1 Samooel 5
filistiyon men ahd ka sandooq
1filistee allaah ka sandooq aban-azar say ashdood shaher men lay gaay. 2vahaan unhon nay usay apnay devta dajoon kay mandir men but kay qareeb rakh diya. 3aglay din subah-saveray jab ashdood kay baashinday mandir men daakhil huay to kya dekhtay hain ki dajoon ka mujassma munh kay bal rabb kay sandooq kay saamnay hee pada hai. unhon nay dajoon ko utha kar dubaara us kee jagah par khada kiya. 4lekin aglay din jab subah-saveray aaay to dajoon dubaara munh kay bal rabb kay sandooq kay saamnay pada hua tha. lekin is martaba but ka sar aur haath toot kar daheleez par paday thay. sirf dhad rah gaya tha. 5yahee vajah hai ki aaj tak dajoon ka koee bhee pujaaree ya mehamaan ashdood kay mandir kee daheleez par qadam naheen rakhta.
6phir rabb nay ashdood aur gird-o-navaah kay deehaaton par sakht dabaao daal kar baashindon ko pareshaan kar diya. un men achaanak aziyatanaak phodon kee vaba phail gaee. 7jab ashdood kay logon nay is kee vajah jaan lee to vah bolay, “laazim hai ki israaeel kay khuda ka sandooq hamaaray paas na rahay. kyoonki us ka ham par aur hamaaray devta dajoon par dabaao naaqaabil-ay-bardaasht hai.”
8unhon nay tamaam filistee hukmaraanon ko ikattha karkay poochha, “ham israaeel kay khuda kay sandooq kay saath kya karen?”
unhon nay mashvra diya, “usay jaat shaher men lay jaaen.” 9lekin jab ahd ka sandooq jaat men chhoda gaya to rabb ka dabaao us shaher par bhee a gaya. badee afra-tafree paida huee, kyoonki chhoton say lay kar badon tak sab ko aziyatanaak phoday nikal aaay. 10tab unhon nay ahd ka sandooq aagay aqroon bhej diya.
lekin sandooq abhee pahunchnay vaala tha ki aqroon kay baashinday cheekhnay lagay, “vah israaeel kay khuda ka sandooq hamaaray paas laaay hain taaki hamen halaak kar den!” 11tamaam filistee hukmaraanon ko dubaara bulaaya gaya, aur aqrooniyon nay taqaaza kiya ki sandooq ko shaher say door kiya jaaay. vah bolay, “isay vahaan vaapas bheja jaaay jahaan say aaya hai, varna yah hamen balki pooree qaum ko halaak kar daalega.” kyoonki shaher par rabb ka sakht dabaao haavee ho gaya tha. muhalak vaba kay baais us men khauf-o-hiraas kee laher daud gaee. 12jo marnay say bacha usay kam az kam phoday nikal aaay. chaaron taraf logon kee cheekh-pukaar fiza men buland huee.