Kuzaat 7
allaah jidaaoon kay saathiyon ko chun leta hai
1subah-saveray yarubbaal yaanee jidaaoon apnay tamaam logon ko saath lay kar harod chashmay kay paas aaya. vahaan unhon nay apnay deray lagaaay. midiyaaniyon nay apnee khaimaagaah un kay shimaal men morih pahaad kay daaman men lagaaee huee thee.
2rabb nay jidaaoon say kaha, “teray paas ziyaada log hain! main is qism kay baday lashkar ko midiyaaniyon par fatah naheen doonga, varna israaeelee meray saamnay deengen maar kar kahengay, ‘ham nay apnee hee taaqat say apnay aap ko bachaaya hai!’ 3is liyay lashkargaah men elaan kar ki jo dar kay maaray pareshaan ho vah apnay ghar vaapas chala jaaay.” jidaaoon nay yoon kiya to 22,000 mard vaapas chalay gaay jabki 10,000 jidaaoon kay paas rahay.
4lekin rabb nay dubaara jidaaoon say baat kee, “abhee tak ziyaada log hain! in kay saath utar kar chashmay kay paas ja. vahaan main unhen jaanch kar un ko muqarrar karoonga jinhen teray saath jaana hai.” 5chunaanchay jidaaoon apnay aadmiyon kay saath chashmay kay paas utar aaya. rabb nay usay hukm diya, “jo bhee apna haath paanee say bhar kar usay kuttay kee tarah chaat lay usay ek taraf khada kar. doosree taraf unhen khada kar jo ghutnay tek kar paanee peetay hain.” 6300 aadmiyon nay apna haath paanee say bhar kar usay chaat liya jabki baaqee sab peenay kay liyay jhuk gaay.
7phir rabb nay jidaaoon say farmaaya, “main in 300 chaatnay vaalay aadmiyon kay zareeay israaeel ko bacha kar midiyaaniyon ko teray havaalay kar doonga. baaqee tamaam mardon ko faarigh kar. vah sab apnay apnay ghar vaapas chalay jaaen.” 8chunaanchay jidaaoon nay baaqee tamaam aadmiyon ko faarigh kar diya. sirf muqarrara 300 mard rah gaay. ab yah doosron kee khuraak aur narsingay apnay paas rakh kar jang kay liyay tayyaar huay. us vaqt midiyaanee khaimaagaah israaeeliyon kay neechay vaadee men thee.
midiyaaniyon par jidaaoon kee fatah
9jab raat huee to rabb jidaaoon say hamkalaam hua, “uth, midiyaanee khaimaagaah kay paas utar kar us par hamla kar, kyoonki main usay teray haath men day doonga. 10lekin agar too is say darta hai to pahelay apnay naukar fooraah kay saath utar kar 11vah baaten sun lay jo vahaan kay log kah rahay hain. tab un par hamla karnay kee jur’at badh jaaegee.”
jidaaoon fooraah kay saath khaimaagaah kay kinaaray kay paas utar aaya. 12midiyaanee, amaaleeqee aur mashriq kay deegar faujee tiddiyon kay dal kee tarah vaadee men phailay huay thay. un kay oont saahil kee ret kee tarah beshumaar thay. 13jidaaoon dabay paaon dushman kay itnay qareeb pahunch gaya ki un kee baaten sun sakta tha. ain us vaqt ek faujee doosray ko apna khwaab suna raha tha, “main nay khwaab men dekha ki jau kee badee rotee ludhaktee ludhaktee hamaaree khaimaagaah men utar aaee. yahaan vah itnee shiddat say khaimay say takra gaee ki khaima ulat kar zameenabos ho gaya.” 14doosray nay javaab diya, “is ka sirf yah matlab ho sakta hai ki israaeelee mard jidaaoon bin yooaas kee talvaar ghaalib aaegee! allaah usay midiyaaniyon aur pooree lashkargaah par fatah dega.”
15khwaab aur us kee taabeer sun kar jidaaoon nay allaah ko sijda kiya. phir us nay israaeelee khaimaagaah men vaapas a kar elaan kiya, “uthen! rabb nay midiyaanee lashkargaah ko tumhaaray havaalay kar diya hai.” 16us nay apnay 300 mardon ko sau sau kay teen gurohon men taqseem karkay har ek ko ek narsinga aur ek ghada day diya. har ghaday men mash’al thee. 17-18 us nay hukm diya, “jo kuchh main karoonga us par ghaur karkay vahee kuchh karen. pooree khaimaagaah ko gher len aur ain vahee kuchh karen jo main karoonga. jab main apnay sau logon kay saath khaimaagaah kay kinaaray pahunchoonga to ham apnay narasingon ko baja dengay. yah suntay hee aap bhee yahee kuchh karen aur saath saath naara lagaaen, ‘rabb kay liyay aur jidaaoon kay liyay’!”
19taqreeban aadhee raat ko jidaaoon apnay sau mardon kay saath midiyaanee khaimaagaah kay kinaaray pahunch gaya. thodee der pahelay paheredaar badal gaay thay. achaanak israaeeliyon nay apnay narasingon ko bajaaya aur apnay ghadon ko tukday tukday kar diya. 20fauran sau sau kay doosray do gurohon nay bhee aisa hee kiya. apnay dahenay haath men narsinga aur baaen haath men bhadaktee mash’al pakad kar vah naara lagaatay rahay, “rabb kay liyay aur jidaaoon kay liyay!” 21lekin vah khaimaagaah men daakhil na huay balki vaheen us kay ird-gird khaday rahay. dushman men badee afra-tafree mach gaee. cheekhtay chillaatay sab bhaag jaanay kee koshish karnay lagay. 22jidaaoon kay 300 aadmee apnay narsingay bajaatay rahay jabki rabb nay khaimaagaah men aisee gadbad paida kee ki log ek doosray say ladnay lagay. aakhirkaar poora lashkar bait-sitta, sareeraat aur abeel-mahoola kee sarhadd tak faraar hua jo tabbaat kay qareeb hai.
23phir jidaaoon nay naftaalee, aashar aur pooray manassee kay mardon ko bula liya, aur unhon nay mil kar midiyaaniyon ka taaqqub kiya. 24us nay apnay qaasidon kay zareeay ifraaeem kay pooray pahaadee ilaaqay kay baashindon ko bhee paighaam bhej diya, “utar aaen aur midiyaaniyon ko bhaag jaanay say roken! bait-baara tak un tamaam jagahon par qabza kar len jahaan dushman darya-ay-yardan ko pa-payaada paar kar sakta hai.”
ifraaeemee maan gaay, 25aur unhon nay do midiyaanee sardaaron ko pakad kar un kay sar qalam kar diay. sardaaron kay naam oreb aur zaeb thay, aur jahaan unhen pakda gaya un jagahon kay naam ‘oreb kee chataan’ aur ‘zaeb ka angoor ka ras nikaalnay vaala hauz’ pad gaya. is kay baad vah dubaara midiyaaniyon ka taaqqub karnay lagay. darya-ay-yardan ko paar karnay par un kee mulaaqaat jidaaoon say huee, aur unhon nay donon sardaaron kay sar us kay sapurd kar diay.