Root 2
root kee boaz say mulaaqaat
1bait-lahem men naomee kay marhoom shauhar ka rishtedaar raheta tha jis ka naam boaz tha. vah asar-o-rasookh rakhta tha, aur us kee zameenen theen.
2ek din root nay apnee saas say kaha, “main kheton men ja kar fasal kee kataaee say bachee huee baalen chun loon. koee na koee to mujhay is kee ijaazat dega.” naomee nay javaab diya, “theek hai betee, jaaen.” 3root kisee khet men gaee aur mazdooron kay peechhay peechhay chaltee huee bachee huee baalen chunnay lagee. usay maaloom na tha ki khet ka maalik susar ka rishtedaar boaz hai.
4itnay men boaz bait-lahem say pahuncha. us nay apnay mazdooron say kaha, “rabb aap kay saath ho.” unhon nay javaab diya, “aur rabb aap ko bhee barkat day!” 5phir boaz nay mazdooron kay inchaarj say poochha, “us javaan aurat ka maalik kaun hai?” 6aadmee nay javaab diya, “yah moaabee aurat naomee kay saath mulk-ay-moaab say aaee hai. 7is nay mujh say mazdooron kay peechhay chal kar bachee huee baalen chunnay kee ijaazat lee. yah thodee der jhompdee kay saay men aaraam karnay kay siva subah say lay kar ab tak kaam men lagee rahee hai.”
8yah sun kar boaz nay root say baat kee, “betee, meree baat sunen! kisee aur khet men bachee huee baalen chunnay kay liyay na jaaen balki yaheen meree naukraaniyon kay saath rahen. 9khet kay us hissay par dhyaan den jahaan fasal kee kataaee ho rahee hai aur naukraaniyon kay peechhay peechhay chaltee rahen. main nay aadmiyon ko aap ko chhednay say mana kiya hai. jab bhee aap ko piyaas lagay to un bartanon say paanee peena jo aadmiyon nay kuen say bhar rakhay hain.”
10root munh kay bal jhuk gaee aur bolee, “main is laaiq naheen ki aap mujh par itnee meharbaanee karen. main to pardesee hoon. aap kyoon meree qadar kartay hain?” 11boaz nay javaab diya, “mujhay vah kuchh bataaya gaya hai jo aap nay apnay shauhar kee vafaat say lay kar aaj tak apnee saas kay liyay kiya hai. aap apnay maan-baap aur apnay vatan ko chhod kar ek qaum men basnay aaee hain jisay pahelay say naheen jaantee theen. 12aap rabb israaeel kay khuda kay paron talay panaah lenay aaee hain. ab vah aap ko aap kee nekee ka poora ajr day.” 13root nay kaha, “meray aaqa, allaah karay ki main aainda bhee aap kee manzoor-ay-nazar rahoon. go main aap kee naukraaniyon kee haisiyat bhee naheen rakhtee to bhee aap nay mujh say shafqat bharee baaten karkay mujhay tasallee dee hai.”
14khaanay kay vaqt boaz nay root ko bula kar kaha, “idhar a kar rotee khaaen aur apna navaalaasihashaakha sirkay men dubo den.” root us kay mazdooron kay saath baith gaee, aur boaz nay usay jau kay bhunay huay daanay day diay. root nay jee bhar kar khaana khaaya. phir bhee kuchh bach gaya. 15jab vah kaam jaaree rakhnay kay liyay khadee huee to boaz nay hukm diya, “usay poolon kay darmiyaan bhee baalen jama karnay do, aur agar vah aisa karay to us kee beizzatee mat karna. 16na sirf yah balki kaam kartay vaqt idhar udhar poolon kee kuchh baalen zameen par girnay do. jab vah unhen jama karnay aaay to usay mat jhidakna!”
17root nay khet men shaam tak kaam jaaree rakha. jab us nay baalon ko koot liya to daanon kay taqreeban 13 kilograam niklay. 18phir vah sab kuchh utha kar apnay ghar vaapas lay aaee aur saas ko dikhaaya. saath saath us nay usay vah bhunay huay daanay bhee diay jo dopaher kay khaanay say bach gaay thay. 19naomee nay poochha, “aap nay yah sab kuchh kahaan say jama kiya? bataaen, aap kahaan theen? allaah usay barkat day jis nay aap kee itnee qadar kee hai!”
root nay kaha, “jis aadmee kay khet men main nay aaj kaam kiya us ka naam boaz hai.” 20naomee pukaar uthee, “rabb usay barkat day! vah to hamaara qareebee rishtedaar hai, aur shareeat kay mutaabiq us ka haq hai ki vah hamaaree madad karay. ab mujhay maaloom hua hai ki allaah ham par aur hamaaray marhoom shauharon par rahem karnay say baaz naheen aaya!”
21root bolee, “us nay mujh say yah bhee kaha ki kaheen aur na jaana balki kataaee kay ikhtitaam tak meray mazdooron kay peechhay peechhay baalen jama karna.”
22naomee nay javaab men kaha, “bahut achchha. betee, aisa hee karen. us kee naukraaniyon kay saath rahenay ka yah faaida hai ki aap mahfooz rahengee. kisee aur kay khet men jaaen to ho sakta hai ki koee aap ko tang karay.”
23chunaanchay root jau aur gandum kee kataaee kay pooray mausam men boaz kee naukraaniyon kay paas jaatee aur bachee huee baalen chuntee. shaam ko vah apnee saas kay ghar vaapas chalee jaatee thee.