1 Samooel 15

tamaam amaaleeqiyon ko halaak karnay ka hukm

¹ek din samooel nay saaool kay paas a kar us say baat kee, “rabb hee nay mujhay aap ko masah karkay israaeel par muqarrar karnay ka hukm diya tha. ab rabb ka paighaam sun len! ²rabb-ul-afwaaj farmaata hai, ‘main amaaleeqiyon ka meree qaum kay saath sulook naheen bhool sakta. us vaqt jab israaeelee misr say nikal kar kan’aan kee taraf safar kar rahay thay to amaaleeqiyon nay raasta band kar diya tha. ³ab vaqt a gaya hai ki too un par hamla karay. sab kuchh tabaah karkay meray havaalay kar day. kuchh bhee bachnay na day, balki tamaam mardon, aurton, bachchon sheerakhwaaron samet, gaay-bailon, bhed-bakriyon, oonton aur gadhon ko maut kay ghaat utaar day.’”

⁴saaool nay apnay faujiyon ko bula kar talaaim men un ka jaaiza liya. kul 2,00,000 payaaday faujee thay, neez yahoodaah kay 10,000 afraad. ⁵amaaleeqiyon kay shaher kay paas pahunch kar saaool vaadee men taak men baith gaya. ⁶lekin pahelay us nay qeeniyon ko khabar bhejee, “amaaleeqiyon say alag ho kar un kay paas say chalay jaaen, varna aap un kay saath halaak ho jaaengay. kyoonki jab israaeelee misr say nikal kar registaan men safar kar rahay thay to aap nay un par meharbaanee kee thee.” yah khabar miltay hee qeenee amaaleeqiyon say alag ho kar chalay gaay. ⁷tab saaool nay amaaleeqiyon par hamla karkay unhen haveela say lay kar misr kee mashriqee sarhadd shoor tak shikast dee. ⁸pooree qaum ko talvaar say maara gaya, sirf un ka baadshaah ajaaj zinda pakda gaya. ⁹saaool aur us kay faujiyon nay usay zinda chhod diya. isee tarah sab say achchhee bhed-bakriyon, gaay-bailon, motay-taazay bachhdon aur cheeda bhed kay bachchon ko bhee chhod diya gaya. jo bhee achchha tha bach gaya, kyoonki israaeeliyon ka dil naheen karta tha ki tandurust aur motay-taazay jaanvaron ko halaak karen. unhon nay sirf un tamaam kamzor jaanvaron ko khatm kiya jin kee qadar-o-qeemat na thee.

faramaambardaaree qurbaaniyon say ahem hai

¹⁰phir rabb samooel say hamkalaam hua, ¹¹“mujhay dukh hai ki main nay saaool ko baadshaah bana liya hai, kyoonki us nay mujh say door ho kar mera hukm naheen maana.” samooel ko itna ghussa aaya ki vah pooree raat buland aavaaz say rabb say faryaad karta raha. ¹²aglay din vah uth kar saaool say milnay gaya. kisee nay usay bataaya, “saaool karmil chala gaya. vahaan apnay liyay yaadgaar khada karkay vah aagay jiljaal chala gaya hai.” ¹³jab samooel jiljaal pahuncha to saaool nay kaha, “mubaarak ho! main nay rabb ka hukm poora kar diya hai.” ¹⁴samooel nay poochha, “jaanvaron ka yah shor kahaan say a raha hai? bhed-bakriyaan mamya rahee aur gaay-bail dakra rahay hain.” ¹⁵saaool nay javaab diya, “yah amaaleeqiyon kay haan say laaay gaay hain. faujiyon nay sab say achchhay gaay-bailon aur bhed-bakriyon ko zinda chhod diya taaki unhen rabb aap kay khuda kay huzoor qurbaan karen. lekin ham nay baaqee sab ko rabb kay havaalay karkay maar diya.”

¹⁶samooel bola, “khaamosh! pahelay vah baat sun len jo rabb nay mujhay pichhlee raat farmaaee.” saaool nay javaab diya, “bataaen.” ¹⁷samooel nay kaha, “jab aap tamaam qaum kay raahanuma ban gaay to ihsaas-ay-kamatree ka shikaar thay. to bhee rabb nay aap ko masah karkay israaeel ka baadshaah bana diya. ¹⁸aur us nay aap ko bhej kar hukm diya, ‘ja aur amaaleeqiyon ko pooray taur par halaak karkay meray havaalay kar. us vaqt tak in shareer logon say ladta rah jab tak vah sab kay sab mit na jaaen.’ ¹⁹ab mujhay bataaen ki aap nay rabb kee kyoon na sunee? aap lootay huay maal par kyoon toot paday? yah to rabb kay nazdeek gunaah hai.”

