1 Samooel 13

filistiyon say jang

¹saaool 30 saal ka tha jab takhtnasheen hua. do saal hukoomat karnay kay baad ²us nay apnee fauj kay liyay 3,000 israaeelee chun liyay. jang ladnay kay qaabil baaqee aadmiyon ko us nay faarigh kar diya. 2,000 faujiyon kee dyootee mikmaas aur bait-el kay pahaadee ilaaqay men lagaaee gaee jahaan saaool khud tha. baaqee 1,000 afraad yoontan kay paas binyameen kay shaher jibia men thay.

³ek din yoontan nay jibia kee filistee chaukee par hamla karkay usay shikast dee. jald hee yah khabar doosray filistiyon tak pahunch gaee. saaool nay mulk kay konay konay men qaasid bhej diay, aur vah narsinga bajaatay bajaatay logon ko yoontan kee fatah sunaatay gaay. ⁴tamaam israaeel men khabar phail gaee, “saaool nay jibia kee filistee chaukee ko tabaah kar diya hai, aur ab israaeel filistiyon kee khaas nafrat ka nishaana ban gaya hai.” saaool nay tamaam mardon ko filistiyon say ladnay kay liyay jiljaal men bulaaya.

⁵filistee bhee israaeeliyon say ladnay kay liyay jama huay. un kay 30,000 rath, 6,000 ghudsavaar aur saahil kee ret jaisay beshumaar piyaada faujee thay. unhon nay bait-aavan kay mashriq men mikmaas kay qareeb apnay khaimay lagaaay. ⁶israaeeliyon nay dekha ki ham baday khatray men a gaay hain, aur dushman ham par bahut dabaao daal raha hai to pareshaanee kay aalam men kuchh ghaaron aur daraadon men aur kuchh pattharon kay darmiyaan ya qabron aur hauzon men chhup gaay. ⁷kuchh itnay dar gaay ki vah darya-ay-yardan ko paar karkay jad aur jiliaad kay ilaaqay men chalay gaay.

saaool kee besabree

saaool ab tak jiljaal men tha, lekin jo aadmee us kay saath rahay thay vah khauf kay maaray tharathra rahay thay. ⁸samooel nay saaool ko hidaayat dee thee ki saat din mera intizaar karen. lekin saat din guzar gaay, aur samooel na aaya. saaool kay faujee muntashir honay lage ⁹to saaool nay hukm diya, “bhasm honay vaalee aur salaamatee kee qurbaaniyaan lay aao.” phir us nay khud qurbaaniyaan pesh keen.

¹⁰vah abhee is kaam say faarigh hee hua tha ki samooel pahunch gaya. saaool usay khush’aamadeed kahenay kay liyay nikla. ¹¹lekin samooel nay poochha, “aap nay kya kiya?”

saaool nay javaab diya, “log muntashir ho rahay thay, aur aap vaqt par na aaay. jab main nay dekha ki filistee mikmaas kay qareeb jama ho rahay hain ¹²to main nay socha, ‘filistee yahaan jiljaal men a kar mujh par hamla karnay ko hain, haalaanki main nay abhee rabb say dua naheen kee ki vah ham par meharbaanee karay.’ is liyay main nay jur’at karkay khud qurbaaniyaan pesh keen.”

¹³samooel bola, “yah kaisee ahemaqaana harkat thee! aap nay rabb apnay khuda ka hukm na maana. rabb to aap aur aap kee aulaad ko hamesha kay liyay israaeel par muqarrar karna chaahata tha. ¹⁴lekin ab aap kee baadashaahat qaaim naheen rahegee. choonki aap nay us kee na sunee is liyay rabb nay kisee aur ko chun kar apnee qaum ka raahanuma muqarrar kiya hai, ek aisay aadmee ko jo us kee soch rakhega.”

¹⁵phir samooel jiljaal say chala gaya.

jang kee tayyaariyaan

bachay huay israaeelee saaool kay peechhay dushman say ladnay gaay. vah jiljaal say ravaana ho kar jibia pahunch gaay. jab saaool nay vahaan fauj ka jaaiza liya to bas 600 afraad rah gaay thay. ¹⁶saaool, yoontan aur un kee fauj binyameen kay shaher jibia men tik gaay jabki filistee mikmaas kay paas khaimaazan thay. ¹⁷kuchh der kay baad filistiyon kay teen dastay mulk ko lootnay kay liyay niklay. ek sooaal kay ilaaqay kay shaher ufra kee taraf chal pada, ¹⁸doosra bait-hauroon kee taraf aur teesra us pahaadee silsilay kee taraf jahaan say vaadee-ay-zaboeem aur registaan dekha ja sakta hai.

¹⁹un dinon men pooray mulk-ay-israaeel men lohaar naheen tha, kyoonki filistee naheen chaahatay thay ki israaeelee talvaaren ya nezay banaaen. ²⁰apnay halon, kudaalon, kulhaadiyon ya daraantiyon ko tez karvaanay kay liyay tamaam israaeeliyon ko filistiyon kay paas jaana padta tha. ²¹filistee halon, kudaalon, kaanton aur kulhaadiyon ko tez karnay kay liyay aur aankuson kee nok theek karnay kay liyay chaandee kay sikkay kee do tihaaee letay thay. ²²nateejay men us din saaool aur yoontan kay siva kisee bhee israaeelee kay paas talvaar ya neza naheen tha.

yoontan filistiyon par hamla karta hai

²³filistiyon nay mikmaas kay darray par qabza karkay vahaan chaukee qaaim kee thee.