Kuzaat 8
ifraaeem naaraaz ho jaata hai
1lekin ifraaeem kay mardon nay shikaayat kee, “aap nay ham say kaisa sulook kiya? aap nay hamen kyoon naheen bulaaya jab midiyaan say ladnay gaay?” aisee baaten kartay kartay unhon nay jidaaoon kay saath sakht bahs kee. 2lekin jidaaoon nay javaab diya, “kya aap mujh say kaheen ziyaada kaamyaab na huay? aur jo angoor fasal jama karnay kay baad ifraaeem kay baaghon men rah jaatay hain kya vah meray chhotay khaandaan abeeazar kee pooree fasal say ziyaada naheen hotay? 3allaah nay to midiyaan kay sardaaron oreb aur zaeb ko aap kay havaalay kar diya. is kee nisbat mujh say kya kaamyaabee haasil huee hai?” yah sun kar ifraaeem kay mardon ka ghussa thanda ho gaya.
sukkaat aur fanooel jidaaoon kee madad naheen karte
4jidaaoon apnay 300 mardon samet darya-ay-yardan ko paar kar chuka tha. dushman ka taaqqub kartay kartay vah thak gaay thay. 5is liyay jidaaoon nay qareeb kay shaher sukkaat kay baashindon say guzaarish kee, “meray faujiyon ko kuchh rotee day den. vah thak gaay hain, kyoonki ham midiyaanee sardaar zibah aur zalmunna ka taaqqub kar rahay hain.” 6lekin sukkaat kay buzurgon nay javaab diya, “ham aap kay faujiyon ko rotee kyoon den? kya aap zibah aur zalmunna ko pakad chukay hain ki ham aisa karen?” 7yah sun kar jidaaoon nay kaha, “joon hee rabb in do sardaaron zibah aur zalmunna ko meray haath men kar dega main tum ko registaan kee kaantedaar jhaadiyon aur oontakataaron say gaah kar tabaah kar doonga.”
8vah aagay nikal kar fanooel shaher pahunch gaya. vahaan bhee us nay rotee maangee, lekin fanooel kay baashindon nay sukkaat ka sa javaab diya. 9yah sun kar us nay kaha, “jab main salaamatee say vaapas aaoonga to tumhaara yah burj gira doonga!”
midiyaaniyon par pooree fatah
10ab zibah aur zalmunna qarqoor pahunch gaay thay. 15,000 afraad un kay saath rah gaay thay, kyoonki mashriqee ittihaadiyon kay 1,20,000 talvaaron say les faujee halaak ho gaay thay. 11jidaaoon nay midiyaaniyon kay peechhay chaltay huay khaanaabadoshon ka vah raasta istemaal kiya jo noobah aur yugabaha kay mashriq men hai. is tareeqay say us nay un kee lashkargaah par us vaqt hamla kiya jab vah apnay aap ko mahfooz samajh rahay thay. 12dushman men afra-tafree paida huee aur zibah aur zalmunna faraar ho gaay. lekin jidaaoon nay un ka taaqqub kartay kartay unhen pakad liya.
13is kay baad jidaaoon lauta. vah abhee haris kay darra say utar raha thaa 14ki sukkaat kay ek javaan aadmee say mila. jidaaoon nay usay pakad kar majboor kiya ki vah shaher kay raahanumaaon aur buzurgon kee faherist likh kar day. 77 buzurg thay. 15jidaaoon un kay paas gaya aur kaha, “dekho, yah hain zibah aur zalmunna! tum nay in hee kee vajah say mera mazaaq uda kar kaha tha ki ham aap kay thakehaaray faujiyon ko rotee kyoon den? kya aap zibah aur zalmunna ko pakad chukay hain ki ham aisa karen?” 16phir jidaaoon nay shaher kay buzurgon ko giriftaar karkay unhen kaantedaar jhaadiyon aur oontakataaron say gaah kar sabaq sikhaaya. 17phir vah fanooel gaya aur vahaan ka burj gira kar shaher kay mardon ko maar daala.
