Kuzaat 6
midiyaanee israaeeliyon ko dabaatay hain
1phir israaeelee dubaara vah kuchh karnay lagay jo rabb ko bura laga, aur us nay unhen saat saal tak midiyaaniyon kay havaalay kar diya. 2midiyaaniyon ka dabaao itna ziyaada badh gaya ki israaeeliyon nay un say panaah lenay kay liyay pahaadee ilaaqay men shigaaf, ghaar aur gadhiyaan bana leen. 3kyoonki jab bhee vah apnee faslen lagaatay to midiyaanee, amaaleeqee aur mashriq kay deegar faujee un par hamla karke 4mulk ko gher letay aur faslon ko ghazza shaher tak tabaah kartay. vah khaanay vaalee koee bhee cheez naheen chhodtay thay, na koee bhed, na koee bail, aur na koee gadha. 5aur jab vah apnay maveshiyon aur khaimon kay saath pahunchtay to tiddiyon kay dalon kee maanind thay. itnay mard aur oont thay ki un ko gina naheen ja sakta tha. yoon vah mulk par chadh aatay thay taaki usay tabaah karen. 6israaeelee midiyaan kay sabab say itnay pastahaal huay ki aakhirkaar madad kay liyay rabb ko pukaarnay lagay.
7-8 tab us nay un men ek nabee bhej diya jis nay kaha, “rabb israaeel ka khuda farmaata hai ki main hee tumhen misr kee ghulaamee say nikaal laaya. 9main nay tumhen misr kay haath say aur un tamaam zaalimon kay haath say bacha liya jo tumhen daba rahay thay. main unhen tumhaaray aagay aagay nikaalta gaya aur un kee zameen tumhen day dee. 10us vaqt main nay tumhen bataaya, ‘main rabb tumhaara khuda hoon. jin amoriyon kay mulk men tum rah rahay ho un kay devtaaon ka khauf mat maanna. lekin tum nay meree na sunee’.”
rabb jidaaoon ko bulaata hai
11ek din rabb ka farishta aaya aur ufra men baloot kay ek darakht kay saay men baith gaya. yah darakht abeeazar kay khaandaan kay ek aadmee ka tha jis ka naam yooaas tha. vahaan angoor ka ras nikaalnay ka hauz tha, aur us men yooaas ka beta jidaaoon chhup kar gandum jhaad raha tha, hauz men is liyay ki gandum midiyaaniyon say mahfooz rahay. 12rabb ka farishta jidaaoon par zaahir hua aur kaha, “ai zabardast soormay, rabb teray saath hai!”
13jidaaoon nay javaab diya, “naheen janaab, agar rabb hamaaray saath ho to yah sab kuchh hamaaray saath kyoon ho raha hai? us kay vah tamaam mojizay aaj kahaan nazar aatay hain jin kay baaray men hamaaray baapdaada hamen bataatay rahay hain? kya vah naheen kahetay thay ki rabb hamen misr say nikaal laaya? naheen, janaab. ab aisa naheen hai. ab rabb nay hamen tark karkay midiyaan kay havaalay kar diya hai.”
14rabb nay us kee taraf mud kar kaha, “apnee is taaqat men ja aur israaeel ko midiyaan kay haath say bacha. main hee tujhay bhej raha hoon.”
15lekin jidaaoon nay etiraaz kiya, “ai rabb, main israaeel ko kis tarah bachaaoon? mera khaandaan manassee kay qabeelay ka sab say kamzor khaandaan hai, aur main apnay baap kay ghar men sab say chhota hoon.”
16rabb nay javaab diya, “main teray saath hoonga, aur too midiyaaniyon ko yoon maarega jaisay ek hee aadmee ko.”
17tab jidaaoon nay kaha, “agar mujh par teray karam kee nazar ho to mujhay koee ilaahee nishaan dikha taaki saabit ho jaaay ki vaaqaee rabb hee meray saath baat kar raha hai. 18main abhee ja kar qurbaanee tayyaar karta hoon aur phir vaapas a kar usay tujhay pesh karoonga. us vaqt tak ravaana na ho jaana.”
rabb nay kaha, “theek hai, main teree vaapsee ka intizaar karkay hee jaaoonga.”
19jidaaoon chala gaya. us nay bakree ka bachcha zabah karkay tayyaar kiya aur pooray 16 kilograam maiday say bekhameeree rotee banaaee. phir gosht ko tokree men rakh kar aur us ka shorba alag bartan men daal kar vah sab kuchh rabb kay farishtay kay paas laaya aur usay baloot kay saay men pesh kiya.
20rabb kay farishtay nay kaha, “gosht aur bekhameeree rotee ko lay kar is patthar par rakh day, phir shorba us par undel day.” jidaaoon nay aisa hee kiya. 21rabb kay farishtay kay haath men laathee thee. ab us nay laathee kay siray say gosht aur bekhameeree rotee ko chhoo diya. achaanak patthar say aag bhadak uthee aur khuraak bhasm ho gaee. saath saath rabb ka farishta ojhal ho gaya.
