1 Samooel 2
hanna ka geet
1vahaan hanna nay yah geet gaaya,
“mera dil rabb kee khushee manaata hai, kyoonki us nay mujhay quvvat ata kee hai. mera munh dileree say apnay dushmanon kay khilaaf baat karta hai, kyoonki main teree najaat kay baais baagh baagh hoon.
2rabb jaisa quddoos koee naheen hai, teray siva koee naheen hai. hamaaray khuda jaisee koee chataan naheen hai. 3deengen maarnay say baaz aao! gustaakh baaten mat bako! kyoonki rabb aisa khuda hai jo sab kuchh jaanta hai, vah tamaam aamaal ko tol kar parakhta hai. 4ab badon kee kamaanen toot gaee hain jabki girnay vaalay quvvat say kamarbasta ho gaay hain. 5jo pahelay ser thay vah rotee milnay kay liyay mazdooree kartay hain jabki jo pahelay bhookay thay vah ser ho gaay hain. beaulaad aurat kay saat bachchay paida huay hain jabki vaafir bachchon kee maan murjha rahee hai.
6rabb ek ko marnay deta aur doosray ko zinda honay deta hai. vah ek ko paataal men utarnay deta aur doosray ko vahaan say nikal aanay deta hai. 7rabb hee ghareeb aur ameer bana deta hai, vahee zer karta aur vahee sarfaraaz karta hai. 8vah khaak men dabay aadmee ko khada karta hai aur raakh men letay zarooratmand ko sarfaraaz karta hai, phir unhen raeeson kay saath izzat kee kursee par bitha deta hai. kyoonki duniya kee bunyaaden rabb kee hain, aur usee nay un par zameen rakhee hai.
9vah apnay vafaadaar pairokaaron kay paaon mahfooz rakhega jabki shareer taareekee men chup ho jaaengay. kyoonki insaan apnee taaqat say kaamyaab naheen hota. 10jo rabb say ladnay kee jur’at karen vah paash paash ho jaaengay. rabb aasmaan say un kay khilaaf garaj kar duniya kee intiha tak sab kee adaalat karega. vah apnay baadshaah ko taqviyat aur apnay masah kiay huay khaadim ko quvvat ata karega.”
11phir ilqaana aur hanna raama men apnay ghar vaapas chalay gaay. lekin un ka beta elee imaam kay paas raha aur maqdis men rabb kee khidmat karnay laga.
elee kay beton kee bedeen zindagee
12lekin elee kay betay badam’aash thay. na vah rabb ko jaantay thay, 13na imaam kee haisiyat say apnay faraaiz saheeh taur par ada kartay thay. kyoonki jab bhee koee aadmee apnee qurbaanee pesh karkay rifaaqtee khaanay kay liyay gosht ubaalta to elee kay betay apnay naukar ko vahaan bhej detay. yah naukar sihashaakha kaantaa 14deg men daal kar gosht ka har vah tukda apnay maalikon kay paas lay jaata jo kaantay say lag jaata. yahee un ka tamaam israaeeliyon kay saath sulook tha jo saila men qurbaaniyaan chadhaanay aatay thay. 15na sirf yah balki kaee baar naukar us vaqt bhee a jaata jab jaanvar kee charbee abhee qurbaangaah par jalaanee hotee thee. phir vah taqaaza karta, “mujhay imaam kay liyay kachcha gosht day do! usay ubla gosht manzoor naheen balki sirf kachcha gosht, kyoonki vah usay bhoonna chaahata hai.” 16qurbaanee pesh karnay vaala etiraaz karta, “pahelay to rabb kay liyay charbee jalaana hai, is kay baad hee jo jee chaahay lay len.” phir naukar badtameezee karta, “naheen, usay abhee day do, varna main zabardastee lay loonga.” 17in javaan imaamon ka yah gunaah rabb kee nazar men nihaayat sangeen tha, kyoonki vah rabb kee qurbaaniyaan haqeer jaantay thay.
maan-baap samooel say milnay aatay hain
18lekin chhota samooel rabb kay huzoor khidmat karta raha. usay bhee doosray imaamon kee tarah kataan ka baalaaposh diya gaya tha. 19har saal jab us kee maan khaavand kay saath qurbaanee pesh karnay kay liyay saila aatee to vah naya chogha see kar usay day detee. 20aur ravaana honay say pahelay elee samooel kay maan-baap ko barkat day kar ilqaana say kaheta, “hanna nay rabb say bachcha maang liya aur jab mila to usay rabb ko vaapas kar diya. ab rabb aap ko is bachchay kee jagah mazeed bachchay day.” is kay baad vah apnay ghar chalay jaatay. 21aur vaaqaee, rabb nay hanna ko mazeed teen betay aur do betiyaan ata keen. yah bachchay ghar men rahay, lekin samooel rabb kay huzoor khidmat kartay kartay javaan ho gaya.
