Kuzaat 3

allaah israaeel ko kan’aanee qaumon say aazmaata hai

¹rabb nay kaee ek qaumon ko mulk-ay-kan’aan men rahenay diya taaki un tamaam israaeeliyon ko aazmaaay jo khud kan’aan kee jangon men shareek naheen huay thay. ²neez, vah naee nasal ko jang karna sikhaana chaahata tha, kyoonki vah jang karnay say naavaaqif thee. zail kee qaumen kan’aan men rah gaee theen : ³filistee un kay paanch hukmaraanon samet, tamaam kan’aanee, saidaanee aur lubnaan kay pahaadee ilaaqay men rahenay vaalay hivvee jo baal-harmoon pahaad say lay kar labo-hamaat tak aabaad thay. ⁴un say rabb israaeeliyon ko aazmaana chaahata tha. vah dekhna chaahata tha ki kya yah meray un ahkaam par amal kartay hain ya naheen jo main nay moosa kee maarifat un kay baapdaada ko diay thay.

ghutaneeel qaazee

⁵chunaanchay israaeelee kan’aaniyon, hittiyon, amoriyon, farizziyon, hivviyon aur yaboosiyon kay darmiyaan hee aabaad ho gaay. ⁶na sirf yah balki vah in qaumon say apnay betay-betiyon ka rishta baandh kar un kay devtaaon kee pooja bhee karnay lagay. ⁷israaeeliyon nay aisee harkaten keen jo rabb kee nazar men buree theen. rabb ko bhool kar unhon nay baal devta aur yaseerat devee kee khidmat kee.

⁸tab rabb ka ghazab un par naazil hua, aur us nay unhen masoputaamiya kay baadshaah kooshan-ris’ataim kay havaalay kar diya. israaeelee aath saal tak kooshan kay ghulaam rahay. ⁹lekin jab unhon nay madad kay liyay rabb ko pukaara to us nay un kay liyay ek najaatadihanda barpa kiya. kaalib kay chhotay bhaaee ghutaneeel bin qanaz nay unhen dushman kay haath say bachaaya. ¹⁰us vaqt ghutaneeel par rabb ka rooh naazil hua, aur vah israaeel ka qaazee ban gaya. jab vah jang karnay kay liyay nikla to rabb nay masoputaamiya kay baadshaah kooshan-ris’ataim ko us kay havaalay kar diya, aur vah us par ghaalib a gaya.

¹¹tab mulk men chaalees saal tak amn-o-amaan qaaim raha. lekin jab ghutaneeel bin qanaz faut huaa ¹²to israaeelee dubaara vah kuchh karnay lagay jo rabb kee nazar men bura tha. is liyay us nay moaab kay baadshaah ijloon ko israaeel par ghaalib aanay diya. ¹³ijloon nay ammoniyon aur amaaleeqiyon kay saath mil kar israaeeliyon say jang kee aur unhen shikast dee. us nay khajooron kay shaher par qabza kiya, ¹⁴aur israaeel 18 saal tak us kee ghulaamee men raha.

ahood qaazee kee chaalaakee

¹⁵israaeeliyon nay dubaara madad kay liyay rabb ko pukaara, aur dubaara us nay unhen najaatadihanda ata kiya yaanee binyameen kay qabeelay ka ahood bin jeera jo baaen haath say kaam karnay ka aadee tha. isee shakhs ko israaeeliyon nay ijloon baadshaah kay paas bhej diya taaki vah usay kharaaj kay paisay ada karay. ¹⁶ahood nay apnay liyay ek dodhaaree talvaar bana lee jo taqreeban dedh fut lambee thee. jaatay vaqt us nay usay apnee kamar kay daaeen taraf baandh kar apnay libaas men chhupa liya. ¹⁷jab vah ijloon kay darbaar men pahunch gaya to us nay moaab kay baadshaah ko kharaaj pesh kiya. ijloon bahut mota aadmee tha. ¹⁸phir ahood nay un aadmiyon ko rukhsat kar diya jinhon nay us kay saath kharaaj utha kar usay darbaar tak pahunchaaya tha. ^19-20 ahood bhee vahaan say ravaana hua, lekin jiljaal kay buton kay qareeb vah mud kar ijloon kay paas vaapas gaya.

ijloon baalaakhaanay men baitha tha jo ziyaada thanda tha aur us kay zaatee istemaal kay liyay makhsoos tha. ahood nay andar ja kar baadshaah say kaha, “meree aap kay liyay khufiya khabar hai.” baadshaah nay kaha, “khaamosh!” baaqee tamaam haazireen kamray say chalay gaay to ahood nay kaha, “jo khabar meray paas aap kay liyay hai vah allaah kee taraf say hai!” yah sun kar ijloon khada honay laga, ²¹lekin ahood nay usee lamhay apnay baaen haath say kamar kay daaeen taraf bandhee huee talvaar ko pakad kar usay miyaan say nikaala aur ijloon kay pet men dhansa diya. ²²talvaar itnee dhans gaee ki us ka dasta bhee charbee men ghaaib ho gaya aur us kee nok taangon men say niklee. talvaar ko us men chhod kar ²³ahood nay kamray kay darvaazon ko band karkay kundee lagaaee aur saath vaalay kamray men say nikal kar chala gaya.

²⁴thodee der kay baad baadshaah kay naukron nay a kar dekha ki darvaazon par kundee lagee hai. unhon nay ek doosray say kaha, “vah haajat rafa kar rahay hongay,” ²⁵is liyay kuchh der kay liyay thaheray. lekin darvaaza na khula. intizaar kartay kartay vah thak gaay, lekin besood, baadshaah nay darvaaza na khola. aakhirkaar unhon nay chaabee dhoond kar darvaazon ko khol diya aur dekha ki maalik kee laash farsh par padee huee hai.

²⁶naukron kay jhijaknay kee vajah say ahood bach nikla aur jiljaal kay buton say guzar kar saeera pahunch gaya jahaan vah mahfooz tha. ²⁷vahaan ifraaeem kay pahaadee ilaaqay men us nay narsinga phoonk diya taaki israaeelee ladnay kay liyay jama ho jaaen. vah ikatthay huay aur us kee raahanumaaee men vaadee-ay-yardan men utar gaay. ²⁸ahood bola, “meray peechhay ho len, kyoonki allaah nay aap kay dushman moaab ko aap kay havaalay kar diya hai.” chunaanchay vah us kay peechhay peechhay vaadee men utar gaay. pahelay unhon nay darya-ay-yardan kay kam-gaheray maqaamon par qabza karkay kisee ko darya paar karnay na diya. ²⁹us vaqt unhon nay moaab kay 10,000 taaqatvar aur jang karnay kay qaabil aadmiyon ko maar daala. ek bhee na bacha.

³⁰us din israaeel nay moaab ko zer kar diya, aur 80 saal tak mulk men amn-o-amaan qaaim raha.

shamjar qaazee

³¹ahood kay daur kay baad israaeel ka ek aur najaatadihanda ubhar aaya, shamjar bin anaat. us nay bail kay aankus say 600 filistiyon ko maar daala.