Kuzaat 14

samsoon kee filistee aurat say shaadee

¹ek din samsoon timnat men filistiyon kay paas thahera hua tha. vahaan us nay ek filistee aurat dekhee jo usay pasand aaee. ²apnay ghar laut kar us nay apnay vaalidain ko bataaya, “mujhay timnat kee ek filistee aurat pasand aaee hai. us kay saath mera rishta baandhnay kee koshish karen.” ³us kay vaalidain nay javaab diya, “kya aap kay rishtedaaron aur qaum men koee qaabil-ay-qabool aurat naheen hai? aap ko naamakhtoon aur bedeen filistiyon kay paas ja kar un men say koee aurat dhoondnay kee kya zaroorat thee?” lekin samsoon bazid raha, “usee kay saath meree shaadee karaaen! vahee mujhay theek lagtee hai.”

⁴us kay maan-baap ko maaloom naheen tha ki yah sab kuchh rabb kee taraf say hai jo filistiyon say ladnay ka mauqa talaash kar raha tha. kyoonki us vaqt filistee israaeel par hukoomat kar rahay thay.

⁵chunaanchay samsoon apnay maan-baap samet timnat kay liyay ravaana hua. jab vah timnat kay angoor kay baaghon kay qareeb pahunchay to samsoon apnay maan-baap say alag ho gaya. achaanak ek javaan sherbabar dahaadata hua us par toot pada. ⁶tab allaah ka rooh itnay zor say samsoon par naazil hua ki us nay apnay haathon say sher ko yoon phaad daala, jis tarah aam aadmee bakree kay chhotay bachchay ko phaad daalta hai. lekin us nay apnay vaalidain ko is kay baaray men kuchh na bataaya. ⁷aagay nikal kar vah timnat pahunch gaya. mazkoora filistee aurat say baat huee aur vah usay theek lagee.

⁸kuchh der kay baad vah shaadee karnay kay liyay dubaara timnat gaay. shaher pahunchnay say pahelay samsoon raastay say hat kar sherbabar kee laash ko dekhnay gaya. vahaan kya dekhta hai ki shahed kee makkhiyon nay sher kay pinjar men apna chhatta bana liya hai. ⁹samsoon nay us men haath daal kar shahed ko nikaal liya aur usay khaatay huay chala. jab vah apnay maan-baap kay paas pahuncha to us nay unhen bhee kuchh diya, magar yah na bataaya ki kahaan say mil gaya hai.

¹⁰timnat pahunch kar samsoon ka baap dulhan kay khaandaan say mila jabki samsoon nay doolhay kee haisiyat say aisee ziyaafat kee jis tarah us zamaanay men dastoor tha.

filistee samsoon ko dhoka detay hain

¹¹jab dulhan kay ghar vaalon ko pata chala ki samsoon timnat pahunch gaya hai to unhon nay us kay paas 30 javaan aadmee bhej diay ki us kay saath khushee manaaen. ¹²samsoon nay un say kaha, “main aap say pahelee poochhta hoon. agar aap ziyaafat kay saat dinon kay dauraan is ka hal bata saken to main aap ko kataan kay 30 qeemtee kurtay aur 30 shaandaar soot day doonga. ¹³lekin agar aap mujhay is ka saheeh matlab na bata saken to aap ko mujhay 30 qeemtee kurtay aur 30 shaandaar soot denay padengay.” unhon nay javaab diya, “apnee pahelee sunaaen.”

¹⁴samsoon nay kaha, “khaanay vaalay men say khaana nikla aur zoraavar men say mithaas.”

teen din guzar gaay. javaan pahelee ka matlab na bata sakay. ¹⁵chauthay din unhon nay dulhan kay paas ja kar usay dhamkee dee, “apnay shauhar ko hamen pahelee ka matlab bataanay par uksaao, varna ham tumhen tumhaaray khaandaan samet jala dengay. kya tum logon nay hamen sirf is liyay daavat dee ki hamen loot lo?”

¹⁶dulhan samsoon kay paas gaee aur aansoo baha baha kar kahenay lagee, “too mujhay piyaar naheen karta! haqeeqat men too mujh say nafrat karta hai. too nay meree qaum kay logon say pahelee poochhee hai lekin mujhay is ka matlab naheen bataaya.” samsoon nay javaab diya, “main nay apnay maan-baap ko bhee is ka matlab naheen bataaya to tujhay kyoon bataaoon?” ¹⁷ziyaafat kay pooray haftay kay dauraan dulhan us kay saamnay rotee rahee.

saatven din samsoon dulhan kee iltijaaon say itna tang a gaya ki us nay usay pahelee ka hal bata diya. tab dulhan nay phurtee say sab kuchh filistiyon ko suna diya. ¹⁸sooraj kay ghuroob honay say pahelay pahelay shaher kay mardon nay samsoon ko pahelee ka matlab bataaya, “kya koee cheez shahed say ziyaada meethee aur sherbabar say ziyaada zoraavar hotee hai?” samsoon nay yah sun kar kaha, “aap nay meree javaan gaay lay kar hal chalaaya hai, varna aap kabhee bhee pahelee ka hal na nikaal saktay.” ¹⁹phir rabb ka rooh us par naazil hua. us nay asqaloon shaher men ja kar 30 filistiyon ko maar daala aur un kay libaas lay kar un aadmiyon ko day diay jinhon nay usay pahelee ka matlab bata diya tha.

is kay baad vah baday ghussay men apnay maan-baap kay ghar chala gaya. ²⁰lekin us kee beevee kee shaadee samsoon kay shahebaalay say karaaee gaee jo 30 javaan filistiyon men say ek tha.