Kuzaat 16

samsoon ghazza ka darvaaza utha lay jaata hai

¹ek din samsoon filistee shaher ghazza men aaya. vahaan vah ek kasbee ko dekh kar us kay ghar men daakhil hua. ²jab shaher kay baashindon ko ittila milee ki samsoon shaher men hai to unhon nay kasbee kay ghar ko gher liya. saath saath vah raat kay vaqt shaher kay darvaazay par taak men rahay. faisla yah hua, “raat kay vaqt ham kuchh naheen karengay, jab pau phategee tab usay maar daalengay.”

³samsoon ab tak kasbee kay ghar men so raha tha. lekin aadhee raat ko vah uth kar shaher kay darvaazay kay paas gaya aur donon kivaadon ko kunday aur darvaazay kay donon baazooon samet ukhaad kar apnay kandhon par rakh liya. yoon chaltay chaltay vah sab kuchh us pahaadee kee chotee par lay gaya jo habroon kay muqaabil hai.

samsoon aur daleelaa

⁴kuchh der kay baad samsoon ek aurat kee muhabbat men giriftaar ho gaya jo vaadee-ay-sooriq men rahetee thee. us ka naam daleela tha. ⁵yah sun kar filistee sardaar us kay paas aaay aur kahenay lagay, “samsoon ko ukasaaen ki vah aap ko apnee badee taaqat ka bhed bataaay. ham jaanna chaahatay hain ki ham kis tarah us par ghaalib a kar usay yoon baandh saken ki vah hamaaray qabzay men rahay. agar aap yah maaloom kar saken to ham men say har ek aap ko chaandee kay 1,100 sikkay dega.”

⁶chunaanchay daleela nay samsoon say savaal kiya, “mujhay apnee badee taaqat ka bhed bataaen. kya aap ko kisee aisee cheez say baandha ja sakta hai jisay aap tod naheen saktay?” ⁷samsoon nay javaab diya, “agar mujhay jaanvaron kee saat taaza nason say baandha jaaay to phir main aam aadmee jaisa kamzor ho jaaoonga.” ⁸filistee sardaaron nay daleela ko saat taaza nasen muhayya kar deen, aur us nay samsoon ko un say baandh liya. ⁹kuchh filistee aadmee saath vaalay kamray men chhup gaay. phir daleela chilla uthee, “samsoon, filistee aap ko pakadnay aaay hain!” yah sun kar samsoon nay nason ko yoon tod diya jis tarah doree toot jaatee hai jab aag men say guzartee hai. chunaanchay us kee taaqat ka pol na khula.

¹⁰daleela ka munh latak gaya. “aap nay jhoot bol kar mujhay bevuqoof banaaya hai. ab aaen, meharbaanee karkay mujhay bataaen ki aap ko kis tarah baandha ja sakta hai.” ¹¹samsoon nay javaab diya, “agar mujhay ghairistemaalashuda rasson say baandha jaaay to phir hee main aam aadmee jaisa kamzor ho jaaoonga.” ¹²daleela nay naay rassay lay kar usay un say baandh liya. is martaba bhee filistee saath vaalay kamray men chhup gaay thay. phir daleela chilla uthee, “samsoon, filistee aap ko pakadnay aaay hain!” lekin is baar bhee samsoon nay rasson ko yoon tod liya jis tarah aam aadmee doree ko tod leta hai.

¹³daleela nay shikaayat kee, “aap baar baar jhoot bol kar mera mazaaq uda rahay hain. ab mujhay bataaen ki aap ko kis tarah baandha ja sakta hai.” samsoon nay javaab diya, “laazim hai ki aap meree saat zulfon ko khaddee kay taanay kay saath bunen. phir hee aam aadmee jaisa kamzor ho jaaoonga.” ¹⁴jab samsoon so raha tha to daleela nay aisa hee kiya. us kee saat zulfon ko taanay kay saath bun kar us nay usay shatal kay zareeay khaddee kay saath lagaaya. phir vah chilla uthee, “samsoon, filistee aap ko pakadnay aaay hain!” samsoon jaag utha aur apnay baalon ko shatal samet khaddee say nikaal liya.

