Kuzāt 7

allāh jidāūn ke sāthiyoṅ ko chun letā hai

¹subah-savere yarubbāl yānī jidāūn apne tamām logoṅ ko sāth le kar harod chashme ke pās āyā. vahāṅ unhoṅ ne apne ḍere lagāe. midiyāniyoṅ ne apnī ḵẖaimāgāh un ke shimāl meṅ morih pahāṛ ke dāman meṅ lagāī huī thī.

²rabb ne jidāūn se kahā, “tere pās ziyādā log haiṅ! maiṅ is qism ke baṛe lashkar ko midiyāniyoṅ par fatah nahīṅ dūṅgā, varnā isrāīlī mere sāmne ḍīṅgeṅ mār kar kaheṅge, ‘ham ne apnī hī tāqat se apne āp ko bachāyā hai!’ ³is liye lashkargāh meṅ elān kar ki jo ḍar ke māre pareshān ho vah apne ghar vāpas chalā jāe.” jidāūn ne yūṅ kiyā to 22,000 mard vāpas chale gae jabki 10,000 jidāūn ke pās rahe.

⁴lekin rabb ne dubārā jidāūn se bāt kī, “abhī tak ziyādā log haiṅ! in ke sāth utar kar chashme ke pās jā. vahāṅ maiṅ unheṅ jāṅch kar un ko muqarrar karūṅgā jinheṅ tere sāth jānā hai.” ⁵chunāṅche jidāūn apne ādmiyoṅ ke sāth chashme ke pās utar āyā. rabb ne use hukm diyā, “jo bhī apnā hāth pānī se bhar kar use kutte kī tarah chāṭ le use ek taraf khaṛā kar. dūsrī taraf unheṅ khaṛā kar jo ghuṭne ṭek kar pānī pīte haiṅ.” ⁶300 ādmiyoṅ ne apnā hāth pānī se bhar kar use chāṭ liyā jabki bāqī sab pīne ke liye jhuk gae.

⁷phir rabb ne jidāūn se farmāyā, “maiṅ in 300 chāṭne vāle ādmiyoṅ ke zarīe isrāīl ko bachā kar midiyāniyoṅ ko tere havāle kar dūṅgā. bāqī tamām mardoṅ ko fāriġ kar. vah sab apne apne ghar vāpas chale jāeṅ.” ⁸chunāṅche jidāūn ne bāqī tamām ādmiyoṅ ko fāriġ kar diyā. sirf muqarrarā 300 mard rah gae. ab yah dūsroṅ kī ḵẖurāk aur narsiṅge apne pās rakh kar jaṅg ke liye tayyār hue. us vaqt midiyānī ḵẖaimāgāh isrāīliyoṅ ke nīche vādī meṅ thī.

midiyāniyoṅ par jidāūn kī fatah

⁹jab rāt huī to rabb jidāūn se hamkalām huā, “uṭh, midiyānī ḵẖaimāgāh ke pās utar kar us par hamlā kar, kyūṅki maiṅ use tere hāth meṅ de dūṅgā. ¹⁰lekin agar tū is se ḍartā hai to pahale apne naukar fūrāh ke sāth utar kar ¹¹vah bāteṅ sun le jo vahāṅ ke log kah rahe haiṅ. tab un par hamlā karne kī jur’at baṛh jāegī.”

jidāūn fūrāh ke sāth ḵẖaimāgāh ke kināre ke pās utar āyā. ¹²midiyānī, amālīqī aur mashriq ke dīgar faujī ṭiḍḍiyoṅ ke dal kī tarah vādī meṅ phaile hue the. un ke ūṅṭ sāhil kī ret kī tarah beshumār the. ¹³jidāūn dabe pāoṅ dushman ke itne qarīb pahuṅch gayā ki un kī bāteṅ sun saktā thā. ain us vaqt ek faujī dūsre ko apnā ḵẖwāb sunā rahā thā, “maiṅ ne ḵẖwāb meṅ dekhā ki jau kī baṛī roṭī luṛhaktī luṛhaktī hamārī ḵẖaimāgāh meṅ utar āī. yahāṅ vah itnī shiddat se ḵẖaime se ṭakrā gaī ki ḵẖaimā ulaṭ kar zamīnabos ho gayā.” ¹⁴dūsre ne javāb diyā, “is kā sirf yah matlab ho saktā hai ki isrāīlī mard jidāūn bin yūās kī talvār ġālib āegī! allāh use midiyāniyoṅ aur pūrī lashkargāh par fatah degā.”

