Kuzaat 11
1us vaqt jiliaad men ek zabardast soorma banaam iftaah tha. baap ka naam jiliaad tha jabki maan kasbee thee. 2lekin baap kee beevee kay betay bhee thay. jab baaligh huay to unhon nay iftaah say kaha, “ham meeraas teray saath naheen baantengay, kyoonki too hamaara saga bhaaee naheen hai.” unhon nay usay bhaga diya, 3aur vah vahaan say hijrat karkay mulk-ay-tob men ja basa. vahaan kuchh aavaara log us kay peechhay ho liyay jo us kay saath idhar udhar ghoomtay phirtay rahay.
4jab kuchh der kay baad ammonee fauj israaeel say ladnay aaee 5to jiliaad kay buzurg iftaah ko vaapas laanay kay liyay mulk-ay-tob men aaay. 6unhon nay guzaarish kee, “aaen, ammoniyon say ladnay men hamaaree raahanumaaee karen.” 7lekin iftaah nay etiraaz kiya, “aap is vaqt meray paas kyoon aaay hain jab museebat men hain? aap hee nay mujh say nafrat karkay mujhay baap kay ghar say nikaal diya tha.”
8buzurgon nay javaab diya, “ham is liyay aap kay paas vaapas aaay hain ki aap ammoniyon kay saath jang men hamaaree madad karen. agar aap aisa karen to ham aap ko pooray jiliaad ka hukmaraan bana lengay.” 9iftaah nay poochha, “agar main aap kay saath ammoniyon kay khilaaf ladon aur rabb mujhay un par fatah day to kya aap vaaqaee mujhay apna hukmaraan bana lengay?” 10unhon nay javaab diya, “rabb hamaara gavaah hai! vahee hamen saza day agar ham apna vaada poora na karen.”
11yah sun kar iftaah jiliaad kay buzurgon kay saath misfaah gaya. vahaan logon nay usay apna sardaar aur fauj ka kamaandar bana liya. misfaah men us nay rabb kay huzoor vah tamaam baaten duharaaeen jin ka faisla us nay buzurgon kay saath kiya tha.
jang say gurez karnay kee koshish
12phir iftaah nay ammonee baadshaah kay paas apnay qaasidon ko bhej kar poochha, “hamaara aap say kya vaasta ki aap ham say ladnay aaay hain?” 13baadshaah nay javaab diya, “jab israaeelee misr say niklay to unhon nay arnon, yabboq aur yardan kay daryaaon kay darmiyaan ka ilaaqa mujh say chheen liya. ab usay jhagda kiay baghair mujhay vaapas kar do.”
14phir iftaah nay apnay qaasidon ko dubaara ammonee baadshaah kay paas bhej kar 15kaha, “israaeel nay na to moaabiyon say aur na ammoniyon say zameen chheenee. 16haqeeqat yah hai ki jab hamaaree qaum misr say niklee to vah registaan men say guzar kar baher-ay-qulzum aur vahaan say ho kar qaadis pahunch gaee. 17qaadis say unhon nay adom kay baadshaah kay paas qaasid bhej kar guzaarish kee, ‘hamen apnay mulk men say guzarnay den.’ lekin us nay inkaar kiya. phir israaeeliyon nay moaab kay baadshaah say darakhwaast kee, lekin us nay bhee apnay mulk men say guzarnay kee ijaazat na dee. is par hamaaree qaum kuchh der kay liyay qaadis men rahee. 18aakhirkaar vah registaan men vaapas ja kar adom aur moaab kay junoob men chaltay chaltay moaab kay mashriqee kinaaray par pahunchee, vahaan jahaan darya-ay-arnon us kee sarhadd hai. lekin vah moaab kay ilaaqay men daakhil na huay balki darya kay mashriq men khaimaazan huay. 19vahaan say israaeeliyon nay hasbon kay rahenay vaalay amoree baadshaah seehon ko paighaam bhijvaaya, ‘hamen apnay mulk men say guzarnay den taaki ham apnay mulk men daakhil ho saken.’ 20lekin seehon ko shak hua. usay yaqeen naheen tha ki vah mulk men say guzar kar aagay badhengay. us nay na sirf inkaar kiya balki apnay faujiyon ko jama karkay yahez shaher men khaimaazan hua aur israaeeliyon kay saath ladnay laga.