22phir jidaaoon ko yaqeen aaya ki yah vaaqaee rabb ka farishta tha, aur vah bol utha, “haay rabb qaadir-ay-mutlaq! mujh par afsos, kyoonki main nay rabb kay farishtay ko roo-ba-roo dekha hai.”
23lekin rabb us say hamkalaam hua aur kaha, “teree salaamatee ho. mat dar, too naheen marega.”
24vaheen jidaaoon nay rabb kay liyay qurbaangaah banaaee aur us ka naam ‘rabb salaamat hai’ rakha. yah aaj tak abeeazar kay khaandaan kay shaher ufra men maujood hai.
jidaaoon baal kee qurbaangaah gira deta hai
25usee raat rabb jidaaoon say hamkalaam hua, “apnay baap kay bailon men say doosray bail ko jo saat saal ka hai chun lay. phir apnay baap kee vah qurbaangaah gira day jis par baal devta ko qurbaaniyaan chadhaaee jaatee hain, aur yaseerat devee ka vah khamba kaat daal jo saath khada hai. 26is kay baad usee pahaadee qilaay kee chotee par rabb apnay khuda kay liyay saheeh qurbaangaah bana day. yaseerat kay khambay kee katee huee lakdee aur bail ko us par rakh kar mujhay bhasm honay vaalee qurbaanee pesh kar.”
27chunaanchay jidaaoon nay apnay das naukron ko saath lay kar vah kuchh kiya jis ka hukm rabb nay usay diya tha. lekin vah apnay khaandaan aur shaher kay logon say darta tha, is liyay us nay yah kaam din kay bajaay raat kay vaqt kiya.
28subah kay vaqt jab shaher kay log uthay to dekha ki baal kee qurbaangaah dha dee gaee hai aur yaseerat devee ka saath vaala khamba kaat diya gaya hai. in kee jagah ek naee qurbaangaah banaaee gaee hai jis par bail ko chadhaaya gaya hai. 29unhon nay ek doosray say poochha, “kis nay yah kiya?” jab vah is baat kee tafteesh karnay lagay to kisee nay unhen bataaya ki jidaaoon bin yooaas nay yah sab kuchh kiya hai.
30tab vah yooaas kay ghar gaay aur taqaaza kiya, “apnay betay ko ghar say nikaal laaen. laazim hai ki vah mar jaaay, kyoonki us nay baal kee qurbaangaah ko gira kar saath vaala yaseerat devee ka khamba bhee kaat daala hai.”
31lekin yooaas nay un say jo us kay saamnay khaday thay kaha, “kya aap baal kay difa men ladna chaahatay hain? jo bhee baal kay liyay ladega usay kal subah tak maar diya jaaega. agar baal vaaqaee khuda hai to vah khud apnay difa men laday jab koee us kee qurbaangaah ko dha day.”
32choonki jidaaoon nay baal kee qurbaangaah gira dee thee is liyay us ka naam yarubbaal yaanee ‘baal us say laday’ pad gaya.
jidaaoon allaah say nishaan maangta hai
33kuchh der kay baad tamaam midiyaanee, amaaleeqee aur doosree mashriqee qaumen jama hueen aur darya-ay-yardan ko paar karkay apnay deray maidaan-ay-yazrael men lagaaay. 34phir rabb ka rooh jidaaoon par naazil hua. us nay narsinga phoonk kar abeeazar kay khaandaan kay mardon ko apnay peechhay ho lenay kay liyay bulaaya. 35saath saath us nay apnay qaasidon ko manassee kay qabeelay aur aashar, zabooloon aur naftaalee kay qabeelon kay paas bhee bhej diya. tab vah bhee aaay aur jidaaoon kay mardon kay saath mil kar us kay peechhay ho liyay.
36jidaaoon nay allaah say dua kee, “agar too vaaqaee israaeel ko apnay vaaday kay mutaabiq meray zareeay bachaana chaahata hai 37to mujhay yaqeen dila. main raat ko taaza katree huee oon gandum gaahanay kay farsh par rakh doonga. kal subah agar sirf oon par os padee ho aur ird-gird ka saara farsh khushk ho to main jaan loonga ki vaaqaee too apnay vaaday kay mutaabiq israaeel ko meray zareeay bachaaega.”
38vahee kuchh hua jis kee darakhwaast jidaaoon nay kee thee. aglay din jab vah subah-saveray utha to oon os say tar thee. jab us nay usay nichoda to itna paanee tha ki bartan bhar gaya.
39phir jidaaoon nay allaah say kaha, “mujh say ghussay na ho jaana agar main tujh say ek baar phir darakhwaast karoon. mujhay ek aakhiree dafa oon kay zareeay teree marzee jaanchnay kee ijaazat day. is dafa oon khushk rahay aur ird-gird kay saaray farsh par os padee ho.” 40us raat allaah nay aisa hee kiya. sirf oon khushk rahee jabki ird-gird kay saaray farsh par os padee thee.