1 Samooel 4

¹yoon samooel ka kalaam saila say nikal kar pooray israaeel men phail gaya.

filistee ahd ka sandooq chheen letay hain

ek din israaeel kee filistiyon kay saath jang chhid gaee. israaeeliyon nay ladnay kay liyay nikal kar aban-azar kay paas apnee lashkargaah lagaaee jabki filistiyon nay afeeq kay paas apnay deray daalay. ²pahelay filistiyon nay israaeeliyon par hamla kiya. ladtay ladtay unhon nay israaeel ko shikast dee. taqreeban 4,000 israaeelee maidaan-ay-jang men halaak huay.

³fauj lashkargaah men vaapas aaee to israaeel kay buzurg sochnay lagay, “rabb nay filistiyon ko ham par kyoon fatah paanay dee? aao, ham rabb kay ahd ka sandooq saila say lay aaen taaki vah hamaaray saath chal kar hamen dushman say bachaaay.”

⁴chunaanchay ahd ka sandooq jis kay oopar rabb-ul-afwaaj karoobee farishton kay darmiyaan takhtnasheen hai saila say laaya gaya. elee kay do betay hufnee aur feenhaas bhee saath aaay. ⁵jab ahd ka sandooq lashkargaah men pahuncha to israaeelee nihaayat khush ho kar buland aavaaz say naaray lagaanay lagay. itna shor mach gaya ki zameen hil gaee.

⁶yah sun kar filistee chaunk uthay aur ek doosray say poochhnay lagay, “yah kaisa shor hai jo israaeelee lashkargaah men ho raha hai?” jab pata chala ki rabb kay ahd ka sandooq israaeelee lashkargaah men a gaya hai ⁷to vah ghabra kar chillaaay, “un ka devta un kee lashkargaah men a gaya hai. haay, hamaara satyaanaas ho gaya hai! pahelay to aisa kabhee naheen hua hai. ⁸ham par afsos! kaun hamen in taaqatvar devtaaon say bachaaega? kyoonki in hee nay registaan men misriyon ko har qism kee bala say maar kar halaak kar diya tha. ⁹bhaaiyo, ab diler ho aur mardaangee dikhaao, varna ham usee tarah ibraaniyon kay ghulaam ban jaaengay jaisay vah ab tak hamaaray ghulaam thay. mardaangee dikha kar lado!” ¹⁰aapas men aisee baaten kartay kartay filistee ladnay kay liyay niklay aur israaeel ko shikast dee. har taraf qatl-ay-aam nazar aaya, aur 30,000 payaaday israaeelee kaam aaay. baaqee sab faraar ho kar apnay apnay gharon men chhup gaay. ¹¹elee kay do betay hufnee aur feenhaas bhee usee din halaak huay, aur allaah kay ahd ka sandooq filistiyon kay qabzay men a gaya.

elee kee maut

¹²usee din binyameen kay qabeelay ka ek aadmee maidaan-ay-jang say bhaag kar saila pahunch gaya. us kay kapday phatay huay thay aur sar par khaak thee. ^13-15 elee sadak kay kinaaray apnee kursee par baitha tha. vah ab andha ho chuka tha, kyoonki us kee umr 98 saal thee. vah badee bechainee say raastay par dhyaan day raha tha taaki jang kee koee taaza khabar mil jaaay, kyoonki usay is baat kee badee fikr thee ki allaah ka sandooq lashkargaah men hai.

jab vah aadmee shaher men daakhil hua aur logon ko saara maajra sunaaya to poora shaher chillaanay laga. jab elee nay shor suna to us nay poochha, “yah kya shor hai?” binymeenee daud kar elee kay paas aaya aur bola, ¹⁶“main maidaan-ay-jang say aaya hoon. aaj hee main vahaan say faraar hua.” elee nay poochha, “beta, kya hua?” ¹⁷qaasid nay javaab diya, “israaeelee filistiyon kay saamnay faraar huay. fauj ko har taraf shikast maannee padee, aur aap kay donon betay hufnee aur feenhaas bhee maaray gaay hain. afsos, allaah ka sandooq bhee dushman kay qabzay men a gaya hai.”

¹⁸ahd kay sandooq ka zikr suntay hee elee apnee kursee par say peechhay kee taraf gir gaya. choonki vah boodha aur bhaaree-bharkam tha is liyay us kee gardan toot gaee aur vah vaheen maqdis kay darvaazay kay paas hee mar gaya. vah 40 saal israaeel ka qaazee raha tha.

feenhaas kee beva kee maut

¹⁹us vaqt elee kee bahoo yaanee feenhaas kee beevee ka paaon bhaaree tha aur bachcha paida honay vaala tha. jab us nay suna ki allaah ka sandooq dushman kay haath men a gaya hai aur ki susar aur shauhar donon mar gaay hain to usay itna sakht sadma pahuncha ki vah shadeed dard-ay-zah men mubtala ho gaee. vah jhuk gaee, aur bachcha paida hua. ²⁰us kee jaan nikalnay lagee to daaiyon nay us kee hausalaaafzaaee karkay kaha, “daro mat! tumhaaray beta paida hua hai.” lekin maan nay na javaab diya, na baat par dhyaan diya. ^21-22 kyoonki vah allaah kay sandooq kay chhin jaanay aur susar aur shauhar kee maut kay baais nihaayat bedil ho gaee thee. us nay kaha, “betay ka naam yakbod yaanee ‘jalaal kahaan raha’ hai, kyoonki allaah kay sandooq kay chhin jaanay say allaah ka jalaal israaeel say jaata raha hai.”