1 Samooel 14

¹ek din yoontan nay apnay javaan silaahabardaar say kaha, “aao, ham parlee taraf jaaen jahaan filistee fauj kee chaukee hai.” lekin us nay apnay baap ko ittila na dee.

²saaool us vaqt anaar kay darakht kay saay men baitha tha jo jibia kay qareeb kay mijron men tha. 600 mard us kay paas thay. ³akhiyaah imaam bhee saath tha jo imaam ka baalaaposh pahenay huay tha. akhiyaah yakbod kay bhaaee akheetoob ka beta tha. us ka daada feenhaas aur pardaada elee tha, jo puraanay zamaanay men saila men rabb ka imaam tha. kisee ko bhee maaloom na tha ki yoontan chala gaya hai.

^4-5 filistee chaukee tak pahunchnay kay liyay yoontan nay ek tang raasta ikhtiyaar kiya jo do kadaadon kay darmiyaan say guzarta tha. pahelay ka naam bosees tha, aur vah shimaal men mikmaas kay muqaabil tha. doosray ka naam sana tha, aur vah junoob men jiba kay muqaabil tha. ⁶yoontan nay apnay javaan silaahabardaar say kaha, “aao, ham parlee taraf jaaen jahaan in naamakhtoonon kee chaukee hai. shaayad rabb hamaaree madad karay, kyoonki us kay nazdeek koee farq naheen ki ham ziyaada hon ya kam.” ⁷us ka silaahabardaar bola, “jo kuchh aap theek samajhtay hain, vahee karen. zaroor jaaen. jo kuchh bhee aap kahengay, main haazir hoon.” ⁸yoontan bola, “theek hai. phir ham yoon dushmanon kee taraf badhtay jaaengay, ki ham unhen saaf nazar aaen. ⁹agar vah hamen dekh kar pukaaren, ‘ruk jaao, varna ham tumhen maar dengay!’ to ham apnay mansoobay say baaz a kar un kay paas naheen jaaengay. ¹⁰lekin agar vah pukaaren, ‘aao, hamaaray paas a jaao!’ to ham zaroor un kay paas chadh jaaengay. kyoonki yah is ka nishaan hoga ki rabb unhen hamaaray qabzay men kar dega.”

¹¹chunaanchay vah chaltay chaltay filistee chaukee ko nazar aaay. filistee shor machaanay lagay, “dekho, israaeelee apnay chhupnay kay bilon say nikal rahay hain!” ¹²chaukee kay faujiyon nay donon ko chailenj kiya, “aao, hamaaray paas aao to ham tumhen sabaq sikhaaengay.” yah sun kar yoontan nay apnay silaahabardaar ko aavaaz dee, “aao, meray peechhay chalo! rabb nay unhen israaeel kay havaalay kar diya hai.” ¹³donon apnay haathon aur pairon kay bal chadhtay chadhtay chaukee tak ja pahunchay. jab yoontan aagay aagay chal kar filistiyon kay paas pahunch gaya to vah us kay saamnay girtay gaay. saath saath silaahabardaar peechhay say logon ko maarta gaya.

¹⁴is pahelay hamlay kay dauraan unhon nay taqreeban 20 aadmiyon ko maar daala. un kee laashen aadh ekad zameen par bikhree padee theen. ¹⁵achaanak pooree fauj men dahshat phail gaee, na sirf lashkargaah balki khulay maidaan men bhee. chaukee kay mard aur lootnay vaalay dastay bhee thartharaanay lagay. saath saath zalzla aaya. rabb nay tamaam filistee faujiyon kay dilon men dahshat paida kee.

rabb filistiyon par fatah deta hai

¹⁶saaool kay jo paheredaar jibia say dushman kee harkaton par ghaur kar rahay thay unhon nay achaanak dekha ki filistee fauj men halchal mach gaee hai, afra-tafree kabhee is taraf, kabhee us taraf badh rahee hai. ¹⁷saaool nay fauran hukm diya, “faujiyon ko gin kar maaloom karo ki kaun chala gaya hai.” maaloom hua ki yoontan aur us ka silaahabardaar maujood naheen hain. ¹⁸saaool nay akhiyaah ko hukm diya, “ahd ka sandooq lay aaen.” kyoonki vah un dinon men israaeelee kaimp men tha. ¹⁹lekin saaool abhee akhiyaah say baat kar raha tha ki filistee lashkargaah men hangaama aur shor bahut ziyaada badh gaya. saaool nay imaam say kaha, “koee baat naheen, rahenay den.” ²⁰vah apnay 600 afraad ko lay kar fauran dushman par toot pada. jab un tak pahunch gaay to maaloom hua ki filistee ek doosray ko qatl kar rahay hain, aur har taraf hangaama hee hangaama hai.