¹⁵yah dekh kar daleela nay munh phula kar malaamat kee, “aap kis tarah daava kar saktay hain ki mujh say muhabbat rakhtay hain? ab aap nay teen martaba mera mazaaq uda kar mujhay apnee badee taaqat ka bhed naheen bataaya.” ¹⁶roz-ba-roz vah apnee baaton say us kee naak men dam kartee rahee. aakhirkaar samsoon itna tang a gaya ki us ka jeena doobhar ho gaya. ¹⁷phir us nay usay khul kar baat bataaee, “main paidaaish hee say allaah kay liyay makhsoos hoon, is liyay meray baalon ko kabhee naheen kaata gaya. agar sar ko mundavaaya jaaay to meree taaqat jaatee rahegee aur main har doosray aadmee jaisa kamzor ho jaaoonga.”

¹⁸daleela nay jaan liya ki ab samsoon nay mujhay pooree haqeeqat bataaee hai. us nay filistee sardaaron ko ittila dee, “aao, kyoonki is martaba us nay mujhay apnay dil kee har baat bataaee hai.” yah sun kar vah muqarrara chaandee apnay saath lay kar daleela kay paas aaay.

¹⁹daleela nay samsoon ka sar apnee god men rakh kar usay sula diya. phir us nay ek aadmee ko bula kar samsoon kee saat zulfon ko mundavaaya. yoon vah usay past karnay lagee, aur us kee taaqat jaatee rahee. ²⁰phir vah chilla uthee, “samsoon, filistee aap ko pakadnay aaay hain!” samsoon jaag utha aur socha, “main pahelay kee tarah ab bhee apnay aap ko bacha kar bandhan ko tod doonga.” afsos, usay maaloom naheen tha ki rabb nay usay chhod diya hai. ²¹filistiyon nay usay pakad kar us kee aankhen nikaal deen. phir vah usay ghazza lay gaay jahaan usay peetal kee zanjeeron say baandha gaya. vahaan vah qaidkhaanay kee chakkee peesa karta tha.

²²lekin hotay hotay us kay baal dubaara badhnay lagay.

samsoon ka aakhiree intiqaam

²³ek din filistee sardaar bada jashn manaanay kay liyay jama huay. unhon nay apnay devta dajoon ko jaanvaron kee bahut see qurbaaniyaan pesh karkay apnee fatah kee khushee manaaee. vah bolay, “hamaaray devta nay hamaaray dushman samsoon ko hamaaray havaalay kar diya hai.” ²⁴samsoon ko dekh kar avaam nay dajoon kee tamjeed karkay kaha, “hamaaray devta nay hamaaray dushman ko hamaaray havaalay kar diya hai! jis nay hamaaray mulk ko tabaah kiya aur ham men say itnay logon ko maar daala vah ab hamaaray qaaboo men a gaya hai!” ²⁵is qism kee baaten kartay kartay un kee khushee kee intiha na rahee. tab vah chillaanay lagay, “samsoon ko bulaao taaki vah hamaaray dilon ko bahelaaay.”

chunaanchay usay un kee tafreeh kay liyay jel say laaya gaya aur do satoonon kay darmiyaan khada kar diya gaya. ²⁶samsoon us ladkay say mukhaatib hua jo us ka haath pakad kar us kee raahanumaaee kar raha tha, “mujhay chhat ko uthaanay vaalay satoonon kay paas lay jaao taaki main un ka sahaara loon.” ²⁷imaarat mardon aur aurton say bharee thee. filistee sardaar bhee sab aaay huay thay. sirf chhat par samsoon ka tamaasha dekhnay vaalay taqreeban 3,000 afraad thay.

²⁸phir samsoon nay dua kee, “ai rabb qaadir-ay-mutlaq, mujhay yaad kar. bas ek dafa aur mujhay pahelay kee tarah quvvat ata farma taaki main ek hee vaar say filistiyon say apnee aankhon ka badla lay sakoon.” ²⁹yah kah kar samsoon nay un do markzee satoonon ko pakad liya jin par chhat ka poora vazan tha. un kay darmiyaan khaday ho kar us nay pooree taaqat say zor lagaayaa ³⁰aur dua kee, “mujhay filistiyon kay saath marnay day!” achaanak satoon hil gaay aur chhat dhadaam say filistiyon kay tamaam sardaaron aur baaqee logon par gir gaee. is tarah samsoon nay pahelay kee nisbat martay vaqt kaheen ziyaada filistiyon ko maar daala.

³¹samsoon kay bhaaee aur baaqee ghar vaalay aaay aur us kee laash ko utha kar us kay baap manoha kee qabr kay paas lay gaay. vahaan yaanee sur’a aur istaal kay darmiyaan unhon nay usay dafnaaya. samsoon 20 saal israaeel ka qaazee raha.