Kuzaat 15

samsoon filistiyon say badla leta hai

¹kuchh din guzar gaay. jab gandum kee kataaee honay lagee to samsoon bakree ka bachcha apnay saath lay kar apnee beevee say milnay gaya. susar kay ghar pahunch kar us nay beevee kay kamray men jaanay kee darakhwaast kee. lekin baap nay inkaar kiya. ²us nay kaha, “yah naheen ho sakta! main nay betee kee shaadee aap kay shahebaalay say kara dee hai. asal men mujhay yaqeen ho gaya tha ki ab aap us say sakht nafrat kartay hain. lekin koee baat naheen. us kee chhotee bahen say shaadee kar len. vah ziyaada khoobsoorat hai.”

³samsoon bola, “is dafa main filistiyon say khoob badla loonga, aur koee naheen kah sakega ki main haq par naheen hoon.” ⁴vahaan say nikal kar us nay 300 lomdiyon ko pakad liya. do do kee dumon ko baandh kar us nay har joday kee dumon kay saath mash’al laga dee ⁵aur phir mash’alon ko jala kar lomdiyon ko filistiyon kay anaaj kay kheton men bhaga diya. kheton men paday poolay us anaaj samet bhasm huay jo ab tak kaata naheen gaya tha. angoor aur zaitoon kay baagh bhee tabaah ho gaay.

⁶filistiyon nay darayaaft kiya ki yah kis ka kaam hai. pata chala ki samsoon nay yah sab kuchh kiya hai, aur ki vajah yah hai ki timnat men us kay susar nay us kee beevee ko us say chheen kar us kay shahebaalay ko day diya hai. yah sun kar filistee timnat gaay aur samsoon kay susar ko us kee betee samet pakad kar jala diya. ⁷tab samsoon nay un say kaha, “yah tum nay kya kiya hai! jab tak main nay poora badla na liya main naheen rukoonga.” ⁸vah itnay zor say un par toot pada ki beshumaar filistee halaak huay. phir vah us jagah say utar kar aitaam kee chataan kay ghaar men rahenay laga.

lahee men samsoon filistiyon say ladta hai

⁹javaab men filistee fauj yahoodaah kay qabaailee ilaaqay men daakhil huee. vahaan vah lahee shaher kay paas khaimaazan huay. ¹⁰yahoodaah kay baashindon nay poochha, “kya vajah hai ki aap ham say ladnay aaay hain?” filistiyon nay javaab diya, “ham samsoon ko pakadnay aaay hain taaki us kay saath vah kuchh karen jo us nay hamaaray saath kiya hai.”

¹¹tab yahoodaah kay 3,000 mard aitaam pahaad kay ghaar kay paas aaay aur samsoon say kaha, “yah aap nay hamaaray saath kya kiya? aap ko to pata hai ki filistee ham par hukoomat kartay hain.” samsoon nay javaab diya, “main nay un kay saath sirf vah kuchh kiya jo unhon nay meray saath kiya tha.”

¹²yahoodaah kay mard bolay, “ham aap ko baandh kar filistiyon kay havaalay karnay aaay hain.” samsoon nay kaha, “theek hai, lekin qasam khaaen ki aap khud mujhay qatl naheen karengay.”

¹³unhon nay javaab diya, “ham aap ko hargiz qatl naheen karengay balki aap ko sirf baandh kar un kay havaalay kar dengay.” chunaanchay vah usay do taaza taaza rasson say baandh kar filistiyon kay paas lay gaay.

¹⁴samsoon abhee lahee say door tha ki filistee naaray lagaatay huay us kee taraf dauday aaay. tab rabb ka rooh baday zor say us par naazil hua. us kay baazooon say bandhay huay rassay san kay jalay huay dhaagay jaisay kamzor ho gaay, aur vah pighal kar haathon say gir gaay. ¹⁵kaheen say gadhay ka taaza jabda pakad kar us nay us kay zareeay hazaar afraad ko maar daala.

¹⁶us vaqt us nay naara lagaaya, “gadhay kay jabday say main nay un kay dher lagaaay hain! gadhay kay jabday say main nay hazaar mardon ko maar daala hai!” ¹⁷is kay baad us nay gadhay ka yah jabda phaink diya. us jagah ka naam raamat-lahee yaanee jabda pahaadee pad gaya.

¹⁸samsoon ko vahaan badee piyaas lagee. us nay rabb ko pukaar kar kaha, “too hee nay apnay khaadim kay haath say israaeel ko yah badee najaat dilaaee hai. lekin ab main piyaas say mar kar naamakhtoon dushman kay haath men a jaaoonga.” ¹⁹tab allaah nay lahee men zameen ko chheda, aur gadhay say paanee phoot nikla. samsoon us ka paanee pee kar dubaara taazaadam ho gaya. yoon us chashmay ka naam ain-haqqoray yaanee pukaarnay vaalay ka chashma pad gaya. aaj bhee vah lahee men maujood hai.

²⁰filistiyon kay daur men samsoon 20 saal tak israaeel ka qaazee raha.