1 Samooel 3
allaah samooel say hamkalaam hota hai
1chhota samooel elee kay zer-ay-nigraanee rabb kay huzoor khidmat karta tha. un dinon men rabb kee taraf say bahut kam paighaam ya royaaen miltee theen. 2ek raat elee jis kee aankhen itnee kamzor ho gaee theen ki dekhna taqreeban naamumkin tha maamool kay mutaabiq so gaya tha. 3samooel bhee let gaya tha. vah rabb kay maqdis men so raha tha jahaan ahd ka sandooq pada tha. shamaadaan ab tak rabb kay huzoor jal raha thaa 4-5 ki achaanak rabb nay aavaaz dee, “samooel!” samooel nay javaab diya, “jee, main abhee aata hoon.” vah bhaag kar elee kay paas gaya aur kaha, “jee janaab, main haazir hoon. aap nay mujhay bulaaya?” elee bola, “naheen, main nay tumhen naheen bulaaya. vaapas ja kar dubaara let jaao.” chunaanchay samooel dubaara let gaya.
6lekin rabb nay ek baar phir aavaaz dee, “samooel!” ladka dubaara utha aur elee kay paas ja kar bola, “jee janaab, main haazir hoon. aap nay mujhay bulaaya?” elee nay javaab diya, “naheen beta, main nay tumhen naheen bulaaya. dubaara so jaao.”
7us vaqt samooel rabb kee aavaaz naheen pahechaan sakta tha, kyoonki abhee usay rabb ka koee paighaam naheen mila tha. 8chunaanchay rabb nay teesree baar aavaaz dee, “samooel!” ek aur martaba samooel uth khada hua aur elee kay paas ja kar bola, “jee janaab, main haazir hoon. aap nay mujhay bulaaya?” yah sun kar elee nay jaan liya ki rabb samooel say hamkalaam ho raha hai. 9is liyay us nay ladkay ko bataaya, “ab dubaara let jaao, lekin aglee dafa jab aavaaz sunaaee day to tumhen kahena hai, ‘ai rabb, farma. tera khaadim sun raha hai’.”
samooel ek baar phir apnay bistar par let gaya. 10rabb a kar vahaan khada hua aur pahelay kee tarah pukaara, “samooel! samooel!” ladkay nay javaab diya, “ai rabb, farma. tera khaadim sun raha hai.” 11phir rabb samooel say hamkalaam hua, “dekh, main israaeel men itna haulnaak kaam karoonga ki jisay bhee is kee khabar milegee us kay kaan bajnay lagengay. 12us vaqt main shuroo say lay kar aakhir tak vah tamaam baaten pooree karoonga jo main nay elee aur us kay gharaanay kay baaray men kee hain. 13main elee ko aagaah kar chuka hoon ki us ka gharaana hamesha tak meree adaalat ka nishaana bana rahega. kyoonki go usay saaf maaloom tha ki us kay betay apnee ghalat harkaton say mera ghazab apnay aap par laaengay to bhee us nay unhen karnay diya aur na roka. 14main nay qasam khaaee hai ki elee kay gharaanay ka qusoor na zabah aur na ghalla kee kisee qurbaanee say door kiya ja sakta hai balki is ka kaffaara kabhee bhee naheen diya ja sakega!”
15is kay baad samooel subah tak apnay bistar par leta raha. phir vah maamool kay mutaabiq utha aur rabb kay ghar kay darvaazay khol diay. vah elee ko apnee roya bataanay say darta tha, 16lekin elee nay usay bula kar kaha, “samooel, meray betay!” samooel nay javaab diya, “jee, main haazir hoon.” 17elee nay poochha, “rabb nay tumhen kya bataaya hai? koee bhee baat mujh say mat chhupaana! allaah tumhen sakht saza day agar tum ek lafz bhee mujh say posheeda rakho.” 18phir samooel nay usay khul kar sab kuchh bata diya aur ek baat bhee na chhupaaee. elee nay kaha, “vahee rabb hai. jo kuchh us kee nazar men theek hai usay vah karay.”
19samooel javaan hota gaya, aur rabb us kay saath tha. us nay samooel kee har baat pooree honay dee. 20pooray israaeel nay daan say lay kar bair-saba tak jaan liya ki rabb nay apnay nabee samooel kee tasdeeq kee hai. 21aglay saalon men bhee rabb saila men apnay kalaam say samooel par zaahir hota raha.