Judges 9

Kuzaat 9

abeemlik baadshaah ban jaata hai

¹ek din yarubbaal yaanee jidaaoon ka beta abeemlik apnay maamooon aur maan kay baaqee rishtedaaron say milnay kay liyay sikam gaya. us nay un say kaha, ²“sikam shaher kay tamaam baashindon say poochhen, kya aap apnay aap par jidaaoon kay 70 beton kee hukoomat ziyaada pasand karengay ya ek hee shakhs kee? yaad rahay ki main aap ka khoonee rishtedaar hoon!” ³abeemlik kay maamooon nay sikam kay tamaam baashindon kay saamnay yah baaten duharaaeen. sikam kay logon nay socha, “abeemlik hamaara bhaaee hai” is liyay vah us kay peechhay lag gaay. ⁴unhon nay usay baal-bareet devta kay mandir say chaandee kay 70 sikkay bhee day diay.

in paison say abeemlik nay apnay ird-gird aavaara aur badam’aash aadmiyon ka guroh jama kiya. ⁵unhen apnay saath lay kar vah ufra pahuncha jahaan baap ka khaandaan raheta tha. vahaan us nay apnay tamaam bhaaiyon yaanee jidaaoon kay 70 beton ko ek hee patthar par qatl kar diya. sirf yootaam jo jidaaoon ka sab say chhota beta tha kaheen chhup kar bach nikla. ⁶is kay baad sikam aur bait-millo kay tamaam log us baloot kay saay men jama huay jo sikam kay satoon kay paas tha. vahaan unhon nay abeemlik ko apna baadshaah muqarrar kiya.

yootaam kee abeemlik aur sikam par laanat

⁷jab yootaam ko is kee ittila milee to vah garizeem pahaad kee chotee par chadh gaya aur oonchee aavaaz say chillaaya, “ai sikam kay baashindo, sunen meree baat! sunen agar aap chaahatay hain ki allaah aap kee bhee sunay. ⁸ek din darakhton nay faisla kiya ki ham par koee baadshaah hona chaahiay. vah usay chunnay aur masah karnay kay liyay niklay. pahelay unhon nay zaitoon kay darakht say baat kee, ‘hamaaray baadshaah ban jaaen!’ ⁹lekin zaitoon kay darakht nay javaab diya, ‘kya main apna tel paida karnay say baaz aaoon jis kee allaah aur insaan itnee qadar kartay hain taaki darakhton par hukoomat karoon? hargiz naheen!’ ¹⁰is kay baad darakhton nay anjeer kay darakht say baat kee, ‘aaen, hamaaray baadshaah ban jaaen!’ ¹¹lekin anjeer kay darakht nay javaab diya, ‘kya main apna meetha aur achchha phal laanay say baaz aaoon taaki darakhton par hukoomat karoon? hargiz naheen!’ ¹²phir darakhton nay angoor kee bel say baat kee, ‘aaen, hamaaray baadshaah ban jaaen!’ ¹³lekin angoor kee bel nay javaab diya, ‘kya main apna ras paida karnay say baaz aaoon jis say allaah aur insaan khush ho jaatay hain taaki darakhton par hukoomat karoon? hargiz naheen!’ ¹⁴aakhirkaar darakht kaantedaar jhaadee kay paas aaay aur kaha, ‘aaen aur hamaaray baadshaah ban jaaen!’ ¹⁵kaantedaar jhaadee nay javaab diya, ‘agar tum vaaqaee mujhay masah karkay apna baadshaah banaana chaahatay ho to aao aur meray saay men panaah lo. agar tum aisa naheen karna chaahatay to jhaadee say aag nikal kar lubnaan kay deodaar kay darakhton ko bhasm kar day’.”

