Kuzaat 5
dabora aur baraq ka geet
1fatah kay din dabora nay baraq bin abeenooam kay saath yah geet gaaya,
2“allaah kee sitaaish ho! kyoonki israaeel kay sardaaron nay raahanumaaee kee, aur avaam nikalnay kay liyay tayyaar huay.
3ai baadshaaho, suno! ai hukmraano, meree baat par tavajjuh do! main rabb kee tamjeed men geet gaaoongee, rabb israaeel kay khuda kee madahsaraaee karoongee.
4ai rabb, jab too saeer say nikal aaya aur adom kay khulay maidaan say ravaana hua to zameen kaamp uthee aur aasmaan say paanee tapaknay laga, baadlon say baarish barasnay lagee.
5koh-ay-seena kay rabb kay huzoor pahaad hilnay lagay, rabb israaeel kay khuda kay saamnay vah kapkapaanay lagay.
6shamjar bin anaat aur yaael kay dinon men safar kay pakkay aur seedhay raastay khaalee rahay aur musaafir un say hat kar bal khaatay huay chhotay chhotay raaston par chal kar apnee manzil tak pahunchtay thay.
7deehaat kee zindagee soonee ho gaee. gaaon men rahena mushkil tha jab tak main, dabora jo israaeel kee maan hoon khadee na huee.
8shaher kay darvaazon par jang chhid gaee jab unhon nay naay maaboodon ko chun liya. us vaqt israaeel kay 40,000 mardon kay paas ek bhee dhaal ya neza na tha.
9mera dil israaeel kay sardaaron kay saath hai aur un kay saath jo khushee say jang kay liyay niklay. rabb kee sitaaish karo!
10ai tum jo safed gadhon par kapday bichha kar un par savaar ho, allaah kee tamjeed karo! ai tum jo paidal chal rahay ho, allaah kee taareef karo!
11suno! jahaan jaanvaron ko paanee pilaaya jaata hai vahaan log rabb kay najaatabakhsh kaamon kee taareef kar rahay hain, un najaatabakhsh kaamon kee jo us nay israaeel kay deehaatiyon kee khaatir kiay. tab rabb kay log shaher kay darvaazon kay paas utar aaay.
12ai dabora, uthen, uthen! uthen, haan uthen aur geet gaaen! ai baraq, khaday ho jaaen! ai abeenooam kay betay, apnay qaidiyon ko baandh kar lay jaaen!
13phir bachay huay faujee pahaadee ilaaqay say utar kar qaum kay shurfa kay paas aaay, rabb kee qaum soormaaon kay saath meray paas utar aaee.
14ifraaeem say jis kee jaden amaaleeq men hain vah utar aaay, aur binyameen kay mard un kay peechhay ho liyay. makeer say hukmaraan aur zabooloon say sipahesaalaar utar aaay.
15ishkaar kay raees bhee dabora kay saath thay, aur us kay faujee baraq kay peechhay ho kar vaadee men daud aaay. lekin roobin ka qabeela apnay ilaaqay men rah kar soch-bichaar men uljha raha.
16too kyoon apnay zeen kay do boron kay darmiyaan baitha raha? kya gallon kay darmiyaan charvaahon kee baansariyon kee aavaazen sunnay kay liyay? roobin ka qabeela apnay ilaaqay men rah kar soch-bichaar men uljha raha.
17jiliaad kay gharaanay darya-ay-yardan kay mashriq men thaheray rahay. aur daan ka qabeela, vah kyoon baheree jahaazon kay paas raha? aashar ka qabeela bhee saahil par baitha raha, vah aaraam say apnee bandaragaahon kay paas thahera raha,
18jabki zabooloon aur naftaalee apnee jaan par khel kar maidaan-ay-jang men a gaay.
19baadshaah aaay aur laday, kan’aan kay baadshaah majiddo nadee par taanak kay paas israaeel say laday. lekin vahaan say vah chaandee ka loota hua maal vaapas na laaay.
20aasmaan say sitaaron nay seesra par hamla kiya, apnee aasmaanee raahon ko chhod kar vah us say aur us kee qaum say ladnay aaay.
21qaison nadee unhen uda lay gaee, vah nadee jo qadeem zamaanay say bahetee hai. ai meree jaan, mazbootee say aagay chaltee ja!
22us vaqt taapon ka bada shor sunaaee diya. dushman kay zabardast ghoday sarpat daud rahay thay.
23rabb kay farishtay nay kaha, “meeroz shaher par laanat karo, us kay baashindon par khoob laanat karo! kyoonki vah rabb kee madad karnay na aaay, vah soormaaon kay khilaaf rabb kee madad karnay na aaay.”
24hibar qeenee kee beevee mubaarak hai! khaimon men rahenay vaalee aurton men say vah sab say mubaarak hai!
25jab seesra nay paanee maanga to yaael nay usay doodh pilaaya. shaandaar piyaalay men lassee daal kar vah usay us kay paas laaee.
26lekin phir us nay apnay haath say mekh aur apnay dahenay haath say mazdooron ka hathoda pakad kar seesra ka sar phod diya, us kee khopdee tukday tukday karkay us kee kanaptee ko chhed diya.
27us kay paaon men vah tadap utha. vah gir kar vaheen pada raha. haan, vah us kay paaon men gir kar halaak hua.
28seesra kee maan nay khidkee men say jhaanka aur dareechay men say dekhtee dekhtee rotee rahee, “us kay rath kay pahunchnay men itnee der kyoon ho rahee hai? rathon kee aavaaz ab tak kyoon sunaaee naheen day rahee?”
29us kee daanishmand khavaateen usay tasallee detee hain aur vah khud un kee baat duharaatee hai, 30“vah loota hua maal aapas men baant rahay hongay. har mard kay liyay ek do ladkiyaan aur seesra kay liyay rangdaar libaas hoga. haan, vah rangdaar libaas aur meree gardan ko sajaanay kay liyay do nafees rangdaar kapday la rahay hongay.”
31ai rabb, teray tamaam dushman seesra kee tarah halaak ho jaaen! lekin jo tujh say piyaar kartay hain vah pooray zor say tuloo honay vaalay sooraj kee maanind hon.”
baraq kee is fatah kay baad israaeel men 40 saal amn-o-amaan qaaim raha.