Kuzaat 17
meekaah ka but
1ifraaeem kay pahaadee ilaaqay men ek aadmee raheta tha jis ka naam meekaah tha. 2ek din us nay apnee maan say baat kee, “aap kay chaandee kay 1,100 sikkay choree ho gaay thay, na? us vaqt aap nay meray saamnay hee chor par laanat bhejee thee. ab dekhen, vah paisay meray paas hain. main hee chor hoon.” yah sun kar maan nay javaab diya, “meray betay, rabb tujhay barkat day!” 3meekaah nay usay tamaam paisay vaapas kar diay, aur maan nay elaan kiya, “ab say yah chaandee rabb kay liyay makhsoos ho! main aap kay liyay taraasha aur dhaala hua but banva kar chaandee aap ko vaapas kar detee hoon.”
4chunaanchay jab betay nay paisay vaapas kar diay to maan nay us kay 200 sikkay sunaar kay paas lay ja kar lakdee ka taraasha aur dhaala hua but banvaaya. meekaah nay yah but apnay ghar men khada kiya, 5kyoonki us ka apna maqdis tha. us nay mazeed but aur ek afod [a] aam taur par ibraanee men afod ka matlab imaam-ay-aazam ka baalaaposh tha (dekhiay khurooj 28:4), lekin yahaan is say muraad butparastee kee koee cheez hai. bhee banvaaya aur phir ek betay ko apna imaam bana liya. 6us zamaanay men israaeel ka koee baadshaah naheen tha balki har koee vahee kuchh karta jo usay durust lagta tha.
7un dinon men laavee kay qabeelay ka ek javaan aadmee yahoodaah kay qabeelay kay shaher bait-lahem men aabaad tha. 8ab vah shaher ko chhod kar rihaaish kee koee aur jagah talaash karnay laga. ifraaeem kay pahaadee ilaaqay men say safar kartay kartay vah meekaah kay ghar pahunch gaya. 9meekaah nay poochha, “aap kahaan say aaay hain?” javaan nay javaab diya, “main laavee hoon. main yahoodaah kay shaher bait-lahem ka rahenay vaala hoon lekin rihaaish kee kisee aur jagah kee talaash men hoon.”
10meekaah bola, “yahaan meray paas apna ghar bana kar meray baap aur imaam banen. tab aap ko saal men chaandee kay das sikkay aur zaroorat kay mutaabiq kapday aur khuraak milegee.”
11laavee muttafiq hua. vah vahaan aabaad hua, aur meekaah nay us kay saath beton ka sa sulook kiya. 12us nay usay imaam muqarrar karkay socha, 13“ab rabb mujh par meharbaanee karega, kyoonki laavee mera imaam ban gaya hai.”