur rāt yahāṅ ṭhahar kar apnā dil bahalāeṅ.” ⁷mehamān jāne kī tayyāriyāṅ karne to lagā, lekin susar ne use ek aur rāt ṭhaharne par majbūr kiyā. chunāṅche vah hār mān kar ruk gayā.

⁸pāṅchveṅ din ādmī subah-savere uṭhā aur jāne ke liye tayyār huā. susar ne zor diyā, “pahale kuchh khānā khā kar tāzādam ho jāeṅ. āp dopahar ke vaqt bhī jā sakte haiṅ.” chunāṅche donoṅ khāne ke liye baiṭh gae.

⁹dopahar ke vaqt lāvī apnī bīvī aur naukar ke sāth jāne ke liye uṭhā. susar etirāz karne lagā, “ab dekheṅ, din ḍhalne vālā hai. rāt ṭhahar kar apnā dil bahalāeṅ. behatar hai ki āp kal subah-savere hī uṭh kar ghar ke liye ravānā ho jāeṅ.” ^10-11 lekin ab lāvī kisī bhī sūrat meṅ ek aur rāt ṭhaharnā nahīṅ chāhatā thā. vah apne gadhoṅ par zīn kas kar apnī bīvī aur naukar ke sāth ravānā huā.

chalte chalte din ḍhalne lagā. vah yabūs yānī yarūshalam ke qarīb pahuṅch gae the. shahar ko dekh kar naukar ne mālik se kahā, “āeṅ, ham yabūsiyoṅ ke is shahar meṅ jā kar vahāṅ rāt guzāreṅ.” ¹²lekin lāvī ne etirāz kiyā, “nahīṅ, yah ajnabiyoṅ kā shahar hai. hameṅ aisī jagah rāt nahīṅ guzārnā chāhie jo isrāīlī nahīṅ hai. behatar hai ki ham āge jā kar jibiā kī taraf baṛheṅ. ¹³agar ham jaldī kareṅ to ho saktā hai ki jibiā yā us se āge rāmā tak pahuṅch sakeṅ. vahāṅ ārām se rāt guzār sakeṅge.”

¹⁴chunāṅche vah āge nikle. jab sūraj ġurūb hone lagā to vah binyamīn ke qabīle ke shahar jibiā ke qarīb pahuṅch gae ¹⁵aur rāste se haṭ kar shahar meṅ dāḵẖil hue. lekin koī un kī mehamān-navāzī nahīṅ karnā chāhatā thā, is liye vah shahar ke chauk meṅ ruk gae.

¹⁶phir aṅdhere meṅ ek būṛhā ādmī vahāṅ se guzrā. asal meṅ vah ifrāīm ke pahāṛī ilāqe kā rahane vālā thā aur jibiā meṅ ajnabī thā, kyūṅki bāqī bāshinde binymīnī the. ab vah khet meṅ apne kām se fāriġ ho kar shahar meṅ vāpas āyā thā. ¹⁷musāfiroṅ ko chauk meṅ dekh kar us ne pūchhā, “āp kahāṅ se āe aur kahāṅ jā rahe haiṅ?” ¹⁸lāvī ne javāb diyā, “ham yahūdāh ke bait-laham se āe haiṅ aur ifrāīm ke pahāṛī ilāqe ke ek dūrdarāz kone tak safar kar rahe haiṅ. vahāṅ merā ghar hai aur vahīṅ se maiṅ ravānā ho kar bait-laham chalā gayā thā. is vaqt maiṅ rabb ke ghar jā rahā hūṅ. lekin yahāṅ jibiā meṅ koī nahīṅ jo hamārī mehamān-navāzī karne ke liye tayyār ho, ¹⁹hālāṅki hamāre pās khāne kī tamām chīzeṅ maujūd haiṅ. gadhoṅ ke liye bhūsā aur chārā hai, aur hamāre liye bhī kāfī roṭī aur mai hai. hameṅ kisī bhī chīz kī zarūrat nahīṅ hai.”

²⁰būṛhe ne kahā, “phir maiṅ āp ko apne ghar meṅ ḵẖush’āmadīd kahatā hūṅ. agar āp ko koī chīz darkār ho to maiṅ use muhayyā karūṅgā. har sūrat meṅ chauk meṅ rāt mat guzārnā.” ²¹vah musāfiroṅ ko apne ghar le gayā aur gadhoṅ ko chārā khilāyā. mehamānoṅ ne apne pāoṅ dho kar khānā khāyā aur mai pī.

jibiā ke logoṅ kā jurm

²²vah yūṅ khāne kī rifāqat se lutf’andoz ho rahe the ki jibiā ke kuchh sharīr mard ghar ko gher kar darvāze ko zor se khaṭkhaṭāne lage. vah chillāe, “us ādmī ko bāhar lā jo tere ghar meṅ ṭhaharā huā hai tāki ham us se ziyādtī kareṅ!” ²³būṛhā ādmī bāhar gayā tāki unheṅ samjhāe, “nahīṅ, bhāiyo, aisā shaitānī amal mat karnā. yah ajnabī merā mehamān hai. aisī sharmanāk harkat mat karnā! ²⁴is se pahale maiṅ apnī kuṅvārī beṭī aur mehamān kī dāshtā ko bāhar le ātā hūṅ. un hī se ziyādtī kareṅ. jo jī chāhe un ke sāth kareṅ, lekin ādmī ke sāth aisī sharmanāk harkat na kareṅ.”

²⁵lekin bāhar ke mardoṅ ne us kī na sunī. tab lāvī apnī dāshtā ko pakaṛ kar bāhar le gayā aur us ke pīchhe darvāzā band kar diyā. shahar ke ādmī pūrī rāt us kī behuramtī karte rahe. jab pau phaṭne lagī to unhoṅ ne use fāriġ kar diyā. ²⁶sūraj ke tulū hone se pahale aurat us ghar ke pās vāpas āī jis meṅ shauhar ṭhaharā huā thā. darvāze tak to vah pahuṅch gaī lekin phir gir kar vahīṅ kī vahīṅ paṛī rahī.

jab din chaṛh gayā ²⁷to lāvī jāg uṭhā aur safar karne kī tayyāriyāṅ karne lagā. jab darvāzā kholā to kyā dekhtā hai ki dāshtā sāmne zamīn par paṛī hai aur hāth dahalīz par rakhe haiṅ. ²⁸vah bolā, “āṭho, ham chalte haiṅ.” lekin dāshtā ne javāb na diyā. yah dekh kar ādmī ne use gadhe par lād liyā aur apne ghar chalā gayā.

²⁹jab pahuṅchā to us ne chhurī le kar aurat kī lāsh ko 12 ṭukṛoṅ meṅ kāṭ liyā, phir unheṅ isrāīl kī har jagah bhej diyā. ³⁰jis ne bhī yah dekhā us ne ghabrā kar kahā, “aisā jurm hamāre darmiyān kabhī nahīṅ huā. jab se ham misr se nikal kar āe haiṅ aisī harkat dekhne meṅ nahīṅ āī. ab lāzim hai ki ham ġaur se socheṅ aur ek dūsre se mashvrā karke agle qadam ke bāre meṅ faislā kareṅ.”