21lekin rabb israaeel kay khuda nay seehon aur us kay tamaam faujiyon ko israaeel kay havaalay kar diya. unhon nay unhen shikast day kar amoriyon kay pooray mulk par qabza kar liya. 22yah tamaam ilaaqa junoob men darya-ay-arnon say lay kar shimaal men darya-ay-yabboq tak aur mashriq kay registaan say lay kar maghrib men darya-ay-yardan tak hamaaray qabzay men a gaya. 23dekhen, rabb israaeel kay khuda nay apnee qaum kay aagay aagay amoriyon ko nikaal diya hai. to phir aap ka is mulk par qabza karnay ka kya haq hai? 24aap bhee samajhtay hain ki jisay aap kay devta kamos nay aap kay aagay say nikaal diya hai us kay mulk par qabza karnay ka aap ka haq hai. isee tarah jisay rabb hamaaray khuda nay hamaaray aagay aagay nikaal diya hai us kay mulk par qabza karnay ka haq hamaara hai. 25kya aap apnay aap ko moaabee baadshaah balaq bin safor say behatar samajhtay hain? us nay to israaeel say ladnay balki jhagadnay tak kee himmat na kee. 26ab israaeelee 300 saal say hasbon aur aroeer kay shaheron men un kay gird-o-navaah kee aabaadiyon samet aabaad hain aur isee tarah darya-ay-arnon kay kinaaray par kay shaheron men. aap nay is dauraan in jagahon par qabza kyoon na kiya? 27chunaanchay main nay aap say ghalat sulook naheen kiya balki aap hee meray saath ghalat sulook kar rahay hain. kyoonki mujh say jang chhedna ghalat hai. rabb jo munsif hai vahee aaj israaeel aur ammon kay jhagday ka faisla karay!”
28lekin ammonee baadshaah nay iftaah kay paighaam par dhyaan na diya.
iftaah kee fatah
29phir rabb ka rooh iftaah par naazil hua, aur vah jiliaad aur manassee men say guzar gaya, phir jiliaad kay misfaah kay paas vaapas aaya. vahaan say vah apnee fauj lay kar ammoniyon say ladnay nikla.
30pahelay us nay rabb kay saamnay qasam khaaee, “agar too mujhay ammoniyon par fatah de 31aur main saheeh-salaamat lautaoon to jo kuchh bhee pahelay meray ghar kay darvaazay say nikal kar mujh say milay vah teray liyay makhsoos kiya jaaega. main usay bhasm honay vaalee qurbaanee kay taur par pesh karoonga.”
32phir iftaah ammoniyon say ladnay gaya, aur rabb nay usay un par fatah dee. 33iftaah nay aroeer men dushman ko shikast dee aur isee tarah minneet aur abeel-karaameem tak mazeed bees shaheron par qabza kar liya. yoon israaeel nay ammon ko zer kar diya.
iftaah kee vaapsee
34is kay baad iftaah misfaah vaapas chala gaya. vah abhee ghar kay qareeb tha ki us kee iklautee betee daf bajaatee aur naachtee huee ghar say nikal aaee. iftaah ka koee aur beta ya betee naheen thee. 35apnee betee ko dekh kar vah ranj kay maaray apnay kapday phaad kar cheekh utha, “haay meree betee! too nay mujhay khaak men daba kar tabaah kar diya hai, kyoonki main nay rabb kay saamnay aisee qasam khaaee hai jo badlee naheen ja saktee.”
36betee nay kaha, “abboo, aap nay qasam kha kar rabb say vaada kiya hai, is liyay laazim hai ki meray saath vah kuchh karen jis kee qasam aap nay khaaee hai. aakhir usee nay aap ko dushman say badla lenay kee kaamyaabee bakhsh dee hai. 37lekin meree ek guzaarish hai. mujhay do maah kee muhalat den taaki main apnee saheliyon kay saath pahaadon men ja kar apnee ghairshaadeeshuda haalat par maatam karoon.”
38iftaah nay ijaazat dee. phir betee do maah kay liyay apnee saheliyon kay saath pahaadon men chalee gaee aur apnee ghairshaadeeshuda haalat par maatam kiya. 39phir vah apnay baap kay paas vaapas aaee, aur us nay apnee qasam ka vaada poora kiya. betee ghairshaadeeshuda thee.
us vaqt say israaeel men dastoor raaij hai 40ki israaeel kee javaan aurten saalaana chaar din kay liyay apnay gharon say nikal kar iftaah kee betee kee yaad men jashn manaatee hain.