Kuzaat 10

tola aur yaaeer

¹abeemlik kee maut kay baad tola bin fuvva bin dodo israaeel ko bachaanay kay liyay utha. vah ishkaar kay qabeelay say tha aur ifraaeem kay pahaadee ilaaqay kay shaher sameer men rihaaishpazeer tha. ²tola 23 saal israaeel ka qaazee raha. phir vah faut hua aur sameer men dafnaaya gaya.

³us kay baad jiliaad ka rahenay vaala yaaeer qaazee ban gaya. us nay 22 saal israaeel kee raahanumaaee kee. ⁴yaaeer kay 30 betay thay. har betay ka ek ek gadha aur jiliaad men ek ek aabaadee thee. aaj tak in ka naam ‘havvot-yaaeer’ yaanee yaaeer kee bastiyaan hai. ⁵jab yaaeer intiqaal kar gaya to usay qaamon men dafnaaya gaya.

israaeel dubaara rabb say door ho jaata hai

⁶yaaeer kee maut kay baad israaeelee dubaara aisee harkaten karnay lagay jo rabb ko buree lageen. vah kaee devtaaon kay peechhay lag gaay jin men baal devta, astaaraat devee aur shaam, saida, moaab, ammoniyon aur filistiyon kay devta shaamil thay. yoon vah rabb kee parastish aur khidmat karnay say baaz aaay. ⁷tab us ka ghazab un par naazil hua, aur us nay unhen filistiyon aur ammoniyon kay havaalay kar diya. ⁸usee saal kay dauraan in qaumon nay jiliaad men israaeeliyon kay us ilaaqay par qabza kiya jis men puraanay zamaanay men amoree aabaad thay aur jo darya-ay-yardan kay mashriq men tha. filistee aur ammonee 18 saal tak israaeeliyon ko kuchaltay aur dabaatay rahay. ⁹na sirf yah balki ammoniyon nay darya-ay-yardan ko paar karkay yahoodaah, binyameen aur ifraaeem kay qabeelon par bhee hamla kiya.

jab israaeelee badee museebat men the ¹⁰to aakhirkaar unhon nay madad kay liyay rabb ko pukaara aur iqraar kiya, “ham nay tera gunaah kiya hai. apnay khuda ko tark karkay ham nay baal kay buton kee pooja kee hai.” ¹¹rabb nay javaab men kaha, “jab misree, amoree, ammonee, filistee, ¹²saidaanee, amaaleeqee aur maaonee tum par zulm kartay thay aur tum madad kay liyay mujhay pukaarnay lagay to kya main nay tumhen na bachaaya? ¹³is kay baavujood tum baar baar mujhay tark karkay deegar maaboodon kee pooja kartay rahay ho. is liyay ab say main tumhaaree madad naheen karoonga. ¹⁴jaao, un devtaaon kay saamnay cheekhtay chillaatay raho jinhen tum nay chun liya hai! vahee tumhen museebat say nikaalen.”

¹⁵lekin israaeeliyon nay rabb say faryaad kee, “ham say ghaltee huee hai. jo kuchh bhee too munaasib samajhta hai vah hamaaray saath kar. lekin too hee hamen aaj bacha.” ¹⁶vah ajnabee maaboodon ko apnay beech men say nikaal kar rabb kee dubaara khidmat karnay lagay. tab vah israaeel ka dukh bardaasht na kar saka.

iftaah qaazee ban jaata hai

¹⁷un dinon men ammonee apnay faujiyon ko jama karkay jiliaad men khaimaazan huay. javaab men israaeelee bhee jama huay aur misfaah men apnay khaimay lagaaay. ¹⁸jiliaad kay raahanumaaon nay elaan kiya, “hamen aisay aadmee kee zaroorat hai jo hamaaray aagay chal kar ammoniyon par hamla karay. jo koee aisa karay vah jiliaad kay tamaam baashindon ka sardaar banega.”