²¹filistiyon nay kaafee israaeeliyon ko apnee fauj men shaamil kar liya tha. ab yah log filistiyon ko chhod kar saaool aur yoontan kay peechhay ho liyay. ²²in kay ilaava jo israaeelee ifraaeem kay pahaadee ilaaqay men idhar udhar chhup gaay thay, jab unhen khabar milee ki filistee bhaag rahay hain to vah bhee un ka taaqqub karnay lagay. ²³ladtay ladtay maidaan-ay-jang bait-aavan tak phail gaya. is tarah rabb nay us din israaeeliyon ko bacha liya.

saaool kee besochay-samjhay laanat

²⁴us din israaeelee sakht ladaaee kay baais badee museebat men thay. is liyay saaool nay qasam kha kar kaha, “us par laanat jo shaam say pahelay khaana khaaay. pahelay main apnay dushman say intiqaam loonga, phir hee sab kha pee saktay hain.” is vajah say kisee nay rotee ko haath tak na lagaaya. ²⁵pooree fauj jangal men daakhil huee to vahaan zameen par shahed kay chhattay thay. ²⁶tamaam log jab un kay paas say guzray to dekha ki un say shahed tapak raha hai. lekin kisee nay thoda bhee lay kar khaanay kee jur’at na kee, kyoonki sab saaool kee laanat say dartay thay.

²⁷yoontan ko laanat ka ilm na tha, is liyay us nay apnee laathee ka sira kisee chhattay men daal kar usay chaat liya. us kee aankhen fauran chamak utheen, aur vah taazaadam ho gaya. ²⁸kisee nay dekh kar yoontan ko bataaya, “aap kay baap nay fauj say qasam khila kar elaan kiya hai ki us par laanat jo is din kuchh khaaay. isee vajah say ham sab itnay nidhaal ho gaay hain.” ²⁹yoontan nay javaab diya, “meray baap nay mulk ko museebat men daal diya hai! dekho, is thoday say shahed ko chakhnay say meree aankhen kitnee chamak utheen aur main kitna taazaadam ho gaya. ³⁰behatar hota ki hamaaray log dushman say lootay huay maal men say kuchh na kuchh kha letay. lekin is haalat men ham filistiyon ko kis tarah ziyaada nuqsaan pahuncha saktay hain?”

³¹us din israaeelee filistiyon ko mikmaas say maar maar kar ayyaalon tak pahunch gaay. lekin shaam kay vaqt vah nihaayat nidhaal ho gaay thay. ³²phir vah lootay huay revdon par toot paday. unhon nay jaldee jaldee bhed-bakriyon, gaay-bailon aur bachhdon ko zabah kiya. bhook kee shiddat kee vajah say unhon nay khoon ko saheeh taur say nikalnay na diya balki jaanvaron ko zameen par chhod kar gosht ko khoon samet khaanay lagay.

³³kisee nay saaool ko ittila dee, “dekhen, log rabb ka gunaah kar rahay hain, kyoonki vah gosht kha rahay hain jis men ab tak khoon hai.” yah sun kar saaool pukaar utha, “aap rabb say vafaadaar naheen rahay!” phir us nay saath vaalay aadmiyon ko hukm diya, “koee bada patthar ludhka kar idhar lay aaen! ³⁴phir tamaam aadmiyon kay paas ja kar unhen bata dena, ‘apnay jaanvaron ko meray paas lay aaen taaki unhen patthar par zabah karkay khaaen. varna aap khoon’aalooda gosht kha kar rabb ka gunaah karengay’.”

sab maan gaay. us shaam vah saaool kay paas aaay aur apnay jaanvaron ko patthar par zabah kiya. ³⁵vahaan saaool nay pahelee dafa rabb kee taazeem men qurbaangaah banaaee.

