Kuzāt 4
daborā nabiyā aur lashkar kā sardār baraq
1jab ahūd faut huā to isrāīlī dubārā aisī harkateṅ karne lage jo rabb ke nazdīk burī thīṅ. 2-3 is liye rabb ne unheṅ kan’ān ke bādshāh yābīn ke havāle kar diyā. yābīn kā dār-ul-hakūmat hasūr thā, aur us ke pās 900 lohe ke rath the. us ke lashkar kā sardār sīsrā thā jo harūsat-hagoim meṅ rahatā thā. yābīn ne 20 sāl isrāīliyoṅ par bahut zulm kiyā, is liye unhoṅ ne madad ke liye rabb ko pukārā.
4un dinoṅ meṅ daborā nabiyā isrāīl kī qāzī thī. us kā shauhar lafīdot thā, 5aur vah ‘daborā ke khajūr’ ke pās rahatī thī jo ifrāīm ke pahāṛī ilāqe meṅ rāmā aur bait-el ke darmiyān thā. is daraḵẖt ke sāy meṅ vah isrāīliyoṅ ke muāmalāt ke faisle kiyā kartī thī. 6ek din daborā ne baraq bin abīnūam ko bulāyā. baraq naftālī ke qabāilī ilāqe ke shahar qādis meṅ rahatā thā. daborā ne baraq se kahā, “rabb isrāīl kā ḵẖudā āp ko hukm detā hai, ‘naftālī aur zabūlūn ke qabīloṅ meṅ se 10,000 mardoṅ ko jamā karke un ke sāth tabūr pahāṛ par chaṛh jā! 7maiṅ yābīn ke lashkar ke sardār sīsrā ko us ke rathoṅ aur fauj samet tere qarīb kī qaison nadī ke pās khaiṅch lāūṅgā. vahāṅ maiṅ use tere hāth meṅ kar dūṅgā’.”
8baraq ne javāb diyā, “maiṅ sirf is sūrat meṅ jāūṅgā ki āp bhī sāth jāeṅ. āp ke baġair maiṅ nahīṅ jāūṅgā.” 9daborā ne kahā, “ṭhīk hai, maiṅ zarūr āp ke sāth jāūṅgī. lekin is sūrat meṅ āp ko sīsrā par ġālib āne kī izzat hāsil nahīṅ hogī balki ek aurat ko. kyūṅki rabb sīsrā ko ek aurat ke havāle kar degā.”
chunāṅche daborā baraq ke sāth qādis gaī. 10vahāṅ baraq ne zabūlūn aur naftālī ke qabīloṅ ko apne pās bulā liyā. 10,000 ādmī us kī rāhanumāī meṅ tabūr pahāṛ par chale gae. daborā bhī sāth gaī.
11un dinoṅ meṅ ek qīnī banām hibar ne apnā ḵẖaimā qādis ke qarīb ailon-zānnīm meṅ lagāyā huā thā. qīnī mūsā ke sāle hobāb kī aulād meṅ se thā. lekin hibar dūsre qīniyoṅ se alag rahatā thā.
12ab sīsrā ko ittilā dī gaī ki baraq bin abīnūam fauj le kar pahāṛ tabūr par chaṛh gayā hai. 13yah sun kar vah harūsat-hagoim se ravānā ho kar apne 900 rathoṅ aur bāqī lashkar ke sāth qaison nadī par pahuṅch gayā.
14tab daborā ne baraq se bāt kī, “hamlā ke liye tayyār ho jāeṅ, kyūṅki rabb ne āj hī sīsrā ko āp ke qābū meṅ kar diyā hai. rabb āp ke āge āge chal rahā hai.” chunāṅche baraq apne 10,000 ādmiyoṅ ke sāth tabūr pahāṛ se utar āyā. 15jab unhoṅ ne dushman par hamlā kiyā to rabb ne kan’āniyoṅ ke pūre lashkar meṅ rathoṅ samet afrā-tafrī paidā kar dī. sīsrā apne rath se utar kar paidal hī farār ho gayā.
16baraq ke ādmiyoṅ ne bhāgne vāle faujiyoṅ aur un ke rathoṅ kā tāqqub karke un ko harūsat-hagoim tak mārte gae. ek bhī na bachā.
sīsrā kā anjām
17itne meṅ sīsrā paidal chal kar qīnī ādmī hibar kī bīvī yāel ke ḵẖaime ke pās bhāg āyā thā. vajah yah thī ki hasūr ke bādshāh yābīn ke hibar ke gharāne ke sāth acchhe tālluqāt the. 18yāel ḵẖaime se nikal kar sīsrā se milne gaī. us ne kahā, “āeṅ mere āqā, andar āeṅ aur na ḍareṅ.” chunāṅche vah andar ā kar leṭ gayā, aur yāel ne us par kambal ḍāl diyā.
19sīsrā ne kahā, “mujhe piyās lagī hai, kuchh pānī pilā do.” yāel ne dūdh kā mashkīzā khol kar use pilā diyā aur use dubārā chhupā diyā. 20sīsrā ne daraḵẖwāst kī, “darvāze meṅ khaṛī ho jāo! agar koī āe aur pūchhe ki kyā ḵẖaime meṅ koī hai to bolo ki nahīṅ, koī nahīṅ hai.”
21yah kah kar sīsrā gaharī nīṅd so gayā, kyūṅki vah nihāyat thakā huā thā. tab yāel ne meḵẖ aur hathoṛā pakaṛ liyā aur dabe pāoṅ sīsrā ke pās jā kar meḵẖ ko itne zor se us kī kanapṭī meṅ ṭhoṅk diyā ki meḵẖ zamīn meṅ dhaṅs gaī aur vah mar gayā.
22kuchh der ke bād baraq sīsrā ke tāqqub meṅ vahāṅ se guzrā. yāel ḵẖaime se nikal kar us se milne āī aur bolī, “āeṅ, maiṅ āp ko vah ādmī dikhātī hūṅ jise āp ḍhūṅḍ rahe haiṅ.” baraq us ke sāth ḵẖaime meṅ dāḵẖil huā to kyā dekhā ki sīsrā kī lāsh zamīn par paṛī hai aur meḵẖ us kī kanapṭī meṅ se guzar kar zamīn meṅ gaṛ gaī hai.
23us din allāh ne kan’ānī bādshāh yābīn ko isrāīliyoṅ ke sāmne zer kar diyā. 24is ke bād un kī tāqat baṛhtī gaī jabki yābīn kamzor hotā gayā aur āḵẖirkār isrāīliyoṅ ke hāthoṅ tabāh ho gayā.