18is kay baad jidaaoon zibah aur zalmunna say mukhaatib hua. us nay poochha, “un aadmiyon ka hulya kaisa tha jinhen tum nay taboor pahaad par qatl kiya?”
unhon nay javaab diya, “vah aap jaisay thay, har ek shahzaada lag raha tha.”
19jidaaoon bola, “vah meray sagay bhaaee thay. rabb kee hayaat kee qasam, agar tum un ko zinda chhodtay to main tumhen halaak na karta.”
20phir vah apnay pahelauthay yatar say mukhaatib ho kar bola, “in ko maar daalo!” lekin yatar apnee talvaar miyaan say nikaalnay say jhijka, kyoonki vah abhee bachcha tha aur darta tha. 21tab zibah aur zalmunna nay kaha, “aap hee hamen maar den! kyoonki jaisa aadmee vaisee us kee taaqat!” jidaaoon nay khaday ho kar unhen talvaar say maar daala aur un kay oonton kee gardanon par lagay taaveez utaar kar apnay paas rakhay.
jidaaoon kay sabab say israaeel butparastee men ulajh jaata hai
22israaeeliyon nay jidaaoon kay paas a kar kaha, “aap nay hamen midiyaaniyon say bacha liya hai, is liyay ham par hukoomat karen, aap, aap kay baad aap ka beta aur us kay baad aap ka pota.”
23lekin jidaaoon nay javaab diya, “na main aap par hukoomat karoonga, na mera beta. rabb hee aap par hukoomat karega. 24meree sirf ek guzaarish hai. har ek mujhay apnay lootay huay maal men say ek ek baalee day day.” baat yah thee ki dushman kay tamaam afraad nay sonay kee baaliyaan pahen rakhee theen, kyoonki vah ismaaeelee thay.
25israaeeliyon nay kaha, “ham khushee say baalee dengay.” ek chaadar zameen par bichha kar har ek nay ek ek baalee us par phaink dee. 26sonay kee in baaliyon ka vazan taqreeban 20 kilograam tha. is kay ilaava israaeeliyon nay mukhtalif taaveez, kaan kay aavezay, arghvaanee rang kay shaahee libaas aur oonton kee gardanon men lagee qeemtee zanjeeren bhee day deen.
27is sonay say jidaaoon nay ek afod [a] aam taur par ibraanee men afod ka matlab imaam-ay-aazam ka baalaaposh tha (dekhiay khurooj 28:4), lekin yahaan is say muraad butparastee kee koee cheez hai. bana kar usay apnay aabaaee shaher ufra men khada kiya jahaan vah us kay aur tamaam khaandaan kay liyay phanda ban gaya. na sirf yah balki poora israaeel zina karkay but kee pooja karnay laga.
28us vaqt midiyaan nay aisee shikast khaaee ki baad men israaeel kay liyay khatray ka baais na raha. aur jitnee der jidaaoon zinda raha yaanee 40 saal tak mulk men amn-o-amaan qaaim raha.
29jang kay baad jidaaoon bin yooaas dubaara ufra men rahenay laga. 30us kee bahut see beeviyaan aur 70 betay thay. 31us kee ek daashta bhee thee jo sikam shaher men rihaaishpazeer thee aur jis kay ek beta paida hua. jidaaoon nay betay ka naam abeemlik rakha. 32jidaaoon umrraseeda tha jab faut hua. usay abeeazariyon kay shaher ufra men us kay baap yooaas kee qabr men dafnaaya gaya.
33jidaaoon kay martay hee israaeelee dubaara zina karkay baal kay buton kee pooja karnay lagay. vah baal-bareet ko apna khaas devta bana kar 34rabb apnay khuda ko bhool gaay jis nay unhen ird-gird kay dushmanon say bacha liya tha. 35unhon nay yarubbaal yaanee jidaaoon kay khaandaan ko bhee us ehsaan kay liyay koee meharbaanee na dikhaaee jo jidaaoon nay un par kiya tha.