Kuzaat 13
samsoon kee paidaaish kee peshgoee
1phir israaeelee dubaara aisee harkaten karnay lagay jo rabb ko buree lageen. is liyay us nay unhen filistiyon kay havaalay kar diya jo unhen 40 saal dabaatay rahay. 2us vaqt ek aadmee sur’a shaher men raheta tha jis ka naam manoha tha. daan kay qabeelay ka yah aadmee beaulaad tha, kyoonki us kee beevee baanjh thee.
3ek din rabb ka farishta manoha kee beevee par zaahir hua aur kaha, “go tujh say bachchay paida naheen ho saktay, ab too haamila hogee, aur teray beta paida hoga. 4mai ya koee aur nashaaaavar cheez mat peena, na koee naapaak cheez khaana. 5kyoonki jo beta paida hoga vah paidaaish say hee allaah kay liyay makhsoos hoga. laazim hai ki us kay baal kabhee na kaatay jaaen. yahee bachcha israaeel ko filistiyon say bachaanay lagega.”
6beevee apnay shauhar manoha kay paas gaee aur usay sab kuchh bataaya, “allaah ka ek banda meray paas aaya. vah allaah ka farishta lag raha tha, yahaan tak ki main sakht ghabra gaee. main nay us say na poochha ki vah kahaan say hai, aur khud us nay mujhay apna naam na bataaya. 7lekin us nay mujhay bataaya, ‘too haamila hogee, aur teray beta paida hoga. ab mai ya koee aur nashaaaavar cheez mat peena, na koee naapaak cheez khaana. kyoonki beta paidaaish say hee maut tak allaah kay liyay makhsoos hoga’.”
8yah sun kar manoha nay rabb say dua kee, “ai rabb, baraah-ay-karam mard-ay-khuda ko dubaara hamaaray paas bhej taaki vah hamen sikhaaay ki ham us betay kay saath kya karen jo paida honay vaala hai.” 9allaah nay us kee sunee aur apnay farishtay ko dubaara us kee beevee kay paas bhej diya. us vaqt vah shauhar kay baghair khet men thee. 10farishtay ko dekh kar vah jaldee say manoha kay paas aaee aur usay ittila dee, “jo aadmee pichhlay dinon men meray paas aaya vah dubaara mujh par zaahir hua hai!”
11manoha uth kar apnee beevee kay peechhay peechhay farishtay kay paas aaya. us nay poochha, “kya aap vahee aadmee hain jis nay pichhlay dinon men meree beevee say baat kee thee?” farishtay nay javaab diya, “jee, main hee tha.” 12phir manoha nay savaal kiya, “jab aap kee peshgoee pooree ho jaaegee to hamen betay kay tarz-ay-zindagee aur sulook kay silsilay men kin kin baaton ka khayaal karna hai?”
13rabb kay farishtay nay javaab diya, “laazim hai ki teree beevee un tamaam cheezon say parhez karay jin ka zikr main nay kiya. 14vah angoor kee koee bhee paidaavaar na khaaay. na vah mai, na koee aur nashaaaavar cheez piay. naapaak cheezen khaana bhee mana hai. vah meree har hidaayat par amal karay.”
15manoha nay rabb kay farishtay say guzaarish kee, “meharbaanee karkay thodee der hamaaray paas thaheren taaki ham bakree ka bachcha zabah karkay aap kay liyay khaana tayyaar kar saken.” 16ab tak manoha nay yah baat naheen pahechaanee thee ki mehamaan asal men rabb ka farishta hai. farishtay nay javaab diya, “khwaah too mujhay rokay bhee main kuchh naheen khaaoonga. lekin agar too kuchh karna chaahay to bakree ka bachcha rabb ko bhasm honay vaalee qurbaanee kay taur par pesh kar.”
17manoha nay us say poochha, “aap ka kya naam hai? kyoonki jab aap kee yah baaten pooree ho jaaengee to ham aap kee izzat karna chaahengay.” 18farishtay nay savaal kiya, “too mera naam kyoon jaanna chaahata hai? vah to teree samajh say baahar hai.” 19phir manoha nay ek baday patthar par rabb ko bakree ka bachcha aur ghalla kee nazar pesh kee. tab rabb nay manoha aur us kee beevee kay dekhtay dekhtay ek hairat’angez kaam kiya. 20jab aag kay sholay aasmaan kee taraf buland huay to rabb ka farishta sholay men say oopar chadh kar ojhal ho gaya. manoha aur us kee beevee munh kay bal gir gaay.
21jab rabb ka farishta dubaara manoha aur us kee beevee par zaahir na hua to manoha ko samajh aaee ki rabb ka farishta hee tha. 22vah pukaar utha, “haay, ham mar jaaengay, kyoonki ham nay allaah ko dekha hai!” 23lekin us kee beevee nay etiraaz kiya, “agar rabb hamen maar daalna chaahata to vah hamaaree qurbaanee qabool na karta. phir na vah ham par yah sab kuchh zaahir karta, na hamen aisee baaten bataata.”
24kuchh der kay baad manoha kay haan beta paida hua. beevee nay us ka naam samsoon rakha. bachcha bada hota gaya, aur rabb nay usay barkat dee. 25allaah ka rooh pahelee baar mahenay-daan men jo sur’a aur istaal kay darmiyaan hai us par naazil hua.