Kuzaat 20

jibia ko saza denay ka faislaa

¹tamaam israaeelee ek dil ho kar misfaah men rabb kay huzoor jama huay. shimaal kay daan say lay kar junoob kay bair-saba tak sab aaay. darya-ay-yardan kay paar jiliaad say bhee log aaay. ²israaeelee qabeelon kay sardaar bhee aaay. unhon nay mil kar ek badee fauj tayyaar kee, talvaaron say les 4,00,000 mard jama huay. ³binyameeniyon ko is jamaaat kay baaray men ittila milee.

israaeeliyon nay poochha, “hamen bataaen ki yah haibtanaak jurm kis tarah sarzad hua?” ⁴maqtoola kay shauhar nay unhen apnee kahaanee sunaaee, “main apnee daashta kay saath jibia men a thahera jo binyameeniyon kay ilaaqay men hai. ham vahaan raat guzaarna chaahatay thay. ⁵yah dekh kar shaher kay mardon nay meray mezbaan kay ghar ko gher liya taaki mujhay qatl karen. main to bach gaya, lekin meree daashta say itnee ziyaadtee huee ki vah mar gaee. ⁶yah dekh kar main nay us kee laash ko tukday tukday karkay yah tukday israaeel kee meeraas kee har jagah bhej diay taaki har ek ko maaloom ho jaaay ki hamaaray mulk men kitna ghinauna jurm sarzad hua hai. ⁷is par aap sab yahaan jama huay hain. israaeel kay mardo, ab laazim hai ki aap ek doosray say mashvra karkay faisla karen ki kya karna chaahiay.”

⁸tamaam mard ek dil ho kar khaday huay. sab ka faisla tha, “ham men say koee bhee apnay ghar vaapas naheen jaaegaa ⁹jab tak jibia ko munaasib saza na dee jaaay. laazim hai ki ham fauran shaher par hamla karen aur is kay liyay qur’a daal kar rabb say hidaayat len. ¹⁰ham yah faisla bhee karen ki kaun kaun hamaaree fauj kay liyay khaanay-peenay ka band-o-bast karaaega. is kaam kay liyay ham men say har dasvaan aadmee kaafee hai. baaqee sab log seedhay jibia say ladnay jaaen taaki us sharmanaak jurm ka munaasib badla len jo israaeel men hua hai.”

¹¹yoon tamaam israaeelee muttahid ho kar jibia say ladnay kay liyay gaay. ¹²raastay men unhon nay binyameen kay har kumbay ko paighaam bhijvaaya, “aap kay darmiyaan ghinauna jurm hua hai. ¹³ab jibia kay in shareer aadmiyon ko hamaaray havaalay karen taaki ham unhen saza-ay-maut day kar israaeel men say buraaee mita den.”

lekin binymeenee is kay liyay tayyaar na huay. ¹⁴vah pooray qabaailee ilaaqay say a kar jibia men jama huay taaki israaeeliyon say laden. ¹⁵usee din unhon nay apnee fauj ka band-o-bast kiya. jibia kay 700 tajaribaakaar faujiyon kay ilaava talvaaron say les 26,000 afraad thay. ¹⁶in faujiyon men say 700 aisay mard bhee thay jo apnay baaen haath say falaakhan chalaanay kee itnee mahaarat rakhtay thay ki patthar baal jaisay chhotay nishaanay par bhee lag jaata tha. ¹⁷doosree taraf israaeel kay 4,00,000 faujee khaday huay, aur har ek kay paas talvaar thee.

¹⁸pahelay israaeelee bait-el chalay gaay. vahaan unhon nay allaah say darayaaft kiya, “kaun sa qabeela hamaaray aagay aagay chalay jab ham binyameeniyon par hamla karen?” rabb nay javaab diya, “yahoodaah sab say aagay chalay.”

binyameen kay khilaaf jang

¹⁹aglay din israaeelee ravaana huay aur jibia kay qareeb pahunch kar apnee lashkargaah lagaaee. ²⁰phir vah hamla kay liyay niklay aur tarteeb say ladnay kay liyay khaday ho gaay. ²¹yah dekh kar binymeenee shaher say niklay aur un par toot paday. nateejay men 22,000 israaeelee shaheed ho gaay.

^22-23 israaeelee bait-el chalay gaay aur shaam tak rabb kay huzoor rotay rahay. unhon nay rabb say poochha, “kya ham dubaara apnay binymeenee bhaaiyon say ladnay jaaen?” rabb nay javaab diya, “haan, un par hamla karo!” yah sun kar israaeeliyon ka hausla badh gaya aur vah aglay din vaheen khaday ho gaay jahaan pahelay din khaday huay thay. ²⁴lekin jab vah shaher kay qareeb pahunche ²⁵to binymeenee pahelay kee tarah shaher say nikal kar un par toot paday. us din talvaar say les 18,000 israaeelee shaheed ho gaay.

