Kuzaat 12
ifraaeem ka qabeela iftaah par hamla karta hai
1ammoniyon par fatah kay baad ifraaeem kay qabeelay kay aadmee jama huay aur darya-ay-yardan ko paar karkay iftaah kay paas aaay jo safon men tha. unhon nay shikaayat kee, “aap kyoon hamen bulaaay baghair ammoniyon say ladnay gaay? ab ham aap ko aap kay ghar samet jala dengay!”
2iftaah nay etiraaz kiya, “jab meree aur meree qaum ka ammoniyon kay saath sakht jhagda chhid gaya to main nay aap ko bulaaya, lekin aap nay mujhay un kay haath say na bachaaya. 3jab main nay dekha ki aap madad naheen karengay to apnee jaan khatray men daal kar aap kay baghair hee ammoniyon say ladnay gaya. aur rabb nay mujhay un par fatah bakhshee. ab mujhay bataaen ki aap kyoon meray paas a kar mujh par hamla karna chaahatay hain?”
4ifraaeemiyon nay javaab diya, “tum jo jiliaad men rahetay ho bas ifraaeem aur manassee kay qabeelon say niklay huay bhagoday ho.” tab iftaah nay jiliaad kay mardon ko jama kiya aur ifraaeemiyon say lad kar unhen shikast dee.
5phir jiliaadiyon nay darya-ay-yardan kay kam-gaheray maqaamon par qabza kar liya. jab koee guzarna chaahata to vah poochhtay, “kya aap ifraaeemee hain?” agar vah inkaar kartaa 6to jiliaad kay mard kahetay, “to phir lafz ‘shibbolat’ [a] yaanee nadee. bolen.” agar vah ifraaeemee hota to is kay bajaay “sibbolat” kaheta. phir jiliaadee usay pakad kar vaheen maar daaltay. us vaqt kul 42,000 ifraaeemee halaak huay.
7iftaah nay chhah saal israaeel kee raahanumaaee kee. jab faut hua to usay jiliaad kay kisee shaher men dafnaaya gaya.
ibzaan, ailon aur abdon
8iftaah kay baad ibzaan israaeel ka qaazee bana. vah bait-lahem men aabaad tha, 9aur us kay 30 betay aur 30 betiyaan theen. us kee tamaam betiyaan shaadeeshuda theen aur is vajah say baap kay ghar men naheen rahetee theen. lekin usay 30 beton kay liyay beeviyaan mil gaee theen, aur sab us kay ghar men rahetay thay. ibzaan nay saat saal kay dauraan israaeel kee raahanumaaee kee. 10phir vah intiqaal kar gaya aur bait-lahem men dafnaaya gaya.
11us kay baad ailon qaazee bana. vah zabooloon kay qabeelay say tha aur 10 saal kay dauraan israaeel kee raahanumaaee karta raha. 12jab vah kooch kar gaya to usay zabooloon kay ayyaalon men dafan kiya gaya.
13phir abdon bin hillel qaazee bana. vah shaher fir’aaton ka tha. 14us kay 40 betay aur 30 potay thay jo 70 gadhon par safar kiya kartay thay. abdon nay aath saal kay dauraan israaeel kee raahanumaaee kee. 15phir vah bhee jaan-ba-haq ho gaya, aur usay amaaleeqiyon kay pahaadee ilaaqay kay shaher fir’aaton men dafnaaya gaya, jo us vaqt ifraaeem ka hissa tha.