Judges 8

Kuzāt 8

ifrāīm nārāz ho jātā hai

¹lekin ifrāīm ke mardoṅ ne shikāyat kī, “āp ne ham se kaisā sulūk kiyā? āp ne hameṅ kyūṅ nahīṅ bulāyā jab midiyān se laṛne gae?” aisī bāteṅ karte karte unhoṅ ne jidāūn ke sāth saḵẖt bahs kī. ²lekin jidāūn ne javāb diyā, “kyā āp mujh se kahīṅ ziyādā kāmyāb na hue? aur jo aṅgūr fasal jamā karne ke bād ifrāīm ke bāġoṅ meṅ rah jāte haiṅ kyā vah mere chhoṭe ḵẖāndān abīazar kī pūrī fasal se ziyādā nahīṅ hote? ³allāh ne to midiyān ke sardāroṅ oreb aur zaeb ko āp ke havāle kar diyā. is kī nisbat mujh se kyā kāmyābī hāsil huī hai?” yah sun kar ifrāīm ke mardoṅ kā ġussā ṭhaṅḍā ho gayā.

sukkāt aur fanūel jidāūn kī madad nahīṅ karte

⁴jidāūn apne 300 mardoṅ samet daryā-e-yardan ko pār kar chukā thā. dushman kā tāqqub karte karte vah thak gae the. ⁵is liye jidāūn ne qarīb ke shahar sukkāt ke bāshindoṅ se guzārish kī, “mere faujiyoṅ ko kuchh roṭī de deṅ. vah thak gae haiṅ, kyūṅki ham midiyānī sardār zibah aur zalmunnā kā tāqqub kar rahe haiṅ.” ⁶lekin sukkāt ke buzurgoṅ ne javāb diyā, “ham āp ke faujiyoṅ ko roṭī kyūṅ deṅ? kyā āp zibah aur zalmunnā ko pakaṛ chuke haiṅ ki ham aisā kareṅ?” ⁷yah sun kar jidāūn ne kahā, “jūṅ hī rabb in do sardāroṅ zibah aur zalmunnā ko mere hāth meṅ kar degā maiṅ tum ko registān kī kāṅṭedār jhāṛiyoṅ aur ūṅṭakaṭāroṅ se gāh kar tabāh kar dūṅgā.”

⁸vah āge nikal kar fanūel shahar pahuṅch gayā. vahāṅ bhī us ne roṭī māṅgī, lekin fanūel ke bāshindoṅ ne sukkāt kā sā javāb diyā. ⁹yah sun kar us ne kahā, “jab maiṅ salāmatī se vāpas āūṅgā to tumhārā yah burj girā dūṅgā!”

midiyāniyoṅ par pūrī fatah

¹⁰ab zibah aur zalmunnā qarqūr pahuṅch gae the. 15,000 afrād un ke sāth rah gae the, kyūṅki mashriqī ittihādiyoṅ ke 1,20,000 talvāroṅ se les faujī halāk ho gae the. ¹¹jidāūn ne midiyāniyoṅ ke pīchhe chalte hue ḵẖānābadoshoṅ kā vah rāstā istemāl kiyā jo nūbah aur yugabahā ke mashriq meṅ hai. is tarīqe se us ne un kī lashkargāh par us vaqt hamlā kiyā jab vah apne āp ko mahfūz samajh rahe the. ¹²dushman meṅ afrā-tafrī paidā huī aur zibah aur zalmunnā farār ho gae. lekin jidāūn ne un kā tāqqub karte karte unheṅ pakaṛ liyā.

¹³is ke bād jidāūn lauṭā. vah abhī haris ke darrā se utar rahā thā ¹⁴ki sukkāt ke ek javān ādmī se milā. jidāūn ne use pakaṛ kar majbūr kiyā ki vah shahar ke rāhanumāoṅ aur buzurgoṅ kī faharist likh kar de. 77 buzurg the. ¹⁵jidāūn un ke pās gayā aur kahā, “dekho, yah haiṅ zibah aur zalmunnā! tum ne in hī kī vajah se merā mazāq uṛā kar kahā thā ki ham āp ke thakehāre faujiyoṅ ko roṭī kyūṅ deṅ? kyā āp zibah aur zalmunnā ko pakaṛ chuke haiṅ ki ham aisā kareṅ?” ¹⁶phir jidāūn ne shahar ke buzurgoṅ ko giriftār karke unheṅ kāṅṭedār jhāṛiyoṅ aur ūṅṭakaṭāroṅ se gāh kar sabaq sikhāyā. ¹⁷phir vah fanūel gayā aur vahāṅ kā burj girā kar shahar ke mardoṅ ko mār ḍālā.