²⁶phir israaeel ka poora lashkar bait-el chala gaya. vahaan vah shaam tak rabb kay huzoor rotay aur roza rakhtay rahay. unhon nay rabb ko bhasm honay vaalee qurbaaniyaan aur salaamatee kee qurbaaniyaan pesh karke ²⁷us say darayaaft kiya ki ham kya karen. (us vaqt allaah kay ahd ka sandooq bait-el men thaa ²⁸jahaan feenhaas bin ileeazar bin haaroon imaam tha.) israaeeliyon nay poochha, “kya ham ek aur martaba apnay binymeenee bhaaiyon say ladnay jaaen ya is say baaz aaen?” rabb nay javaab diya, “un par hamla karo, kyoonki kal hee main unhen tumhaaray havaalay kar doonga.”

binyameen ka satyaanaas

²⁹is dafa kuchh israaeelee jibia kay ird-gird ghaat men baith gaay. ³⁰baaqee afraad pahelay do dinon kee see tarteeb kay mutaabiq ladnay kay liyay khaday ho gaay. ³¹binymeenee dubaara shaher say nikal kar un par toot paday. jo raastay bait-el aur jibia kee taraf lay jaatay hain un par aur khulay maidaan men unhon nay taqreeban 30 israaeeliyon ko maar daala. yoon ladtay ladtay vah shaher say door hotay gaay. ³²vah pukaaray, “ab ham unhen pahelee do martaba kee tarah shikast dengay!”

lekin israaeeliyon nay mansooba baandh liya tha, “ham un kay aagay aagay bhaagtay huay unhen shaher say door raaston par khainch lengay.” ³³yoon vah bhaagnay lagay aur binymeenee un kay peechhay pad gaay. lekin baal-tamar kay qareeb israaeelee ruk kar mud gaay aur un ka saamna karnay lagay. ab baaqee israaeelee jo jiba kay ird-gird aur khulay maidaan men ghaat men baithay thay apnee chhupnay kee jagahon say nikal aaay. ³⁴achaanak jibia kay binyameeniyon ko 10,000 behtareen faujiyon ka saamna karna pada, un mardon ka jo pooray israaeel say chunay gaay thay. binymeenee un say khoob ladnay lagay, lekin un kee aankhen abhee is baat kay liyay band theen ki un ka anjaam qareeb a gaya hai. ³⁵us din israaeeliyon nay rabb kee madad say fatah pa kar talvaar say les 25,100 binymeenee faujiyon ko maut kay ghaat utaar diya. ³⁶tab binyameeniyon nay jaan liya ki dushman ham par ghaalib a gaay hain. kyoonki israaeelee fauj nay apnay bhaag jaanay say unhen jibia say door khainch liya tha taaki shaher kay ird-gird ghaat men baithay mardon ko shaher par hamla karnay ka mauqa muhayya karen. ³⁷tab yah mard nikal kar shaher par toot paday aur talvaar say tamaam baashindon ko maar daala, ^38-39 phir mansoobay kay mutaabiq aag laga kar dhuen ka bada baadal paida kiya taaki bhaagnay vaalay israaeeliyon ko ishaara mil jaaay ki vah mud kar binyameeniyon ka muqaabla karen.

us vaqt tak binyameeniyon nay taqreeban 30 israaeeliyon ko maar daala tha, aur un ka khayaal tha ki ham unhen pahelay kee tarah shikast day rahay hain. ⁴⁰achaanak un kay peechhay dhuen ka baadal aasmaan kee taraf uthnay laga. jab binyameeniyon nay mud kar dekha ki shaher kay konay konay say dhuaan nikal raha hai ⁴¹to israaeel kay mard ruk gaay aur palat kar un ka saamna karnay lagay.

binymeenee sakht ghabra gaay, kyoonki unhon nay jaan liya ki ham tabaah ho gaay hain. ^42-43 tab unhon nay mashriq kay registaan kee taraf faraar honay kee koshish kee. lekin ab vah mard bhee un ka taaqqub karnay lagay jinhon nay ghaat men baith kar jibia par hamla kiya tha. yoon israaeeliyon nay mafrooron ko gher kar maar daala. ⁴⁴us vaqt binyameen kay 18,000 tajaribaakaar faujee halaak huay. ⁴⁵jo bach gaay vah registaan kee chataan rimmon kee taraf bhaag niklay. lekin israaeeliyon nay raastay men un kay 5,000 afraad ko maut kay ghaat utaar diya. is kay baad unhon nay jidaom tak un ka taaqqub kiya. mazeed 2,000 binymeenee halaak huay. ⁴⁶is tarah binyameen kay kul 25,000 talvaar say les aur tajaribaakaar faujee maaray gaay.

⁴⁷sirf 600 mard bach kar rimmon kee chataan tak pahunch gaay. vahaan vah chaar maheenay tak tikay rahay. ⁴⁸tab israaeelee taaqqub karnay say baaz a kar binyameen kay qabaailee ilaaqay men vaapas aaay. vahaan unhon nay jagah-ba-jagah ja kar sab kuchh maut kay ghaat utaar diya. jo bhee unhen mila vah talvaar kee zad men a gaya, khwaah insaan tha ya haivaan. saath saath unhon nay tamaam shaheron ko aag laga dee.