Kuzaat 21

binyameeniyon ko aurten miltee hain

¹jab israaeelee misfaah men jama huay thay to sab nay qasam kha kar kaha tha, “ham kabhee bhee apnee betiyon ka kisee binymeenee mard kay saath rishta naheen baandhengay.” ²ab vah bait-el chalay gaay aur shaam tak allaah kay huzoor baithay rahay. ro ro kar unhon nay dua kee, ³“ai rabb, israaeel kay khuda, hamaaree qaum ka ek poora qabeela mit gaya hai! yah museebat israaeel par kyoon aaee?”

⁴aglay din vah subah-saveray uthay aur qurbaangaah bana kar us par bhasm honay vaalee aur salaamatee kee qurbaaniyaan chadhaaeen. ⁵phir vah ek doosray say poochhnay lagay, “jab ham misfaah men rabb kay huzoor jama huay to hamaaree qaum men say kaun kaun ijtima men shareek na hua?” kyoonki us vaqt unhon nay qasam kha kar elaan kiya tha, “jis nay yahaan rabb kay huzoor aanay say inkaar kiya usay zaroor saza-ay-maut dee jaaegee.” ⁶ab israaeeliyon ko binyameeniyon par afsos hua. unhon nay kaha, “ek poora qabeela mit gaya hai. ⁷ab ham un thoday bachay khachay aadmiyon ko beeviyaan kis tarah muhayya kar saktay hain? ham nay to rabb kay huzoor qasam khaaee hai ki apnee betiyon ka un kay saath rishta naheen baandhengay. ⁸lekin ho sakta hai koee khaandaan misfaah kay ijtima men na aaya ho. aao, ham pata karen.” maaloom hua ki yabees-jiliaad kay baashinday naheen aaay thay. ⁹yah baat faujiyon ko ginnay say pata chalee, kyoonki gintay vaqt yabees-jiliaad ka koee bhee shakhs fauj men naheen tha.

¹⁰tab unhon nay 12,000 faujiyon ko chun kar unhen hukm diya, “yabees-jiliaad par hamla karkay tamaam baashindon ko baal-bachchon samet maar daalo. ¹¹sirf kunvaariyon ko zinda rahenay do.”

¹²faujiyon nay yabees men 400 kunvaariyaan paaeen. vah unhen saila lay aaay jahaan israaeeliyon ka lashkar thahera hua tha. ¹³vahaan say unhon nay apnay qaasidon ko rimmon kee chataan kay paas bhej kar binyameeniyon kay saath sulah kar lee. ¹⁴phir binyameen kay 600 mard registaan say vaapas aaay, aur un kay saath yabees-jiliaad kee kunvaariyon kee shaadee huee. lekin yah sab kay liyay kaafee naheen theen.

¹⁵israaeeliyon ko binyameen par afsos hua, kyoonki rabb nay israaeel kay qabeelon men khala daal diya tha. ¹⁶jamaaat kay buzurgon nay dubaara poochha, “hamen binyameen kay baaqee mardon kay liyay kahaan say beeviyaan milengee? un kee tamaam aurten to halaak ho gaee hain. ¹⁷laazim hai ki unhen un ka mauroosee ilaaqa vaapas mil jaaay. aisa na ho ki vah bilkul mit jaaen. ¹⁸lekin ham apnee betiyon kee un kay saath shaadee naheen kara saktay, kyoonki ham nay qasam kha kar elaan kiya hai, ‘jo apnee betee ka rishta binyameen kay kisee mard say baandhega us par allaah kee laanat ho’.”

¹⁹yoon sochtay sochtay unhen aakhirkaar yah tarkeeb soojhee, “kuchh der kay baad yahaan saila men rabb kee saalaana eed manaaee jaaegee. saila bait-el kay shimaal men, laboona kay junoob men aur us raastay kay mashriq men hai jo bait-el say sikam tak lay jaata hai. ²⁰ab binymeenee mardon kay liyay hamaara mashvra hai ki eed kay dinon men angoor kay baaghon men chhup kar ghaat men baith jaaen. ²¹jab ladkiyaan loknaach kay liyay saila say nikalengee to phir baaghon say nikal kar un par jhapat padna. har aadmee ek ladkee ko pakad kar usay apnay ghar lay jaaay. ²²jab un kay baap aur bhaaee hamaaray paas a kar aap kee shikaayat karengay to ham un say kahengay, ‘binyameeniyon par taras khaaen, kyoonki jab ham nay yabees par fatah paaee to ham un kay liyay kaafee aurten haasil na kar sakay. aap bequsoor hain, kyoonki aap nay unhen apnee betiyon ko iraadatan to naheen diya’.” ²³binyameeniyon nay buzurgon kee is hidaayat par amal kiya. eed kay dinon men jab ladkiyaan naach rahee theen to binyameeniyon nay utnee pakad leen ki un kee kamee pooree ho gaee. phir vah unhen apnay qabaailee ilaaqay men lay gaay aur shaheron ko dubaara taameer karkay un men basnay lagay. ²⁴baaqee israaeelee bhee vahaan say chalay gaay. har ek apnay qabaailee ilaaqay men vaapas chala gaya. ²⁵us zamaanay men israaeel men koee baadshaah naheen tha. har ek vahee kuchh karta jo usay munaasib lagta tha.