¹⁸is ke bād jidāūn zibah aur zalmunnā se muḵẖātib huā. us ne pūchhā, “un ādmiyoṅ kā hulyā kaisā thā jinheṅ tum ne tabūr pahāṛ par qatl kiyā?”

unhoṅ ne javāb diyā, “vah āp jaise the, har ek shahzādā lag rahā thā.”

¹⁹jidāūn bolā, “vah mere sage bhāī the. rabb kī hayāt kī qasam, agar tum un ko zindā chhoṛte to maiṅ tumheṅ halāk na kartā.”

²⁰phir vah apne pahalauṭhe yatar se muḵẖātib ho kar bolā, “in ko mār ḍālo!” lekin yatar apnī talvār miyān se nikālne se jhijkā, kyūṅki vah abhī bacchā thā aur ḍartā thā. ²¹tab zibah aur zalmunnā ne kahā, “āp hī hameṅ mār deṅ! kyūṅki jaisā ādmī vaisī us kī tāqat!” jidāūn ne khaṛe ho kar unheṅ talvār se mār ḍālā aur un ke ūṅṭoṅ kī gardanoṅ par lage tāvīz utār kar apne pās rakhe.

jidāūn ke sabab se isrāīl butparastī meṅ ulajh jātā hai

²²isrāīliyoṅ ne jidāūn ke pās ā kar kahā, “āp ne hameṅ midiyāniyoṅ se bachā liyā hai, is liye ham par hukūmat kareṅ, āp, āp ke bād āp kā beṭā aur us ke bād āp kā potā.”

²³lekin jidāūn ne javāb diyā, “na maiṅ āp par hukūmat karūṅgā, na merā beṭā. rabb hī āp par hukūmat karegā. ²⁴merī sirf ek guzārish hai. har ek mujhe apne lūṭe hue māl meṅ se ek ek bālī de de.” bāt yah thī ki dushman ke tamām afrād ne sone kī bāliyāṅ pahan rakhī thīṅ, kyūṅki vah ismāīlī the.

²⁵isrāīliyoṅ ne kahā, “ham ḵẖushī se bālī deṅge.” ek chādar zamīn par bichhā kar har ek ne ek ek bālī us par phaiṅk dī. ²⁶sone kī in bāliyoṅ kā vazan taqrīban 20 kilogrām thā. is ke ilāvā isrāīliyoṅ ne muḵẖtalif tāvīz, kān ke āveze, arġvānī raṅg ke shāhī libās aur ūṅṭoṅ kī gardanoṅ meṅ lagī qīmtī zanjīreṅ bhī de dīṅ.

²⁷is sone se jidāūn ne ek afod ^[a] ām taur par ibrānī meṅ afod kā matlab imām-e-āzam kā bālāposh thā (dekhie ḵẖurūj 28:4), lekin yahāṅ is se murād butparastī kī koī chīz hai. banā kar use apne ābāī shahar ufrā meṅ khaṛā kiyā jahāṅ vah us ke aur tamām ḵẖāndān ke liye phaṅdā ban gayā. na sirf yah balki pūrā isrāīl zinā karke but kī pūjā karne lagā.

²⁸us vaqt midiyān ne aisī shikast khāī ki bād meṅ isrāīl ke liye ḵẖatre kā bāis na rahā. aur jitnī der jidāūn zindā rahā yānī 40 sāl tak mulk meṅ amn-o-amān qāim rahā.

²⁹jaṅg ke bād jidāūn bin yūās dubārā ufrā meṅ rahane lagā. ³⁰us kī bahut sī bīviyāṅ aur 70 beṭe the. ³¹us kī ek dāshtā bhī thī jo sikam shahar meṅ rihāishpazīr thī aur jis ke ek beṭā paidā huā. jidāūn ne beṭe kā nām abīmlik rakhā. ³²jidāūn umrrasīdā thā jab faut huā. use abīazariyoṅ ke shahar ufrā meṅ us ke bāp yūās kī qabr meṅ dafnāyā gayā.

³³jidāūn ke marte hī isrāīlī dubārā zinā karke bāl ke butoṅ kī pūjā karne lage. vah bāl-barīt ko apnā ḵẖās devtā banā kar ³⁴rabb apne ḵẖudā ko bhūl gae jis ne unheṅ ird-gird ke dushmanoṅ se bachā liyā thā. ³⁵unhoṅ ne yarubbāl yānī jidāūn ke ḵẖāndān ko bhī us ehsān ke liye koī meharbānī na dikhāī jo jidāūn ne un par kiyā thā.