1 Samooel 1
hanna allaah say bachcha maangtee hai
1ifraaeem kay pahaadee ilaaqay kay shaher raamaataaim-sofeem yaanee raama men ek ifraaeemee raheta tha jis ka naam ilqaana bin yarohaam bin ileehoo bin tookhoo bin soof tha. 2ilqaana kee do beeviyaan theen. ek ka naam hanna tha aur doosree ka faninna. faninna kay bachchay thay, lekin hanna beaulaad thee.
3ilqaana har saal apnay khaandaan samet safar karkay saila kay maqdis kay paas jaata taaki vahaan rabb-ul-afwaaj kay huzoor qurbaanee guzraanay aur us kee parastish karay. un dinon men elee imaam kay do betay hufnee aur feenhaas saila men imaam kee khidmat anjaam detay thay. 4har saal ilqaana apnee qurbaanee pesh karnay kay baad qurbaanee kay gosht kay tukday faninna aur us kay betay-betiyon men taqseem karta. 5hanna ko bhee gosht milta, lekin jahaan doosron ko ek hissa milta vahaan usay do hissay miltay thay. kyoonki ilqaana us say bahut muhabbat rakhta tha, agarchi ab tak rabb kee marzee naheen thee ki hanna kay bachchay paida hon. 6faninna kee hanna say dushmanee thee, is liyay vah har saal hanna kay baanjhpan ka mazaaq uda kar usay tang kartee thee. 7saal-ba-saal aisa hee hua karta tha. jab bhee vah rabb kay maqdis kay paas jaatay to faninna hanna ko itna tang kartee ki vah us kee baaten sun sun kar ro padtee aur kha pee na saktee. 8phir ilqaana poochhta, “hanna, too kyoon ro rahee hai? too khaana kyoon naheen kha rahee? udaas honay kee kya zaroorat? main to hoon. kya yah das beton say kaheen behatar naheen?”
9ek din jab vah saila men thay to hanna khaanay-peenay kay baad uth kar rabb kay maqdis kay paas gaee. vahaan elee imaam darvaazay kay paas kursee par baitha tha. 10hanna daakhil huee aur shadeed pareshaanee kay aalam men phoot phoot kar ronay lagee. rabb say dua kartay karte 11us nay qasam khaaee, “ai rabb-ul-afwaaj, meree buree haalat par nazar daal kar mujhay yaad kar! apnee khaadima ko mat bhoolna balki beta ata farma! agar too aisa karay to main usay tujhay vaapas kar doongee. ai rabb, us kee pooree zindagee teray liyay makhsoos hogee! is ka nishaan yah hoga ki us kay baal kabhee naheen katvaaay jaaengay.”
12hanna badee der tak yoon dua kartee rahee. elee us kay munh par ghaur karnay lagaa 13to dekha ki hanna kay hont to hil rahay hain lekin aavaaz sunaaee naheen day rahee, kyoonki hanna dil hee dil men dua kar rahee thee. lekin elee ko aisa lag raha tha ki vah nashay men dhut hai, 14is liyay us nay usay jhidaktay huay kaha, “too kab tak nashay men dhut rahegee? mai peenay say baaz a!”
15hanna nay javaab diya, “meray aaqa, aisee koee baat naheen hai. main nay na mai, na koee aur nashaaaavar cheez chakhee hai. baat yah hai ki main badee ranjeeda hoon, is liyay rabb kay huzoor apnay dil kee aah-o-zaaree [a] lafzee tarjuma : apnee jaan undel dee hai. undel dee hai. 16yah na samjhen ki main nikammee aurat hoon, balki main baday gham aur aziyat men dua kar rahee thee.”
17yah sun kar elee nay javaab diya, “salaamatee say apnay ghar chalee ja! israaeel ka khuda teree darakhwaast pooree karay.” 18hanna nay kaha, “apnee khaadima par aap kee nazar-ay-karam ho.” phir us nay ja kar kuchh khaaya, aur us ka chihara udaas na raha.
samooel kee paidaaish aur bachpan
19aglay din poora khaandaan subah-saveray utha. unhon nay maqdis men ja kar rabb kee parastish kee, phir raama vaapas chalay gaay jahaan un ka ghar tha. aur rabb nay hanna ko yaad karkay us kee dua sunee. 20ilqaana aur hanna kay beta paida hua. hanna nay us ka naam samooel yaanee ‘us ka naam allaah hai’ rakha, kyoonki us nay kaha, “main nay usay rabb say maanga.”
21aglay saal ilqaana khaandaan kay saath maamool kay mutaabiq saila gaya taaki rabb ko saalaana qurbaanee pesh karay aur apnee mannat pooree karay. 22lekin hanna na gaee. us nay apnay shauhar say kaha, “jab bachcha doodh peena chhod dega tab hee main usay lay kar rabb kay huzoor pesh karoongee. us vaqt say vah hamesha vaheen rahega.” 23ilqaana nay javaab diya, “vah kuchh kar jo tujhay munaasib lagay. bachchay ka doodh chhudaanay tak yahaan rah. lekin rabb apna kalaam qaaim rakhay.” chunaanchay hanna bachchay kay doodh chhudaanay tak ghar men rahee.
24jab samooel nay doodh peena chhod diya to hanna usay saila men rabb kay maqdis kay paas lay gaee, go bachcha abhee chhota tha. qurbaaniyon kay liyay us kay paas teen bail, maiday kay taqreeban 16 kilograam aur mai kee mashk thee. 25bail ko qurbaangaah par chadhaanay kay baad ilqaana aur hanna bachchay ko elee kay paas lay gaay. 26hanna nay kaha, “meray aaqa, aap kee hayaat kee qasam, main vahee aurat hoon jo kuchh saal pahelay yahaan aap kee maujoodgee men khadee dua kar rahee thee. 27us vaqt main nay iltimaas kee thee ki rabb mujhay beta ata karay, aur rabb nay meree sunee hai. 28chunaanchay ab main apna vaada poora karkay betay ko rabb ko vaapas kar detee hoon. umr bhar vah rabb kay liyay makhsoos hoga.” tab us nay rabb kay huzoor sijda kiya.