¹⁶yootaam nay baat jaaree rakh kar kaha, “ab mujhay bataaen, kya aap nay vafaadaaree aur sachchaaee ka izhaar kiya jab aap nay abeemlik ko apna baadshaah bana liya? kya aap nay jidaaoon aur us kay khaandaan kay saath achchha sulook kiya? kya aap nay us par shukrguzaaree ka vah izhaar kiya jis kay laaiq vah tha? ¹⁷meray baap nay aap kee khaatir jang kee. aap ko midiyaaniyon say bachaanay kay liyay us nay apnee jaan khatray men daal dee. ¹⁸lekin aaj aap jidaaoon kay gharaanay kay khilaaf uth khaday huay hain. aap nay us kay 70 beton ko ek hee patthar par zabah karkay us kee laundee kay betay abeemlik ko sikam ka baadshaah bana liya hai, aur yah sirf is liyay ki vah aap ka rishtedaar hai. ¹⁹ab sunen! agar aap nay jidaaoon aur us kay khaandaan kay saath vafaadaaree aur sachchaaee ka izhaar kiya hai to phir allaah karay ki abeemlik aap kay liyay khushee ka baais ho aur aap us kay liyay. ²⁰lekin agar aisa naheen tha to allaah karay ki abeemlik say aag nikal kar aap sab ko bhasm kar day jo sikam aur bait-millo men rahetay hain! aur aag aap say nikal kar abeemlik ko bhee bhasm kar day!” ²¹yah kah kar yootaam nay bhaag kar bair men panaah lee, kyoonki vah apnay bhaaee abeemlik say darta tha.

sikam kay baashinday abeemlik kay khilaaf ho jaatay hain

²²abeemlik kee israaeel par hukoomat teen saal tak rahee. ²³lekin phir allaah nay ek buree rooh bhej dee jis nay abeemlik aur sikam kay baashindon men naaittifaaqee paida kar dee. nateejay men sikam kay logon nay baghaavat kee. ²⁴yoon allaah nay usay is kee saza dee ki us nay apnay bhaaiyon yaanee jidaaoon kay 70 beton ko qatl kiya tha. sikam kay baashindon ko bhee saza milee, kyoonki unhon nay is men abeemlik kee madad kee thee.

²⁵us vaqt sikam kay log ird-gird kee chotiyon par chadh kar abeemlik kee taak men baith gaay. jo bhee vahaan say guzra usay unhon nay loot liya. is baat kee khabar abeemlik tak pahunch gaee.

²⁶un dinon men ek aadmee apnay bhaaiyon kay saath sikam aaya jis ka naam jaal bin abad tha. sikam kay logon say us ka achchha-khaasa taalluq ban gaya, aur vah us par etibaar karnay lagay. ²⁷angoor kee fasal pak gaee thee. log shaher say niklay aur apnay baaghon men angoor tod kar un say ras nikaalnay lagay. phir unhon nay apnay devta kay mandir men jashn manaaya. jab vah khoob kha pee rahay thay to abeemlik par laanat karnay lagay. ²⁸jaal bin abad nay kaha, “sikam ka abeemlik kay saath kya vaasta ki ham us kay taabay rahen? vah to sirf yarubbaal ka beta hai, jis ka numaainda zabool hai. us kee khidmat mat karna balki sikam kay baanee hamor kay logon kee! ham abeemlik kee khidmat kyoon karen? ²⁹kaash shaher ka intizaam meray haath men hota! phir main abeemlik ko jald hee nikaal deta. main usay chailenj deta ki aao, apnay faujiyon ko jama karkay ham say lado!”

abeemlik sikam say ladta hai

³⁰jaal bin abad kee baat sun kar sikam ka sardaar zabool baday ghussay men a gaya. ³¹apnay qaasidon kee maarifat us nay abeemlik ko chupkay say ittila dee, “jaal bin abad apnay bhaaiyon kay saath sikam a gaya hai jahaan vah pooray shaher ko aap kay khilaaf khaday ho jaanay kay liyay uksa raha hai. ³²ab aisa karen ki raat kay vaqt apnay faujiyon samet idhar aaen aur kheton men taak men rahen. ³³subah-saveray jab sooraj tuloo hoga to shaher par hamla karen. jab jaal apnay aadmiyon kay saath aap kay khilaaf ladnay aaega to us kay saath vah kuchh karen jo aap munaasib samajhtay hain.” ³⁴yah sun kar abeemlik raat kay vaqt apnay faujiyon samet ravaana hua. us nay unhen chaar gurohon men taqseem kiya jo sikam ko gher kar taak men baith gaay.