²⁰saaool nay etiraaz kiya, “lekin main nay zaroor rabb kee sunee. jis maqsad kay liyay rabb nay mujhay bheja vah main nay poora kar diya hai, kyoonki main amaaleeq kay baadshaah ajaaj ko giriftaar karkay yahaan lay aaya aur baaqee sab ko maut kay ghaat utaar kar rabb kay havaalay kar diya. ²¹meray faujee lootay huay maal men say sirf sab say achchhee bhed-bakriyaan aur gaay-bail chun kar lay aaay, kyoonki vah unhen yahaan jiljaal men rabb aap kay khuda kay huzoor qurbaan karna chaahatay thay.”

²²lekin samooel nay javaab diya, “rabb ko kya baat ziyaada pasand hai, aap kee bhasm honay vaalee aur zabah kee qurbaaniyaan ya yah ki aap us kee suntay hain? sunna qurbaanee say kaheen behatar aur dhyaan dena mendhay kee charbee say kaheen umda hai. ²³sarkashee ghaibdaanee kay gunaah kay baraabar hai aur gharoor butparastee kay gunaah say kam naheen hota. aap nay rabb ka hukm radd kiya hai, is liyay us nay aap ko radd karkay baadshaah ka uhda aap say chheen liya hai.”

²⁴tab saaool nay iqraar kiya, “mujh say gunaah hua hai. main nay aap kee hidaayat aur rabb kay hukm kee khilaafvarzee kee hai. main nay logon say dar kar un kee baat maan lee. ²⁵lekin ab meharbaanee karkay mujhay muaaf karen aur meray saath vaapas aaen taaki main aap kee maujoodgee men rabb kee parastish kar sakoon.” ²⁶lekin samooel nay javaab diya, “main aap kay saath vaapas naheen chaloonga. aap nay rabb ka kalaam radd kiya hai, is liyay rabb nay aap ko radd karkay baadshaah ka uhda aap say chheen liya hai.”

²⁷samooel mud kar vahaan say chalnay laga, lekin saaool nay us kay choghay ka daaman itnay zor say pakad liya ki vah phat kar us kay haath men rah gaya. ²⁸samooel bola, “jis tarah kapda phat kar aap kay haath men rah gaya bilkul usee tarah rabb nay aaj hee israaeel par aap ka ikhtiyaar aap say chheen kar kisee aur ko day diya hai, aisay shakhs ko jo aap say kaheen behatar hai. ²⁹jo israaeel kee shaan-o-shaukat hai vah na jhoot bolta, na kabhee apnee soch ko badalta hai, kyoonki vah insaan naheen ki ek baat kah kar baad men usay badlay.”

³⁰saaool nay dubaara minnat kee, “beshak main nay gunaah kiya hai. lekin baraah-ay-karam kam az kam meree qaum kay buzurgon aur israaeel kay saamnay to meree izzat karen. meray saath vaapas aaen taaki main aap kee maujoodgee men rabb aap kay khuda kee parastish kar sakoon.”

³¹tab samooel maan gaya aur saaool kay saath doosron kay paas vaapas aaya. saaool nay rabb kee parastish kee, ³²phir samooel nay elaan kiya, “amaaleeq kay baadshaah ajaaj ko meray paas lay aao!” ajaaj itmeenaan say samooel kay paas aaya, kyoonki us nay socha, “beshak maut ka khatra tal gaya hai.” ³³lekin samooel bola, “teree talvaar say beshumaar maaen apnay bachchon say maheroom ho gaee hain. ab teree maan bhee beaulaad ho jaaegee.” yah kah kar samooel nay vaheen jiljaal men rabb kay huzoor ajaaj ko talvaar say tukday tukday kar diya.

³⁴phir vah raama vaapas chala gaya, aur saaool apnay ghar gaya jo jibia men tha. ³⁵is kay baad samooel jeetay jee saaool say kabhee na mila, kyoonki vah saaool ka maatam karta raha. lekin rabb ko dukh tha ki main nay saaool ko israaeel par kyoon muqarrar kiya.