Kuzaat 18

daan ka qabeela zameen kee talaash karta hai

¹un dinon men israaeel ka baadshaah naheen tha. aur ab tak daan kay qabeelay ko apna koee qabaailee ilaaqa naheen mila tha, is liyay us kay log kaheen aabaad honay kee talaash men rahay. ²unhon nay apnay khaandaanon men say sur’a aur istaal kay paanch tajaribaakaar faujiyon ko chun kar unhen mulk kee tafteesh karnay kay liyay bhej diya. yah mard ifraaeem kay pahaadee ilaaqay men say guzar kar meekaah kay ghar kay paas pahunch gaay. jab vah vahaan raat kay liyay thaheray huay the ³to unhon nay dekha ki javaan laavee bait-lahem kee bolee bolta hai. us kay paas ja kar unhon nay poochha, “kaun aap ko yahaan laaya hai? aap yahaan kya kartay hain? aur aap ka is ghar men rahenay ka kya maqsad hai?” ⁴laavee nay unhen apnee kahaanee sunaaee, “meekaah nay mujhay naukree day kar apna imaam bana liya hai.” ⁵phir unhon nay us say guzaarish kee, “allaah say darayaaft karen ki kya hamaaray safar ka maqsad poora ho jaaega ya naheen?” ⁶laavee nay unhen tasallee dee, “salaamatee say aagay badhen. aap kay safar ka maqsad rabb ko qabool hai, aur vah aap kay saath hai.”

⁷tab yah paanch aadmee aagay niklay aur safar kartay kartay lais pahunch gaay. unhon nay dekha ki vahaan kay log saidaaniyon kee tarah pursukoon aur befikr zindagee guzaar rahay hain. koee naheen tha jo unhen dabaata ya un par zulm karta. yah bhee maaloom hua ki agar un par hamla kiya jaaay to un ka ittihaadee shaher saida un say itnee door hai ki un kee madad naheen kar sakega, aur qareeb koee ittihaadee naheen hai jo un ka saath day. ⁸vah paanch jaasoos sur’a aur istaal vaapas chalay gaay. jab vahaan pahunchay to doosron nay poochha, “safar kaisa raha?” ⁹jaasooson nay javaab men kaha, “aaen, ham jang kay liyay niklen! hamen ek behtareen ilaaqa mil gaya hai. aap kyoon jhijak rahay hain? jaldee karen, ham niklen aur us mulk par qabza kar len! ¹⁰vahaan kay log befikr hain aur hamlay kee tavaqqo hee naheen kartay. aur zameen vasee aur zarkhez hai, us men kisee bhee cheez kee kamee naheen hai. allaah aap ko vah mulk denay ka iraada rakhta hai.”

daan kay mard meekaah ka but imaam samet chheen letay hain

¹¹daan kay qabeelay kay 600 musallah aadmee sur’a aur istaal say ravaana huay. ¹²raastay men unhon nay apnee lashkargaah yahoodaah kay shaher qiryat-yaareem kay qareeb lagaaee. is liyay yah jagah aaj tak mahenay-daan yaanee daan kee khaimaagaah kahelaatee hai. ¹³vahaan say vah ifraaeem kay pahaadee ilaaqay men daakhil huay aur chaltay chaltay meekaah kay ghar pahunch gaay.

¹⁴jin paanch mardon nay lais kee tafteesh kee thee unhon nay apnay saathiyon say kaha, “kya aap ko maaloom hai ki in gharon men ek afod, ek taraasha aur dhaala hua but aur deegar kaee but hain? ab soch len ki kya kiya jaaay.”

¹⁵paanchon nay meekaah kay ghar men daakhil ho kar javaan laavee ko salaam kiyaa ¹⁶jabki baaqee 600 musallah mard get par khaday rahay. ¹⁷jab laavee baahar khaday mardon kay paas gaya to in paanchon nay ghus kar taraasha aur dhaala hua but, afod aur baaqee but chheen liyay. ¹⁸yah dekh kar laavee cheekhnay laga, “kya kar rahay ho!”

¹⁹unhon nay kaha, “chup! koee baat na karo balki hamaaray saath ja kar hamaaray baap aur imaam bano. hamaaray saath jaaogay to pooray qabeelay kay imaam banogay. kya yah ek hee khaandaan kee khidmat karnay say kaheen behatar naheen hoga?” ²⁰yah sun kar imaam khush hua. vah afod, taraasha hua but aur baaqee buton ko lay kar musaafiron men shareek ho gaya. ²¹phir daan kay mard ravaana huay. un kay baal-bachchay, maveshee aur qeemtee maal-o-mata un kay aagay aagay tha.

²²jab meekaah ko baat ka pata chala to vah apnay padosiyon ko jama karkay un kay peechhay dauda. itnay men daan kay log ghar say door nikal chukay thay. ²³jab vah saamnay nazar aaay to meekaah aur us kay saathiyon nay cheekhtay chillaatay unhen ruknay ko kaha. daan kay mardon nay peechhay dekh kar meekaah say kaha, “kya baat hai? apnay in logon ko bula kar kyoon lay aaay ho?” ²⁴meekaah nay javaab diya, “tum logon nay meray buton ko chheen liya go main nay unhen khud banvaaya hai. meray imaam ko bhee saath lay gaay ho. meray paas kuchh naheen raha to ab tum poochhtay ho ki kya baat hai?”

²⁵daan kay afraad bolay, “khaamosh! khabardaar, hamaaray kuchh log tezmizaaj hain. aisa na ho ki vah ghussay men a kar tum ko tumhaaray khaandaan samet maar daalen.” ²⁶yah kah kar unhon nay apna safar jaaree rakha. meekaah nay jaan liya ki main apnay thoday aadmiyon kay saath un ka muqaabla naheen kar sakoonga, is liyay vah mud kar apnay ghar vaapas chala gaya. ²⁷us kay but daan kay qabzay men rahay, aur imaam bhee un men tik gaya.

lais par qabza aur daan kee butparastee

phir vah lais kay ilaaqay men daakhil huay jis kay baashinday pursukoon aur befikr zindagee guzaar rahay thay. daan kay faujee un par toot paday aur sab ko talvaar say qatl karkay shaher ko bhasm kar diya. ²⁸kisee nay bhee un kee madad na kee, kyoonki saida bahut door tha, aur qareeb koee ittihaadee naheen tha jo un ka saath deta. yah shaher bait-rahob kee vaadee men tha. daan kay afraad shaher ko az sar-ay-nau taameer karkay us men aabaad huay. ²⁹aur unhon nay us ka naam apnay qabeelay kay baanee kay naam par daan rakha (daan israaeel ka beta tha).

³⁰vahaan unhon nay taraasha hua but rakh kar pooja kay intizaam par yoontan muqarrar kiya jo moosa kay betay jairsom kee aulaad men say tha. jab yoontan faut hua to us kee aulaad qaum kee jilaavatanee tak daan kay qabeelay men yahee khidmat kartee rahee.

³¹meekaah ka banvaaya hua but tab tak daan men raha jab tak allaah ka ghar saila men tha.