³⁵subah kay vaqt jab jaal ghar say nikal kar shaher kay darvaazay men khada hua to abeemlik aur us kay faujee apnee chhupnay kee jagahon say nikal aaay. ³⁶unhen dekh kar jaal nay zabool say kaha, “dekho, log pahaadon kee chotiyon say utar rahay hain!” zabool nay javaab diya, “naheen, naheen, jo aap ko aadmee lag rahay hain vah sirf pahaadon kay saay hain.” ³⁷lekin jaal ko tasallee na huee. vah dubaara bol utha, “dekho, log duniya kee naaf ^[a] matlab ghaaliban koh-ay-garizeem hai. say utar rahay hain. aur ek aur guroh rammaalon kay baloot say ho kar a raha hai.” ³⁸phir zabool nay us say kaha, “ab teree badee badee baaten kahaan raheen? kya too nay naheen kaha tha, ‘abeemlik kaun hai ki ham us kay taabay rahen?’ ab yah log a gaay hain jin ka mazaaq too nay udaaya. ja, shaher say nikal kar un say lad!”

³⁹tab jaal sikam kay mardon kay saath shaher say nikla aur abeemlik say ladnay laga. ⁴⁰lekin vah haar gaya, aur abeemlik nay shaher kay darvaazay tak us ka taaqqub kiya. bhaagtay bhaagtay sikam kay bahut say afraad raastay men gir kar halaak ho gaay. ⁴¹phir abeemlik arooma chala gaya jabki zabool nay peechhay rah kar jaal aur us kay bhaaiyon ko shaher say nikaal diya.

⁴²aglay din sikam kay log shaher say nikal kar maidaan men aana chaahatay thay. jab abeemlik ko yah khabar milee ^43-44 to us nay apnee fauj ko teen gurohon men taqseem kiya. yah guroh dubaara sikam ko gher kar ghaat men baith gaay. jab log shaher say niklay to abeemlik apnay guroh kay saath chhupnay kee jagah say nikal aaya aur shaher kay darvaazay men khada ho gaya. baaqee do guroh maidaan men maujood afraad par toot paday aur sab ko halaak kar diya. ⁴⁵phir abeemlik nay shaher par hamla kiya. log poora din ladtay rahay, lekin aakhirkaar abeemlik nay shaher par qabza karkay tamaam baashindon ko maut kay ghaat utaar diya. us nay shaher ko tabaah kiya aur khandaraat par namak bikher kar us kee hatmee tabaahee zaahir kar dee.

⁴⁶jab sikam kay burj kay rahenay vaalon ko yah ittila milee to vah el-bareet devta kay mandir kay tahkhaanay men chhup gaay. ⁴⁷jab abeemlik ko pata chalaa ⁴⁸to vah apnay faujiyon samet zalmon pahaad par chadh gaya. vahaan us nay kulhaadee say shaakh kaat kar apnay kandhon par rakh lee aur apnay faujiyon ko hukm diya, “jaldee karo! sab aisa hee karo.” ⁴⁹faujiyon nay bhee shaakhen kaateen aur phir abeemlik kay peechhay lag kar mandir kay paas vaapas aaay. vahaan unhon nay tamaam lakdee tahkhaanay kee chhat par jama karkay usay jala diya. yoon sikam kay burj kay taqreeban 1,000 mard-o-khavaateen sab bhasm ho gaay.

abeemlik kee maut

⁵⁰vahaan say abeemlik taibiz kay khilaaf badh gaya. us nay shaher ka muhaasara karkay us par qabza kar liya. ⁵¹lekin shaher kay beech men ek mazboot burj tha. tamaam mard-o-khavaateen us men faraar huay aur burj kay darvaazon par kundee laga kar chhat par chadh gaay.

⁵²abeemlik ladtay ladtay burj kay darvaazay kay qareeb pahunch gaya. vah usay jalaanay kee koshish karnay lagaa ⁵³to ek aurat nay chakkee ka oopar ka paat us kay sar par phaink diya, aur vah phat gaya. ⁵⁴jaldee say abeemlik nay apnay silaahabardaar ko bulaaya. us nay kaha, “apnee talvaar khainch kar mujhay maar do! varna log kahengay ki ek aurat nay mujhay maar daala.” chunaanchay naujavaan nay apnee talvaar us kay badan men say guzaar dee aur vah mar gaya. ⁵⁵jab faujiyon nay dekha ki abeemlik mar gaya hai to vah apnay apnay ghar chalay gaay.

⁵⁶yoon allaah nay abeemlik ko us badee ka badla diya jo us nay apnay 70 bhaaiyon ko qatl karkay apnay baap kay khilaaf kee thee. ⁵⁷aur allaah nay sikam kay baashindon ko bhee un kee shareer harkaton kee munaasib saza dee. yootaam bin yarubbaal kee laanat pooree huee.