Rūt 3
rūt kī shādī kī koshisheṅ
1ek din naomī rūt se muḵẖātib huī, “beṭī, maiṅ āp ke liye ghar kā band-o-bast karnā chāhatī hūṅ, aisī jagah jahāṅ āp kī zarūriyāt āindā bhī pūrī hotī raheṅgī. 2ab dekheṅ, jis ādmī kī naukrāniyoṅ ke sāth āp ne bāleṅ chunī haiṅ vah hamārā qarībī rishtedār hai. āj shām ko boaz gāhane kī jagah par jau phaṭkegā. 3to sun leṅ, acchhī tarah nahā kar ḵẖushbūdār tel lagā leṅ aur apnā sab se ḵẖūbsūrat libās pahan leṅ. phir gāhane kī jagah jāeṅ. lekin use patā na chale ki āp āī haiṅ. jab vah khāne-pīne se fāriġ ho jāeṅ 4to dekh leṅ ki boaz sone ke liye kahāṅ leṭ jātā hai. phir jab vah so jāegā to vahāṅ jāeṅ aur kambal ko us ke pairoṅ se utār kar un ke pās leṭ jāeṅ. bāqī jo kuchh karnā hai vah āp ko usī vaqt batāegā.”
5rūt ne javāb diyā, “ṭhīk hai. jo kuchh bhī āp ne kahā hai maiṅ karūṅgī.” 6vah apnī sās kī hidāyat ke mutābiq tayyār huī aur shām ke vaqt gāhane kī jagah par pahuṅchī. 7vahāṅ boaz khāne-pīne aur ḵẖushī manāne ke bād jau ke ḍher ke pās leṭ kar so gayā. phir rūt chupke se us ke pās āī. us ke pairoṅ se kambal haṭā kar vah un ke pās leṭ gaī.
8ādhī rāt ko boaz ghabrā gayā. ṭaṭol ṭaṭol kar use patā chalā ki pairoṅ ke pās aurat paṛī hai. 9us ne pūchhā, “kaun hai?” rūt ne javāb diyā, “āp kī ḵẖādimā rūt. merī ek guzārish hai. chūṅki āp mere qarībī rishtedār haiṅ is liye āp kā haq hai ki merī zarūriyāt pūrī kareṅ. meharbānī karke apne libās kā dāman mujh par bichhā kar zāhir kareṅ ki mere sāth shādī kareṅge.”
10boaz bolā, “beṭī, rabb āp ko barkat de! ab āp ne apne susrāl se vafādārī kā pahale kī nisbat ziyādā izhār kiyā hai, kyūṅki āp javān ādmiyoṅ ke pīchhe na lagīṅ, ḵẖwāh ġarīb hoṅ yā amīr. 11beṭī, ab fikr na kareṅ. maiṅ zarūr āp kī yah guzārish pūrī karūṅgā. āḵẖir tamām maqāmī log jān gae haiṅ ki āp sharīf aurat haiṅ. 12āp kī bāt sacch hai ki maiṅ āp kā qarībī rishtedār hūṅ aur yah merā haq hai ki āp kī zarūriyāt pūrī karūṅ. lekin ek aur ādmī hai jis kā āp se ziyādā qarībī rishtā hai. 13rāt ke liye yahāṅ ṭhahareṅ! kal maiṅ us ādmī se bāt karūṅgā. agar vah āp se shādī karke rishtedārī kā haq adā karnā chāhe to ṭhīk hai. agar nahīṅ to rabb kī qasam, maiṅ yah zarūr karūṅgā. āp subah ke vaqt tak yahīṅ leṭī raheṅ.”
14chunāṅche rūt boaz ke pairoṅ ke pās leṭī rahī. lekin vah subah muṅh aṅdhere uṭh kar chalī gaī tāki koī use pahachān na sake, kyūṅki boaz ne kahā thā, “kisī ko patā na chale ki koī aurat yahāṅ gāhane kī jagah par mere pās āī hai.” 15rūt ke jāne se pahale boaz bolā, “apnī chādar bichhā deṅ!” phir us ne koī bartan chhah dafā jau ke dānoṅ se bhar kar chādar meṅ ḍāl diyā aur use rūt ke sar par rakh diyā. phir vah shahar meṅ vāpas chalā gayā.
16jab rūt ghar pahuṅchī to sās ne pūchhā, “beṭī, vaqt kaisā rahā?” rūt ne use sab kuchh sunāyā jo boaz ne javāb meṅ kiyā thā. 17rūt bolī, “jau ke yah dāne bhī us kī taraf se haiṅ. vah nahīṅ chāhatā thā ki maiṅ ḵẖālī hāth āp ke pās vāpas āūṅ.” 18yah sun kar naomī ne rūt ko tasallī dī, “beṭī, jab tak koī natījā na nikle yahāṅ ṭhahar jāeṅ. ab yah ādmī ārām nahīṅ karegā balki āj hī muāmale kā hal nikālegā.”