elee kay betay baap kee naheen sunte
22elee us vaqt bahut boodha ho chuka tha. beton ka tamaam israaeel kay saath bura sulook us kay kaanon tak pahunch gaya tha, balki yah bhee ki betay un aurton say naajaaiz taalluqaat rakhtay hain jo mulaaqaat kay khaimay kay darvaazay par khidmat kartee hain. 23us nay unhen samjhaaya bhee tha, “aap aisee harkaten kyoon kar rahay hain? mujhay tamaam logon say aap kay shareer kaamon kee khabren miltee rahetee hain. 24beto, aisa mat karna! jo baaten aap kay baaray men rabb kee qaum men phail gaee hain vah achchhee naheen. 25dekhen, agar insaan kisee doosray insaan ka gunaah karay to ho sakta hai allaah donon ka darmiyaanee ban kar qusoorvaar shakhs par rahem karay. lekin agar koee rabb ka gunaah karay to phir kaun us ka darmiyaanee ban kar usay bachaaega?”
lekin elee kay beton nay baap kee na sunee, kyoonki rabb kee marzee thee ki unhen saza-ay-maut mil jaaay. 26lekin samooel un say farq tha. jitna vah bada hota gaya utnee us kee rabb aur insaan kay saamnay qabooliyat badhtee gaee.
elee kay gharaanay ko saza milnay kee peshgoee
27ek din ek nabee elee kay paas aaya aur kaha, “rabb farmaata hai, ‘kya jab tera baap haaroon aur us ka gharaana misr kay baadshaah kay ghulaam thay to main nay apnay aap ko us par zaahir na kiya? 28go israaeel kay baarah qabeelay thay lekin main nay muqarrar kiya ki usee kay gharaanay kay mard meray imaam ban kar qurbaangaah kay saamnay khidmat karen, bakhoor jalaaen aur meray huzoor imaam ka baalaaposh pahenen. saath saath main nay unhen qurbaangaah par jalnay vaalee qurbaaniyon ka ek hissa milnay ka haq day diya. 29to phir tum log zabah aur ghalla kee vah qurbaaniyaan haqeer kyoon jaantay ho jo mujhay hee pesh kee jaatee hain aur jo main nay apnee sukoonatgaah kay liyay muqarrar kee theen? elee, too apnay beton ka mujh say ziyaada ehatiraam karta hai. tum to meree qaum israaeel kee har qurbaanee kay behtareen hissay kha kha kar motay ho gaay ho.’
30chunaanchay rabb jo israaeel ka khuda hai farmaata hai, vaada to main nay kiya tha ki laavee kay qabeelay ka tera gharaana hamesha hee imaam kee khidmat sar’anjaam dega. lekin ab main elaan karta hoon ki aisa kabhee naheen hoga! kyoonki jo mera ehatiraam kartay hain un ka main ehatiraam karoonga, lekin jo mujhay haqeer jaantay hain unhen haqeer jaana jaaega. 31is liyay sun! aisay din a rahay hain jab main teree aur teray gharaanay kee taaqat yoon tod daaloonga ki ghar ka koee bhee buzurg naheen paaya jaaega. 32aur too maqdis men museebat dekhega haalaanki main israaeel kay saath bhalaaee karta rahoonga. teray ghar men kabhee bhee buzurg naheen paaya jaaega. 33main tum men say har ek ko to apnee khidmat say nikaal kar halaak naheen karoonga jab teree aankhen dhundalee see pad jaaengee aur teree jaan halkaan ho jaaegee. lekin teree tamaam aulaad ghairtabaee maut maregee. 34teray betay hufnee aur feenhaas donon ek hee din halaak ho jaaengay. is nishaan say tujhay yaqeen aaega ki jo kuchh main nay farmaaya hai vah sachch hai.
35tab main apnay liyay ek imaam khada karoonga jo vafaadaar rahega. jo bhee mera dil aur meree jaan chaahegee vahee vah karega. main us kay ghar kee mazboot bunyaaden rakhoonga, aur vah hamesha tak meray masah kiay huay khaadim kay huzoor aata jaata rahega. 36us vaqt teray ghar kay bachay huay tamaam afraad us imaam kay saamnay jhuk jaaengay aur paisay aur rotee maang kar iltimaas karengay, ‘mujhay imaam kee koee na koee zimmaadaaree den taaki rotee ka tukda mil jaaay’.”