Root 1
ileemlik moaab chala jaata hai
1-2 un dinon jab qaazee qaum kee raahanumaaee kiya kartay thay to israaeel men kaal pada. yahoodaah kay shaher bait-lahem men ek ifraatee aadmee raheta tha jis ka naam ileemlik tha. kaal kee vajah say vah apnee beevee naomee aur apnay do beton mahelon aur kilyon ko lay kar mulk-ay-moaab men ja basa.
3lekin kuchh der kay baad ileemlik faut ho gaya, aur naomee apnay do beton kay saath akelee rah gaee. 4mahelon aur kilyon nay moaab kee do aurton say shaadee kar lee. ek ka naam urpha tha aur doosree ka root. lekin taqreeban das saal kay baad 5donon betay bhee jaan-ba-haq ho gaay. ab naomee ka na shauhar aur na betay hee rahay thay.
naomee root kay saath vaapas chalee jaatee hai
6-7 ek din naomee ko mulk-ay-moaab men khabar milee ki rabb apnee qaum par rahem karkay usay dubaara achchhee faslen day raha hai. tab vah apnay vatan yahoodaah kay liyay ravaana huee. urpha aur root bhee saath chaleen.
jab vah us raastay par a gaeen jo yahoodaah tak pahunchaata hai 8to naomee nay apnee bahooon say kaha, “ab apnay maan-baap kay ghar vaapas chalee jaaen. rabb aap par utna rahem karay jitna aap nay marhoomon aur mujh par kiya hai. 9vah aap ko naay ghar aur naay shauhar muhayya karkay sukoon day.”
yah kah kar us nay unhen bosa diya. donon ro padeen 10aur etiraaz kiya, “hargiz naheen, ham aap kay saath aap kee qaum kay paas jaaengee.” 11lekin naomee nay israar kiya, “betiyo, bas karen aur apnay apnay ghar vaapas chalee jaaen. ab meray saath jaanay ka kya faaida? mujh say to mazeed koee beta paida naheen hoga jo aap ka shauhar ban sakay. 12naheen betiyo, vaapas chalee jaaen. main to itnee boodhee ho chukee hoon ki dubaara shaadee naheen kar saktee. aur agar is kee ummeed bhee hotee balki meree shaadee aaj raat ko hotee aur meray haan betay paida hote 13to kya aap un kay baaligh ho jaanay tak intizaar kar sakteen? kya aap us vaqt tak kisee aur say shaadee karnay say inkaar karteen? naheen, betiyo. rabb nay apna haath meray khilaaf uthaaya hai, to aap is laanat kee zad men kyoon aaen?”
14tab urpha aur root dubaara ro padeen. urpha nay apnee saas ko choom kar alvida kaha, lekin root naomee kay saath liptee rahee. 15naomee nay usay samjhaanay kee koshish kee, “dekhen, urpha apnee qaum aur apnay devtaaon kay paas vaapas chalee gaee hai. ab aap bhee aisa hee karen.”
16lekin root nay javaab diya, “mujhay aap ko chhod kar vaapas jaanay par majboor na keejiay. jahaan aap jaaengee main jaaoongee. jahaan aap rahengee vahaan main bhee rahoongee. aap kee qaum meree qaum aur aap ka khuda mera khuda hai. 17jahaan aap marengee vaheen main maroongee aur vaheen dafan ho jaaoongee. sirf maut hee mujhay aap say alag kar saktee hai. agar mera yah vaada poora na ho to allaah mujhay sakht saza day!”
18naomee nay jaan liya ki root ka saath jaanay ka pakka iraada hai, is liyay vah khaamosh ho gaee aur usay samjhaanay say baaz aaee. 19vah chal padeen aur chaltay chaltay bait-lahem pahunch gaeen. jab daakhil hueen to pooray shaher men halchal mach gaee. aurten kahenay lageen, “kya yah naomee naheen hai?”
20naomee nay javaab diya, “ab mujhay naomee [a] khushgavaar, khushee vaalee. mat kahena balki maaraa [b] kadvee. , kyoonki qaadir-ay-mutlaq nay mujhay sakht museebat men daal diya hai. 21yahaan say jaatay vaqt meray haath bharay huay thay, lekin ab rabb mujhay khaalee haath vaapas lay aaya hai. chunaanchay mujhay naomee mat kahena. rabb nay khud meray khilaaf gavaahee dee hai, qaadir-ay-mutlaq nay mujhay is museebat men daala hai.”
22jab naomee apnee moaabee bahoo kay saath bait-lahem pahunchee to jau kee fasal kee kataaee shuroo ho chukee thee.