³⁶phir us nay elaan kiya, “aaen, ham abhee isee raat filistiyon ka taaqqub karkay un men loot-maar ka silsila jaaree rakhen taaki ek bhee na bachay.” faujiyon nay javaab diya, “theek hai, vah kuchh karen jo aap ko munaasib lagay.” lekin imaam bola, “pahelay ham allaah say hidaayat len.” ³⁷chunaanchay saaool nay allaah say poochha, “kya ham filistiyon ka taaqqub jaaree rakhen? kya too unhen israaeel kay havaalay kar dega?” lekin is martaba allaah nay javaab na diya.

³⁸yah dekh kar saaool nay fauj kay tamaam raahanumaaon ko bula kar kaha, “kisee nay gunaah kiya hai. maaloom karnay kee koshish karen ki kaun qusoorvaar hai. ³⁹rabb kee hayaat kee qasam jo israaeel ka najaatadihanda hai, qusoorvaar ko fauran saza-ay-maut dee jaaegee, khwaah vah mera beta yoontan kyoon na ho.” lekin sab khaamosh rahay.

⁴⁰tab saaool nay dubaara elaan kiya, “pooree fauj ek taraf khadee ho jaaay aur yoontan aur main doosree taraf.” logon nay javaab diya, “jo aap ko munaasib lagay vah karen.” ⁴¹phir saaool nay rabb israaeel kay khuda say dua kee, “ai rabb, hamen dikha ki kaun qusoorvaar hai!”

jab qur’a daala gaya to yoontan aur saaool kay guroh ko qusoorvaar qaraar diya gaya aur baaqee fauj ko bequsoor. ⁴²phir saaool nay hukm diya, “ab qur’a daal kar pata karen ki main qusoorvaar hoon ya yoontan.” jab qur’a daala gaya to yoontan qusoorvaar thahera. ⁴³saaool nay poochha, “bataaen, aap nay kya kiya?” yoontan nay javaab diya, “main nay sirf thoda sa shahed chakh liya jo meree laathee kay siray par laga tha. lekin main marnay kay liyay tayyaar hoon.” ⁴⁴saaool nay kaha, “yoontan, allaah mujhay sakht saza day agar main aap ko is kay liyay saza-ay-maut na doon.” ⁴⁵lekin faujiyon nay etiraaz kiya, “yah kaisee baat hai? yoontan hee nay apnay zabardast hamlay say israaeel ko aaj bacha liya hai. usay kis tarah saza-ay-maut dee ja saktee hai? kabhee naheen! allaah kee hayaat kee qasam, us ka ek baal bhee beeka naheen hoga, kyoonki aaj us nay allaah kee madad say fatah paaee hai.” yoon faujiyon nay yoontan ko maut say bacha liya.

⁴⁶tab saaool nay filistiyon ka taaqqub karna chhod diya aur apnay ghar chala gaya. filistee bhee apnay mulk men vaapas chalay gaay.

saaool kee jangen

⁴⁷jab saaool takhtnasheen hua to vah mulk kay ird-gird kay tamaam dushmanon say lada. in men moaab, ammon, adom, zobaah kay baadshaah aur filistee shaamil thay. aur jahaan bhee jang chhidee vahaan us nay fatah paaee. ⁴⁸vah nihaayat bahaadur tha. us nay amaaleeqiyon ko bhee shikast dee aur yoon israaeel ko un tamaam dushmanon say bacha liya jo baar baar mulk kee loot-maar kartay thay.

saaool ka khaandaan

⁴⁹saaool kay teen betay thay, yoontan, isvee aur malkeeshooa. us kee badee betee meerab aur chhotee betee meekal thee. ⁵⁰beevee ka naam akheenooam bint akheemaaz tha. saaool kee fauj ka kamaandar abinair tha, jo saaool kay chacha nair ka beta tha. ⁵¹saaool ka baap qees aur abinair ka baap nair sagay bhaaee thay jin ka baap abeeel tha.

⁵²saaool kay jeetay jee filistiyon say sakht jang jaaree rahee. is liyay jab bhee koee bahaadur aur ladnay kay qaabil aadmee nazar aaya to saaool nay usay apnee fauj men bhartee kar liya.