¹⁵ḵẖwāb aur us kī tābīr sun kar jidāūn ne allāh ko sijdā kiyā. phir us ne isrāīlī ḵẖaimāgāh meṅ vāpas ā kar elān kiyā, “uṭheṅ! rabb ne midiyānī lashkargāh ko tumhāre havāle kar diyā hai.” ¹⁶us ne apne 300 mardoṅ ko sau sau ke tīn gurohoṅ meṅ taqsīm karke har ek ko ek narsiṅgā aur ek ghaṛā de diyā. har ghaṛe meṅ mash’al thī. ^17-18 us ne hukm diyā, “jo kuchh maiṅ karūṅgā us par ġaur karke vahī kuchh kareṅ. pūrī ḵẖaimāgāh ko gher leṅ aur ain vahī kuchh kareṅ jo maiṅ karūṅgā. jab maiṅ apne sau logoṅ ke sāth ḵẖaimāgāh ke kināre pahuṅchūṅgā to ham apne narasiṅgoṅ ko bajā deṅge. yah sunte hī āp bhī yahī kuchh kareṅ aur sāth sāth nārā lagāeṅ, ‘rabb ke liye aur jidāūn ke liye’!”

¹⁹taqrīban ādhī rāt ko jidāūn apne sau mardoṅ ke sāth midiyānī ḵẖaimāgāh ke kināre pahuṅch gayā. thoṛī der pahale paharedār badal gae the. achānak isrāīliyoṅ ne apne narasiṅgoṅ ko bajāyā aur apne ghaṛoṅ ko ṭukṛe ṭukṛe kar diyā. ²⁰fauran sau sau ke dūsre do gurohoṅ ne bhī aisā hī kiyā. apne dahane hāth meṅ narsiṅgā aur bāeṅ hāth meṅ bhaṛaktī mash’al pakaṛ kar vah nārā lagāte rahe, “rabb ke liye aur jidāūn ke liye!” ²¹lekin vah ḵẖaimāgāh meṅ dāḵẖil na hue balki vahīṅ us ke ird-gird khaṛe rahe. dushman meṅ baṛī afrā-tafrī mach gaī. chīḵẖte chillāte sab bhāg jāne kī koshish karne lage. ²²jidāūn ke 300 ādmī apne narsiṅge bajāte rahe jabki rabb ne ḵẖaimāgāh meṅ aisī gaṛbaṛ paidā kī ki log ek dūsre se laṛne lage. āḵẖirkār pūrā lashkar bait-sittā, sarīrāt aur abīl-mahūlā kī sarhadd tak farār huā jo tabbāt ke qarīb hai.

²³phir jidāūn ne naftālī, āshar aur pūre manassī ke mardoṅ ko bulā liyā, aur unhoṅ ne mil kar midiyāniyoṅ kā tāqqub kiyā. ²⁴us ne apne qāsidoṅ ke zarīe ifrāīm ke pūre pahāṛī ilāqe ke bāshindoṅ ko bhī paiġām bhej diyā, “utar āeṅ aur midiyāniyoṅ ko bhāg jāne se rokeṅ! bait-bārā tak un tamām jagahoṅ par qabzā kar leṅ jahāṅ dushman daryā-e-yardan ko pā-payādā pār kar saktā hai.”

ifrāīmī mān gae, ²⁵aur unhoṅ ne do midiyānī sardāroṅ ko pakaṛ kar un ke sar qalam kar die. sardāroṅ ke nām oreb aur zaeb the, aur jahāṅ unheṅ pakṛā gayā un jagahoṅ ke nām ‘oreb kī chaṭān’ aur ‘zaeb kā aṅgūr kā ras nikālne vālā hauz’ paṛ gayā. is ke bād vah dubārā midiyāniyoṅ kā tāqqub karne lage. daryā-e-yardan ko pār karne par un kī mulāqāt jidāūn se huī, aur unhoṅ ne donoṅ sardāroṅ ke sar us ke sapurd kar die.