Kuzaat 4

dabora nabiya aur lashkar ka sardaar baraq

¹jab ahood faut hua to israaeelee dubaara aisee harkaten karnay lagay jo rabb kay nazdeek buree theen. ^2-3 is liyay rabb nay unhen kan’aan kay baadshaah yaabeen kay havaalay kar diya. yaabeen ka daar-ul-hakoomat hasoor tha, aur us kay paas 900 lohay kay rath thay. us kay lashkar ka sardaar seesra tha jo haroosat-hagoim men raheta tha. yaabeen nay 20 saal israaeeliyon par bahut zulm kiya, is liyay unhon nay madad kay liyay rabb ko pukaara.

⁴un dinon men dabora nabiya israaeel kee qaazee thee. us ka shauhar lafeedot tha, ⁵aur vah ‘dabora kay khajoor’ kay paas rahetee thee jo ifraaeem kay pahaadee ilaaqay men raama aur bait-el kay darmiyaan tha. is darakht kay saay men vah israaeeliyon kay muaamalaat kay faislay kiya kartee thee. ⁶ek din dabora nay baraq bin abeenooam ko bulaaya. baraq naftaalee kay qabaailee ilaaqay kay shaher qaadis men raheta tha. dabora nay baraq say kaha, “rabb israaeel ka khuda aap ko hukm deta hai, ‘naftaalee aur zabooloon kay qabeelon men say 10,000 mardon ko jama karkay un kay saath taboor pahaad par chadh ja! ⁷main yaabeen kay lashkar kay sardaar seesra ko us kay rathon aur fauj samet teray qareeb kee qaison nadee kay paas khainch laaoonga. vahaan main usay teray haath men kar doonga’.”

⁸baraq nay javaab diya, “main sirf is soorat men jaaoonga ki aap bhee saath jaaen. aap kay baghair main naheen jaaoonga.” ⁹dabora nay kaha, “theek hai, main zaroor aap kay saath jaaoongee. lekin is soorat men aap ko seesra par ghaalib aanay kee izzat haasil naheen hogee balki ek aurat ko. kyoonki rabb seesra ko ek aurat kay havaalay kar dega.”

chunaanchay dabora baraq kay saath qaadis gaee. ¹⁰vahaan baraq nay zabooloon aur naftaalee kay qabeelon ko apnay paas bula liya. 10,000 aadmee us kee raahanumaaee men taboor pahaad par chalay gaay. dabora bhee saath gaee.

¹¹un dinon men ek qeenee banaam hibar nay apna khaima qaadis kay qareeb ailon-zaanneem men lagaaya hua tha. qeenee moosa kay saalay hobaab kee aulaad men say tha. lekin hibar doosray qeeniyon say alag raheta tha.

¹²ab seesra ko ittila dee gaee ki baraq bin abeenooam fauj lay kar pahaad taboor par chadh gaya hai. ¹³yah sun kar vah haroosat-hagoim say ravaana ho kar apnay 900 rathon aur baaqee lashkar kay saath qaison nadee par pahunch gaya.

¹⁴tab dabora nay baraq say baat kee, “hamla kay liyay tayyaar ho jaaen, kyoonki rabb nay aaj hee seesra ko aap kay qaaboo men kar diya hai. rabb aap kay aagay aagay chal raha hai.” chunaanchay baraq apnay 10,000 aadmiyon kay saath taboor pahaad say utar aaya. ¹⁵jab unhon nay dushman par hamla kiya to rabb nay kan’aaniyon kay pooray lashkar men rathon samet afra-tafree paida kar dee. seesra apnay rath say utar kar paidal hee faraar ho gaya.

¹⁶baraq kay aadmiyon nay bhaagnay vaalay faujiyon aur un kay rathon ka taaqqub karkay un ko haroosat-hagoim tak maartay gaay. ek bhee na bacha.

seesra ka anjaam

¹⁷itnay men seesra paidal chal kar qeenee aadmee hibar kee beevee yaael kay khaimay kay paas bhaag aaya tha. vajah yah thee ki hasoor kay baadshaah yaabeen kay hibar kay gharaanay kay saath achchhay taalluqaat thay. ¹⁸yaael khaimay say nikal kar seesra say milnay gaee. us nay kaha, “aaen meray aaqa, andar aaen aur na daren.” chunaanchay vah andar a kar let gaya, aur yaael nay us par kambal daal diya.

¹⁹seesra nay kaha, “mujhay piyaas lagee hai, kuchh paanee pila do.” yaael nay doodh ka mashkeeza khol kar usay pila diya aur usay dubaara chhupa diya. ²⁰seesra nay darakhwaast kee, “darvaazay men khadee ho jaao! agar koee aaay aur poochhay ki kya khaimay men koee hai to bolo ki naheen, koee naheen hai.”

²¹yah kah kar seesra gaheree neend so gaya, kyoonki vah nihaayat thaka hua tha. tab yaael nay mekh aur hathoda pakad liya aur dabay paaon seesra kay paas ja kar mekh ko itnay zor say us kee kanaptee men thonk diya ki mekh zameen men dhans gaee aur vah mar gaya.

²²kuchh der kay baad baraq seesra kay taaqqub men vahaan say guzra. yaael khaimay say nikal kar us say milnay aaee aur bolee, “aaen, main aap ko vah aadmee dikhaatee hoon jisay aap dhoond rahay hain.” baraq us kay saath khaimay men daakhil hua to kya dekha ki seesra kee laash zameen par padee hai aur mekh us kee kanaptee men say guzar kar zameen men gad gaee hai.

²³us din allaah nay kan’aanee baadshaah yaabeen ko israaeeliyon kay saamnay zer kar diya. ²⁴is kay baad un kee taaqat badhtee gaee jabki yaabeen kamzor hota gaya aur aakhirkaar israaeeliyon kay haathon tabaah ho gaya.